Vüqar Rəhimzadə: ATƏT-in verdiyi açıqlamalar qərəzlidir

Bakı:

20 °C

53 %

5 m/s

Əlaqə

AZ RU EN

Ana səhifə / Siyasət / Vüqar Rəhimzadə: ATƏT-in verdiyi açıqlamalar qərəzlidir

Vüqar Rəhimzadə: ATƏT-in verdiyi açıqlamalar qərəzlidir

12.10.2013 [10:47]

“Azərbaycanda görülən işlərə qara yaxmaq, şər, böhtan atmaq yolverilməzdir”
“ATƏT daimi olaraq qərəzlilik xəstəliyinə düçar olmuş təşkilat kimi hazırladığı hesabatda öz mövqeyini ortaya qoydu”. Bu fikri SİA-ya ATƏT-in Demokratik Təsisatlar və İnsan Haqları Bürosunun (ATƏT/ DTİHB) Azərbaycandakı prezident seçkisi ilə bağlı hesabatına münasibət bildirən Yeni Azərbaycan Partiyasının (YAP) Siyasi Şurasının üzvü, “İki Sahil” qəzetinin baş redaktoru Vüqar Rəhimzadə deyib.
Baş redaktorun sözlərinə görə, ATƏT burada Azərbaycan xalqının iradəsindən irəli gələn məsələləri deyil, yalnız öz ampluasında olan hərdəmxəyal düşüncələrini ortaya qoydu: “Mən bir seçici, vətəndaş kimi hesab edirəm ki, ATƏT anti-Azərbaycan, ermənipərəst qüvvələrin əlində bir alət kimi ölkəmizə qarşı daima qərəzli mövqedən çıxış edib. Əgər biz tarixə nəzər salsaq görərik ki, ümumiyyətlə ATƏT-in fəaliyyəti Azərbaycana qarşı ikili standartlardan, qərəzdən başqa bir şey olmayıb. Onların verdikləri açıqlamaların heç biri reallığı əks etdirmir. Bu hesabatlar əvvəlcədən hazırlanmış radikal, dağıdıcı insanların, eləcə də müxalifət qəzetlərindən götürülən yazıların ATƏT-in öz xarakterlərinə, xüsusiyyətlərinə uyğunlaşdırılmış formada təqdimatıdır. Bunlar sadəcə olaraq özlərinin ədalətsiz mövqelərini ortaya qoydular. Bu, Azərbaycan seçicisinə qarşı hörmətsizlikdir. Hesab edirəm ki, ölkəmizdə seçkilər tam demokratik, şəffaf və ədalətli şəkildə keçirildi. Bunu tək mən deyil, yüzlərlə müşahidəçi beynəlxalq təşkilatların nümayəndələri də təsdiq edir”.
Vüqar Rəhimzadə deyib ki, Azərbaycanda 9 oktyabrda keçirilən prezident seçkiləri çox şəffaf, ədalətli və demokratik şəraitdə keçib: “Hesab edirəm ki, hər bir seçici bu seçkilərdə öz fikrini azad, sərbəst şəkildə ifadə etdi və birmənalı şəkildə cənab İlham Əliyevə səs verməklə, Azərbaycanın daha da qüdrətlənməsinə, güclənməsinə, eləcə də ölkəmizin dünya birliyində daha da layiqli yer tutmasına, övladlarımızın, vətəndaşlarımızın firəvan yaşamasına səs vermiş oldular. Bir sözlə, bu, Azərbaycanın qələbəsi idi”.
Oktyabrın 12-də Demokratik Qüvvələrin “Milli şura”sının keçirəcəyi növbəti mitinqə də münasibət bildirən Vüqar Rəhimzadə deyib ki, bura toplaşanlar radikal, qərəzli, anti-Azərbaycan düşüncəsi ilə formalaşmış insanlardır: “Onların indiyədək keçirdikləri mitinqlərdə insanlar barmaqla sayılırdı. Hesab edirəm ki, Cəmil Həsənli öz fəaliyyətinə uyğun olaraq, insanların səsini toplayıb. Azərbaycanda görülən işlərə qara yaxmaq, şər, böhtan atmaq yolverilməzdir. Təbii ki, seçkilər ölkəmizdə bir hesabatdır. Düşünürəm ki, onların sabah (bu gün - red.) keçirəcəkləri mitinq də həmişə olduğu kimi, birmənalı olaraq fiaskoya uğrayacaq”.

Paylaş:

Baxılıb: 1025 dəfə