Məsuliyyət, dəqiqlik və etibar...

Bakı:

26 °C

57 %

4 m/s

Əlaqə

AZ RU EN

Ana səhifə / Sosial / Məsuliyyət, dəqiqlik və etibar...

Məsuliyyət, dəqiqlik və etibar...

02.06.2026 [08:39]

Aviasiya işçiləri mavi səmanın etibarlı keşikçiləridir

Səmanın sonsuz maviliyində hər gün minlərlə insan təhlükəsiz və rahat şəkildə mənzil başına çatır. Qitələri birləşdirən, xalqları yaxınlaşdıran, iqtisadiyyatları canlandıran bu gücün adı mülki aviasiyadır. Bir zamanlar yalnız xəyal edilən uçuşlar bu gün həyatımızın ayrılmaz parçasına çevrilib. Bu missiyanı yerinə yetirən mülki aviasiya işçiləri öz peşəkarlıqları, məsuliyyətləri və fədakar əməkləri ilə mühüm rol oynayırlar.

Məhz buna görə də Prezident İlham Əliyevin 18 may 2006-cı il tarixli Sərəncamına əsasən, 2 İyun Mülki Aviasiya İşçilərinin Peşə Bayramı kimi qeyd olunur.

Mülki aviasiya sadəcə nəqliyyat sahəsi deyil, yüksək dəqiqlik, ciddi intizam, müasir texnologiyalar və insan amilinin vəhdəti üzərində qurulan mürəkkəb bir sistemdir. Bu sistemin dayanıqlı fəaliyyəti isə pilotlardan dispetçerlərə, mühəndislərdən texniki heyətə, hava limanı əməkdaşlarından uçuş təhlükəsizliyinə cavabdeh olan mütəxəssislərə qədər böyük bir komandanın gecə-gündüz davam edən əməyi sayəsində mümkün olur. Hər uğurlu uçuşun arxasında görünməyən, lakin son dərəcə vacib olan zəhmət dayanır.

Bu gün Azərbaycan mülki aviasiyası regionun ən müasir və dinamik inkişaf edən sahələrindən biri kimi tanınır. Beynəlxalq standartlara uyğun qurulan infrastruktur, müasir hava limanları, yenilənən aviapark və peşəkar kadr potensialı ölkəmizin aviasiya sahəsində qazandığı uğurların əsas göstəricilərindən hesab olunur. Azərbaycanın hava qapıları təkcə sərnişinləri deyil, həm də ölkənin iqtisadi, turizm və beynəlxalq əlaqələr sahəsindəki nailiyyətlərini dünyaya daşıyan mühüm strateji mərkəzlərə çevrilib.

Bakıda yerləşən və öz memarlıq üslubu, texnoloji imkanları, yüksək xidmət keyfiyyəti ilə dünyanın müxtəlif nüfuzlu reytinqlərində ön sıralarda yer alan Heydər Əliyev Beynəlxalq Hava Limanı hər gün minlərlə sərnişini qəbul etməklə yanaşı, ölkənin beynəlxalq hava qovşağı kimi fəaliyyət göstərir. Azərbaycanın mülki aviasiyasının uğurlarından danışarkən AZAL-ın fəaliyyətini xüsusi qeyd etmək lazımdır. Şirkət müasir təyyarələrdən ibarət parkı, təhlükəsizlik standartlarına ciddi riayət etməsi, yeni istiqamətlərin açılması və xidmət keyfiyyətinin daim yüksəldilməsi sayəsində regionun aparıcı hava yollarından birinə çevrilib.

Son illərdə ölkənin müxtəlif bölgələrində yeni hava limanlarının tikilməsi və mövcud hava limanlarının yenidən qurulması nəticəsində Azərbaycanın nəqliyyat xəritəsi əhəmiyyətli dərəcədə dəyişib. Xüsusilə, Qarabağ və Şərqi Zəngəzur iqtisadi rayonlarında inşa edilən müasir hava limanları həmin ərazilərin sosial-iqtisadi inkişafına yeni nəfəs gətirməklə yanaşı, regionun beynəlxalq nəqliyyat sisteminə inteqrasiyasını daha da sürətləndirib. Bu gün Azərbaycan səmasında təyyarələrin təhlükəsiz şəkildə hərəkət etməsi, ölkənin hava məkanının beynəlxalq tranzit marşrutları üçün cəlbedici istiqamətə çevrilməsinə şərait yaradır. Hava nəqliyyatının iqtisadiyyatın müxtəlif sahələrinə müsbət təsir göstərməsi onu deməyə əsas verir ki, Azərbaycan mülki aviasiyası gələcəkdə də inkişaf tempini qoruyaraq regionun ən güclü aviasiya mərkəzlərindən biri statusunu daha da möhkəmləndirəcək.

2 İyun münasibətilə bütün mülki aviasiya işçilərini təbrik edir, onlara məsuliyyətli fəaliyyətlərində yeni uğurlar, təhlükəsiz uçuşlar və daim açıq səma arzulayırıq. Səmanın etibarlı keşikçiləri olan bu insanların peşəkarlığı və zəhməti sayəsində üfüqlər daha yaxın, yollar isə daha təhlükəsizdir.

Yeganə BAYRAMOVA

Paylaş:

Baxılıb: 556 dəfə