“Sovetski”də inventarlaşdırma işləri davam edir

Bakı:

22 °C

65 %

7 m/s

Əlaqə

AZ RU EN

Ana səhifə / Sosial / “Sovetski”də inventarlaşdırma işləri davam edir

“Sovetski”də inventarlaşdırma işləri davam edir

01.05.2014 [09:10]

Səməd İslamov: Bu günə qədər 674 razılaşma protokolu əldə olunub, 646 nəfərin isə bank hesabına vəsait köçürülüb
Ölkəmizdə həyata keçirilən geniş infrastruktur layihələri, respublikamızda şəhərsalma sahəsində görülən işlər Bakının inkişafına və müasirləşməsinə şərait yaradıb. Bu gün milli memarlıq ənənələrinə sadiq qalaraq müasir üslubda həyata keçirilən həmin layihələr çərçivəsində yeni parklar, xiyabanlar salınır, binalar inşa olunur.
Elə Bakının “Sovetski” adlanan ərazisində nəzərdə tutulan yenidənqurma və abadlıq işləri də məhz şəhərimizin müasir görkəminə əlavə gözəllik qatacaq. Artıq bununla bağlı müəyyən layihələr, fikir və təkliflər mövcuddur.
Hazırda isə ərazidə inventarlaşdırma işləri uğurla davam etdirilir.
Yasamal rayon İcra Hakimiyyəti başçısının müavini Səməd İslamov bildirib ki, “Sovetski” kimi tanınan ərazidəki sökülən evlərin sahiblərinə kompensasiya verilməsi dövlət tərəfindən müəyyən olunmuş qaydada həyata keçirilir. Onun sözlərinə görə, bir müddət əvvəl Köçürmə Komissiyası yeni müraciətlərə baxıb və ümumilikdə, “Sovetski” adlanan ərazidən köçmək istəyən ailələrin sayı 900-ə çatıb: “Bu günə qədər 674 razılaşma protokolu əldə olunub, 646 nəfərin isə bank hesabına vəsait köçürülüb. 56 mənzil isə sökülüb. Bu gün insanlar bizə müraciət edirlər. Bu müraciətlərlə bağlı olaraq əgər biz əvvəllər komissiyanın iclasını həftədə bir dəfə keçirirdiksə, artıq həftədə 3 dəfə komissiya üzvləri toplaşır və daxil olan ərizələri nəzərdən keçirirlər. Hər iclasımızda təxminən 60-a yaxın belə müraciətə baxılır ki, bu da həftəyə təxminən 200 müraciət deməkdir. Ümumilikdə isə söküntü ərazisinə düşən 2860 ünvanda daşınmaz əmlak obyektlərində dəqiq ölçü işləri aparılıb”.
Bəzi qüvvələrin bu məsələdən sui-istifadə edərək süni narazılıq və ajiotaj yaratmaq istədiklərini bildirən Səməd İslamov onların səylərinin əbəs olduğunu qeyd edib: “Dövlətimizin məqsədi həmin ərazidə gözəl və müasir istirahət mərkəzləri, yol qovşaqları yaratmaqdır. Heç bir vətəndaşın evindən məcburi şəkildə çıxarılmasından söhbət gedə bilməz. Kim dövlətin onlara təqdim etdiyi bu şərtlərlə razıdırsa, gəlir, öz mənzilini satmağa razılıq verdiyini bildirir. Hər dəfə həmin ərazidə yaşayan insanlarla görüşümüz zamanı bildiririk ki, onları kimsə zorla burdan köçürməyəcək. O insanlar ki, öz razılıqları ilə rəsmi ərizə yazıb müraciət edirlər, biz onların ərizələrinə baxırıq və dəyərləndiririk. Bizə müraciət edənlərin sayı həddindən artıq çoxdur. Təbii ki, bu ərazidə yaşayan insanlar da istəyirlər ki, geniş evlərdə, gözəl təmir olunmuş mənzillərdə yaşasınlar. Düşünürəm ki, bu ərazidə salınacaq yeni parklar uşaqların, yaşlı insanların daha çox sevincinə səbəb olacaq. Yaradılacaq müasir infrastruktur, salınacaq geniş və abad yollar, yeraltı keçidlər şəhərimizin gözəlləşməsinə töhfə verəcək”.
Oktay

Paylaş:

Baxılıb: 1248 dəfə