Sərhədlərimiz etibarlı qorunur

Bakı:

26 °C

52 %

4 m/s

Əlaqə

AZ RU EN

Ana səhifə / YAP xəbərləri / Sərhədlərimiz etibarlı qorunur

Sərhədlərimiz etibarlı qorunur

05.02.2013 [01:14]

YAP Nəsimi rayon təşkilatı və partiyanın Gənclər Birliyinin birgə təşəbbüsü ilə DSX-nin hərbi hissəsində görüş keçirilib
2 fevral - Gənclər Günü münasibətilə Yeni Azərbaycan Partiyasının (YAP) Nəsimi rayon təşkilatı və partiyanın Gənclər Birliyinin birgə təşəbbüsü ilə Dövlət Sərhəd Xidmətinin Xəzər rayonu Türkan qəsəbəsində yerləşən N saylı hərbi hissəsində sərhədçilərlə görüş keçirilib. Hərbi hissənin rəis müavini Rza Rzayev gəncləri bayram münasibətilə təbrik edib. R.Rzayev Azərbaycanın dövlət sərhədlərinin etibarlı şəkildə qorunduğunu bildirib. O qeyd edib ki, Azərbaycan xalqı sərhədçilərə əminliklə güvənə bilər: “Biz Vətənimizin keşiyində ləyaqətlə dayanmışıq. Bundan sonra da öz üzərimizə düşən vəzifələri layiqincə yerinə yetirməyə çalışacağıq”.
Tədbirdə çıxış edən YAP Gənclər Birliyinin sədri Seymur Orucov Azərbaycan sərhədçilərinə, hərbi hissənin şəxsi heyətinə fəaliyyətlərində uğurlar arzulayıb. Vətənin keşiyində dayanmağı çox şərəfli və məsuliyyətli iş kimi dəyərləndirən S.Orucovun sözlərinə görə, hərbi xidmətdə olanların böyük əksəriyyəti gənclərdən ibarətdir. YAP Gənclər Birliyinin sədri Azərbaycan gənclərinin torpaqlarımızı hər an işğaldan azad etməyə hazır olduqlarını deyib. “Biz çox sevinirik ki, Ulu öndər Heydər Əliyevin müəyyənləşdirdiyi gənclər siyasəti Prezident İlham Əliyev tərəfindən uğurla davam etdirilir. Mən deyərdim ki, cənab Prezident tərəfindən həyata keçirilən gənclər siyasəti yeni mərhələsini yaşayır. Azərbaycan dövləti sürətli inkişaf dövrünü yaşayır və bu inkişaf təbii ki, gənclər üçün yeni imkanlar açır. Dövlətimizin siyasətində gənclər məsələləri mühüm yer tutur. Yəni, Azərbaycanın maliyyə-iqtisadi imkanları artdıqca, bütün sahələrin inkişafına kapital qoyulur və bu, çox müsbət nəticələr verir. Təbii ki, gənc nəsil bu prosesdən kənarda qalmayıb və gəncliyin inkişafı, yüksək intellektli, vətənpərvər gəncliyin yetişməsi üçün çox əhəmiyyətli layihələr həyata keçirilir. Bu gün ölkəmizdə gənclər siyasəti dövlət siyasətinin mühüm tərkib hissəsinə çevrilib. Azərbaycan gəncləri ictimai həyatın bütün bölmələrində aktiv fəaliyyətləri ilə seçilir, siyasi, iqtisadi, humanitar, sosial tədbirlərin həyata keçirilməsində mühüm rol oynayırlar. Cənab Prezident tərəfindən ölkədə həyata keçirilən gənclər siyasəti gənclərin bütün təbəqələrinin hərtərəfli inkişafını, ölkənin ictimai-siyasi həyatında onların yaxından iştirakını təmin etməkdədir” - deyə, S.Orucov vurğulayıb.
Çıxış edən YAP Nəsimi rayon təşkilatı Gənclər Birliyinin sədri Sərraf Hüseynov belə tədbirlərin davamlı olduğunu deyib. Onun sözlərinə görə, partiyanın Nəsimi rayon təşkilatı mütəmadi olaraq hərbi hissələrə gedərək əsgər və zabitlərlə görüşür. S.Hüseynov vətənin keşiyində dayanan hərbçilərə hər zaman mənəvi dəstəyin göstərilməsinin zəruri olduğunu vurğulayıb.
Daha sonra tədbirdə YAP Gənclər Birliyinin üzvləri olan sənət adamları Fidan Hüseynova və Alim Məmmədovun ifasında musiqi proqramı təqdim olunub. Eyni zamanda, Yeni Azərbaycan Partiyası Gənclər Birliyi tərəfindən xidmətdə fərqlənən hərbi qulluqçular mükafatlandırılıb.
YAP Gənclər Birliyinin üzvləri, həmçinin, Dövlət Sahil Mühafizə Xidmətinin qərargahı, muzeyi, tədris mərkəzi və ən müasir texnika ilə təchiz edilmiş müşahidə mərkəzi ilə tanış olublar.
Nardar BAYRAMLI

Paylaş:

Baxılıb: 1503 dəfə