Ədliyyə Nazirliyində Xocalı soyqırımının 30-cu ildönümü ilə bağlı tədbirlər keçirilib

Bakı:

19 °C

88 %

3 m/s

Əlaqə

AZ RU EN

Ana səhifə / Xəbər lenti / Ədliyyə Nazirliyində Xocalı soyqırımının 30-cu ildönümü ilə bağlı tədbirlər keçirilib

Ədliyyə Nazirliyində Xocalı soyqırımının 30-cu ildönümü ilə bağlı tədbirlər keçirilib

26.02.2022 [20:08]

XX əsrin ən dəhşətli faciələrindən olan Xocalı soyqırımından 30 il ötür. Bununla əlaqədar Azərbaycan Prezidenti İlham Əliyev tərəfindən xüsusi Sərəncam imzalanıb, dövlətimizin başçısının və Birinci vitse-prezident Mehriban xanım Əliyevanın iştirakı ilə ümumxalq yürüşü keçirilib. Yürüş iştirakçıları, o cümlədən ədliyyə işçiləri Xətai rayonunda ucaldılan Xocalı abidəsini ziyarət edərək önünə gül dəstələri qoyub, faciədə həlak olan soydaşlarımızın əziz xatirəsini dərin hüznlə yad ediblər.
Ədliyyə Nazirliyinin mətbuat xidmətindən bildiriblər ki, nazirlikdə və struktur qurumlarda keçirilən anım tədbirlərində Xocalı soyqırımının beynəlxalq hüquqa görə sülh və bəşəriyyət əleyhinə əməl olduğu və ən ağır beynəlxalq cinayət sayıldığı bildirilib. Bu dəhşətli qətliamın Ermənistanın uzun illərdən bəri Azərbaycana qarşı həyata keçirdiyi planlaşdırılmış etnik təmizləmə və təcavüz siyasətinin tərkib hissəsi olduğu vurğulanıb.
Qeyd olunub ki, 44 günlük Vətən müharibəsi dövründə də mülki əhalimizə qarşı ballistik və reaktiv raketlər, kasetli bombalardan istifadə etməklə qanlı cinayətlər törətməsi Ermənistan tərəfinin daim həyata keçirdiyi dövlət siyasətidir.
Tədbirlərdə Vətən müharibəsində Müzəffər Ali Baş Komadan İlham Əliyevin rəhbərliyi ilə xalqımızın parlaq Qələbəsi nəticəsində torpaqlarımızın 30 illik işğaldan azad olunaraq tarixi ədalətin zəfər çaldığı, şəhidlərimizin, günahsız insanların, o cümlədən Xocalı qurbanlarının qanının yerdə qalmadığı vurğulanıb.
Bəşəriyyətə, insanlığa qarşı törədilmiş bu qanlı cinayətə ümummilli liderimiz Heydər Əliyevin hakimiyyətə qayıdışından sonra siyasi-hüquqi qiymət verildiyi, dövlətimizin başçısı İlham Əliyev və respublikamızın Birinci vitse-prezidenti Mehriban xanım Əliyeva tərəfindən Xocalı faciəsi barədə həqiqətlərin beynəlxalq ictimaiyyətə çatdırılması və dünya birliyi tərəfindən soyqırımı aktı kimi tanınması üçün məqsədyönlü fəaliyyət göstərildiyi, bununla bağlı Heydər Əliyev Fondunun təşəbbüsü ilə geniş vüsət alan “Xocalıya ədalət!” kampaniyasının fəaliyyəti xüsusi qeyd olunub, bu dəhşətli faciəni törədənlərin layiqli cəzalarını alacaqlarına əminlik ifadə edilib.
Tədbirlər çərçivəsində Ədliyyə Akademiyasında gənc ədliyyə işçiləri və könüllüləri, Vətən müharibəsi iştirakçıları ilə Xocalı soyqırımına həsr olunan görüş keçirilib.
Görüşdə Xocalı hadisələrinin şahidi, Azərbaycan Dillər Universitetinin və Ədliyyə Akademiyasının müəllimləri tərəfindən çıxışlar edilərək ermənilərin Xocalıda törətdikləri vəhşiliklərdən, faciənin acı nəticələrindən bəhs olunub, soyqırımı ilə bağlı həqiqətlərin indiki və gələcək nəsillərə çatdırılmasının, eləcə də dünyada tanıdılmasının milli, vətənpərvər ruhda yetişən və könüllülük hərəkatının aparıcı qüvvəsi olan müasir Azərbaycan gəncliyinin müqəddəs vəzifəsi olduğu vurğulanıb.
Gənclər, o cümlədən nazirlikdə istehsalat təcrübəsi keçən ADA Universitetinin tələbələri Vətən müharibəsində parlaq Zəfərimizin və ordumuzun qəhrəmanlığının təcəssümü olan Hərbi Qənimətlər Parkı ilə tanış olublar.
Ədliyyə işçiləri saat 17:00-da soyqırımı qurbanlarının əziz xatirəsini əbədi ehtiram əlaməti olaraq bir dəqiqəlik sükutla yad ediblər.
Faciənin ildönümü ilə bağlı nazirliyin Ədliyyə tarixi muzeyində yaradılmış “Xocalıya ədalət 30” adlı xüsusi stendlə, xalqımızın müstəqilliyinin və ərazi bütövlüyünün qorunması uğrunda mübarizəsinə həsr olunan ekspozisiyalarla və digər əyani vəsaitlərlə tanışlıq olub, kinozalda Xocalıda baş vermiş qanlı hadisələrə həsr olunan filmlər, foto və video-slaydlar nümayiş etdirilib, mətbuatda çıxışlar edilib, təlim-tədris müəssisələrində xüsusi mühazirələr oxunub, internet saytda və sosial media hesablarında məlumatlar paylaşılıb.

Paylaş:

Baxılıb: 687 dəfə