18 min məcburi köçkün içməli su ilə təmin ediləcək

Bakı:

25 °C

66 %

1 m/s

Əlaqə

AZ RU EN

Ana səhifə / Sosial / 18 min məcburi köçkün içməli su ilə təmin ediləcək

18 min məcburi köçkün içməli su ilə təmin ediləcək

20.12.2011 [21:08]

Biləsuvarda Cəbrayıl rayonundan olan məcburi köçkün ailələri üçün salınan şəhərcikdə 6 qəsəbənin içməli su təchizatının yaxşılaşdırılması layihəsi başa çatdırılıb
Məlum olduğu kimi, Prezident İlham Əliyevin tapşırıq və göstərişlərinə əsasən, ölkəmizdə qaçqın və məcburi köçkünlərin problemlərinin həlli, həmçinin, onların fasiləsiz təbii qaz, elektrik enerjisi və içməli su ilə təmil edilməsi üçün lazımi addımlar atılır, bu istiqamətdə çeşidli layihələr həyata keçirilir. Bunlardan biri də cəbrayıllı məcburi köçkünlər üçün Biləsuvar rayonunda salınmış altı qəsəbənin içməli su təchizatının yaxşılaşdırılması layihəsidir.
Dekabrın 16-da sözügedən layihənin başa çatdırılması münasibətilə mərasim keçirilib. Mərasimdən öncə “Birləşmiş sukanal” MMC-nin sədri Etibar Məmmədov layihə barədə qonaqlara ətraflı məlumat verib. Qeyd edilib ki, “Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı”nın tərkib hissəsi olan Biləsuvar rayonu ərazisində Cəbrayıldan olan məcburi köçkünlər üçün salınmış 6 qəsəbədə su təchizatı sistemlərinin yenidən qurulması layihəsi üzrə işlərə 2011-ci ilin mayından başlanılıb. Layihəyə uyğun olaraq sözügedən qəsəbələrdə yaşayan məcburi köçkünlərin içməli su ilə təminatının əsaslı şəkildə yaxşılaşdırılması üçün 12 kilometrə yaxın magistral, 89 kilometr uzunluqda isə qəsəbədaxili su xətləri çəkilib.
Daha sonra mərasimin rəsmi hissəsi başlayıb. Tədbirdə çıxış edən Cəbrayıl rayon İcra Hakimiyyətinin başçısı Mahmud Quliyev bildirib ki, layihənin əsas məqsədi yurd-yuvalarından didərgin düşmüş soydaşlarımızın şəraitinin daha da yaxşılaşdırılmasıdır.
çıxış edən “Azərsu” Açıq Səhmdar Cəmiyyətinin sədri Qorxmaz Hüseynov öncə bildirib ki, əhalinin, o cümlədən, qaçqınların və məcburi köçkünlərin fasiləsiz içməli su ilə təmin olunması məsələsi daima Prezident İlham Əliyevin diqqət mərkəzindədir: “Azərsu” ASC olaraq biz cənab Prezidentin bu istiqamətdəki tövsiyyə və tapşırıqlarına əməl edilməsi üçün var gücümüzlə çalışırıq”.
Konkret olaraq başa çatan layihəyə gəlincə isə Q.Hüseynov “bu layihə çərçivəsində davamlı və keyfiyyətli su təchizatı üçün 6 qəsəbənin hər birində tutumu 100 kubmetr olan su anbarı, 18 su nasosu və 6 vakuum nasosu olmaqla, nasosxana inşa edilib. Bununla da, 2598 ailə, yəni 18 min məcburi köçkün, həmçinin, ərazidə olan sosial-mədəni kommunal və sair obyektlər içməli su ilə təmin ediləcəklər. Bütün bunlar Prezident İlham Əliyevin qaçqın və məcburi köçkünlərə olan xüsusi diqqət və qayğısının nəticəsidir” deyib.
Mərasimdə çıxış edən Baş nazirin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov diqqətə çatdırıb ki, əsası ümummilli lider Heydər Əliyev tərəfindən qoyulmuş qaçqın və məcburi köçkünlərin sosial şəraitinin yaxşılaşdırılması siyasəti hazırda Prezident İlham Əliyev tərəfindən uğurla davam etdirilir: “Əhalinin sosial qayğıya ən çox ehtiyacı olan təbəqəsini təşkil edən qaçqın və məcburi köçkünlərin sosial infrastruktur təminatının yaxşılaşdırılması, onların ən müasir kommunal xidmət növləri ilə təchiz olunmuş yaşayış evləri ilə təmin edilmələri dövlətin sosial siyasətinin başlıca hədəflərindəndir. Prezident İlham Əliyev qaçqın və məcburi köçkün problemini ölkədə bir nömrəli məsələ hesab edir. Qısa müddətdə 6 qəsəbənin su təminatı əsaslı surətdə yaxşılaşdrılıb. Artıq su təminatında heç bir problem yoxdur”.
Millət vəkilləri Astan Şahverdiyev və Ayaz Orucovun da qatıldıqları mərasimdə çıxış edən qəsəbə sakinləri “Azərsu” ASC tərəfindən 6 qəsəbənin içməli su təchizatının yaxşılaşdırılması istiqamətində həyata keçirilmiş işləri yüksək qiymətləndirib, qaçqın və məcburi köçkünlərin sosial rifah halının yaxşılaşdırılması istiqamətində atılan məqsədyönlü addımlara görə, dövlətimizin başçısı İlham Əliyevə minnətdarlıqlarını bildiriblər.
Qeyd edək ki, “Azərsu” ASC Füzuli, Ağcabədi və Ağdam rayonlarında da məcburi köçkünlərin içməli su təchizatının yaxşılaşdırılması istiqamətində işlər görür.
Nadir AZƏRİ

Paylaş:

Baxılıb: 1533 dəfə