Antalya Diplomatiya Forumu...

Bakı:

25 °C

57 %

6 m/s

Əlaqə

AZ RU EN

Ana səhifə / Siyasət / Antalya Diplomatiya Forumu...

Antalya Diplomatiya Forumu...

15.03.2022 [10:17]

Sülhün təmin edilməsində mühüm platformaya çevrilməkdədir

Tədbir dünyanın əksər dövlətlərinin qarşılıqlı müzakirə aparması üçün fürsət yaratdı

Pərviz SADAYOĞLU

Martın 11-dən 13-nə kimi Türkiyənin Antalya şəhərində keçirilən “Diplomatiya Forumu” mühüm nəticələrlə yadda qaldı. Xatırladaq ki, artıq ikinci dəfə baş tutan foruma 17 prezident və baş nazir, 80 nazir, 39 beynəlxalq təşkilat nümayəndəsi başda olmaqla 75 ölkədən nümayəndə qatılıb. “Diplomatiyanı yenidən quraq” devizi altında baş tutan tədbirdə dünyanı narahat edən bir sıra problemlərin diplomatik yolla həlli, davamlı sülhün təminində diplomatiyanın rolu kimi məsələlər müzakirə obyekti olub.

Yeni Azərbaycan Partiyası nümayəndə heyətinin üzvü qismində forumda iştirak etmiş Milli Məclisin deputatı Ramil Həsən tədbirlə bağlı təəssüratlarını qəzetimizə bölüşüb. O bildirib ki, 75 ölkədən 3 mindən artıq iştirakçının qatıldığı bu forum olduqca mühüm və geniş platformaya çevrilib. Tədbirdə diplomatiya, strategiya ilə bağlı məsələlərin müzakirə olunduğunu diqqətə çatdıran R.Həsən bilavasitə Rusiya ilə Ukrayna arasındakı hərbi qarşıdurmanın forumun əsas müzakirə predmetlərindən olduğunu deyib: “Üç gün davam edən müzakirələrdən biri, hətta ən əsaslarından biri məhz Rusiya ilə Ukrayna arasındakı hərbi gərginlik məsələsi oldu. Forum çərçivəsində Ukrayna və Rusiya XİN rəhbərləri də qardaş Türkiyənin vasitəçiliyi ilə münaqişə başlayandan bu yana ilk dəfə canlı təmasda oldular, danışıqlar apardılar. Forumun açılış mərasimində çıxış edən Türkiyə rezidenti Rəcəb Tayyib Ərdoğan, Türkiyə XİN rəhbəri Mövlud Çavuşoğlu dünyada baş verən kataklizmlər, konfliktlər, onların yaratdığı böhranlar və fəsadlar haqda fikirlərini tədbir iştirakçıları ilə bölüşdülər. Forum bir çox məsələlərin müzakirəsini özündə ehtiva edirdi. Antalya forumu effektiv bir platforma kimi dünyanın əksər dövlətlərinin qarşılıqlı müzakirə aparması üçün fürsət yaratdı. Xüsusilə, qlobal pandemiyadan sonra bu, ilk belə fürsət idi. Dünya dövlətləri regional və ya qlobal layhələrlə bağlı danışıqlar aparmaq imkanları qazandılar”.

Millət vəkili Antalya diplomatik forumunda Yeni Azərbaycan Partiyasının da yüksək səviyyədə təmsil olunduğunu diqqətə çatdırıb. “Partiyamızı forumda YAP Sədrinin müavini - Mərkəzi Aparatın rəhbəri Tahir Budaqovun rəhbərlik etdiyi nümayəndə heyəti təmsil edirdi. Tədbir çərçivəsində Tahir Budaqovun Türk Dövlətləri Təşkilatının Ağsaqqallar Şurasının sədri, Türkiyənin Ədalət və İnkişaf Partiyası Sədrinin birinci müavini Binəli Yıldırım ilə görüşü baş tutdu. Bu görüşdə iki qardaş ölkənin hakim partiyaları arasında imzalanmış əməkdaşlıq protokolunda nəzərdə tutulan müddəaların icrası, perspektivdə olan məsələlər ətrafında faydalı müzakirələr aparıldı. Eləcə də, gələcək əməkdaşlıqla bağlı fikir mübadiləsi baş tutdu. Antalya Diplomatiya Forumu çərçivəsində “Parlament diplomatiyası” mövzusunda keçirilən dəyirmi masada Azərbaycan geniş tərkibdə iştirak etdi. Çıxışlarda ənənəvi diplomatiyanı tamamlayan parlament diplomatiyası haqqında mühüm fikir mübadilələri aparıldı. Parlamentlər arasında ikitərəfli və çoxistiqamətli əməkdaşlıq əlaqələri, parlament diplomatiyasının inkişafı baxımından mühüm amil kimi dəyərləndirildi”, - deyən millət vəkili onu da əlavə edib ki, Antalya Diplomatiya Forumu gələcək dövr üçün sülhün və təhlükəsizliyin təmini, eləcə də problemlərin danışıqlar yolu ilə həllinin tapılması baxımından mühüm əhəmiyyət daşıyır.

Paylaş:

Baxılıb: 751 dəfə