Azərbaycan sabaha inamla baxır

Bakı:

10 °C

87 %

6 m/s

Əlaqə

AZ RU EN

Ana səhifə / YAP xəbərləri / Azərbaycan sabaha inamla baxır

Azərbaycan sabaha inamla baxır

27.02.2026 [16:29]

Bəzən tarix susur, amma yaddaş heç vaxt susmur. Xocalı Soyqırımı Memorialının açılışı Azərbaycan xalqının sınmayan ruhunun və dövlət iradəsinin canlı təcəssümüdür. Bu hadisə bir daha sübut etdi ki, xalq–dövlət birliyi yalnız şüarlarda deyil, tarixi sınaqlarda formalaşır. Prezident İlham Əliyevin çıxışında əsas xətt məhz bu birliyin necə qorunduğu və necə qələbəyə çevrildiyi idi.

Xocalı sakinlərinin illərlə çəkdiyi ağrı, itkilər və didərginlik yalnız fiziki yox, mənəvi sınaq idi. Buna baxmayaraq, bu insanlar inamlarını itirmədilər. Onları ayaqda saxlayan dövlətə, orduya və ədalətin gec-tez bərpa olunacağına olan etimad idi. Bu etimadın formalaşmasında Birinci vitse-prezident Mehriban Əliyevanın rəhbərliyi ilə həyata keçirilən humanitar və yaddaş siyasəti xüsusi rol oynadı. Xocalı həqiqətləri unudulmadı, nəsildən-nəslə ötürüldü. Bu prosesdə Heydər Əliyev Fondunun fəaliyyəti mühüm rol oynadı. Fondun təşəbbüsləri Xocalı faciəsini qlobal gündəliyə çıxardı, saxta narrativləri dağıtdı. Leyla Əliyevanın bu istiqamətdə apardığı sistemli fəaliyyət nəticəsində Xocalı faciəsi artıq təkcə Azərbaycanın deyil, beynəlxalq ictimaiyyətin də vicdan məsələsinə çevrildi.

Azərbaycanın fərqi ondadır ki, o, müharibəni belə mənəvi çərçivədən kənara çıxarmadı. Günahsız mülki əhaliyə qarşı zorakılıq dövlət siyasətinə çevrilmədi. Əksinə, döyüş meydanında əldə edilən qələbə həm də etik üstünlük qazandırdı. Bu gün Azərbaycan Ordusuna və dövlətinə beynəlxalq hörmətin əsas səbəblərindən biri də budur. Cənab Prezident İlham Əliyevin dediyi kimi, bu, ədalətin tam təntənəsidir. Ədaləti biz özümüz təmin etdik, xalqımız bir yumruq kimi birləşərək həm 2020-ci, həm 2023-cü illərdə böyük qəhrəmanlıq göstərmişdir. Biz ədaləti Silahlı Qüvvələrimizin peşəkarlığı, fədakarlığı, rəşadəti hesabına özümüz təmin etdik. Əlbəttə ki, müharibə cinayətkarlarını ədalət məhkəməsinə gətirmək və ədalətli məhkəməni təşkil etmək bizim ədalətimizin son nöqtəsi idi.

Memorial Kompleksin Xocalıda inşa edilməsi dərin siyasi məna daşıyır. Bu, “biz qayıtdıq” deməkdən daha artıqdır. Bu, “biz güclüyük və bu güc sülhün təminatıdır” mesajıdır. Artıq Azərbaycan 1990-cı illərin aciz dövləti deyil. Bu gün suverenliyini qorumağa qadir, öz təhlükəsizliyini özü təmin edən regional gücdür. Xocalı faciəsi xalqımızı sındırmadı, əksinə, onu daha da möhkəmləndirdi. Məhz bu möhkəm yaddaş və iradə sayəsində Azərbaycan bu gün sülh içində yaşayır və sabaha inamla baxır.

Xocalı Memorialı gələcək nəsillərə ünvanlanan xəbərdarlıqdır: tarix unudulanda təkrarlanır. Ona görə də bu yaddaş yalnız keçmişə baxış deyil, gələcəyin strateji dayağıdır. Azərbaycan dövləti bu dayağı möhkəm saxlayaraq göstərir ki, xalqının ağrısını da, qürurunu da özü daşımağa qadirdir.

Natiq Quluzadə

YAP Zəngilan rayon təşkilatının sədri

Paylaş:

Baxılıb: 123 dəfə