Sankt-Peterburqda MDB dövlət başçılarının qeyri-formal sammiti keçiriləcək

Bakı:

18°C

72%

12m/s

Əlaqə

AZ RU EN

Ana səhifə / Gündəm / Sankt-Peterburqda MDB dövlət başçılarının qeyri-formal sammiti keçiriləcək

Sankt-Peterburqda MDB dövlət başçılarının qeyri-formal sammiti keçiriləcək

05.06.2009 [09:19]

Sammitdə MDB-nin effektiv çoxtərəfli əməkdaşlıq formatının yaradılması ilə bağlı konsepsiyanın müzakirəsi nəzərdə tutulur
Rusiyanın Sankt-Peterburq şəhərində MDB dövlət başçılarının qeyri-formal sammiti keçiriləcək. Sammitdə Rusiya prezidenti Dmitri Medvedevin və digər MDB-yə üzv olan digər ölkələrin dövlət başçılarının iştirakı nəzərdə tutulub. Tədbirdə MDB dövlətlərinin hökumət üzvlərindən bəzilərinin çıxışı da istisna olunmur. Ənənəvi olaraq hər il keçirilən və “Rus Davosu” adlandırılan sammitdə birliyə daxil olan ölkələrin tanınmış şirkətlərinin və banklarının da iştirakı planlaşdırılır. ümumiyyətlə, həm də Beynəlxalq İqtisadi Forum adını qazanmış Sankt-Peterburq sammitində qlobal məsələlər, xüsusilə də beynəlxalq maliyyə böhranı, enerji təhlükəsizliyi, bəzi ölkələrdə yaranmış ərzaq qıtlığı problemi, iqlim dəyişiklikləri və digər istiqamətlər üzrə müzakirələrin aparılması nəzərdə tutulur. Xatırladaq ki, sonuncu dəfə bu cür qeyri-formal sammit ötən il iyun ayının 6-da keçirilib.
Bir çox ekspertlər Sankt-Peterburq forumunu hətta aprel ayında Londonda keçirilmiş “Böyük iyirmiliy”in sammitinin davamı kimi də qiymətləndirirlər. Onların qənaətinə görə, MDB-də maliyyə və valyuta böhranlarının davam etməsi, iqtisadi geriləmə hallarının müşahidə olunması bu gün başlıca qlobal problemlərdəndir və bununla bağlı əhatəli kompleks tədbirlər görülməlidir. MDB dövlətlərinin birgə iqtisadi inkişaf strategiyası, eyni zamanda, Avropa və Asiya ölkələrinin böhrandan çıxması üçün mühüm rol oynaya bilər. MDB regionu dövlətləri ərzaq təhlükəsizliyi, nəqliyyat-kommunikasiya və enerji resurslarının diversifikasiyasında strateji mövqeyə malik olduğundan Avropa ölkələri bu qurumun təklif etdiyi antiböhran paketinin reallaşmasına dəstək göstərməlidir. Bəzi ekspertlərin fikrincə, böyük dövlətlərin maraqları böhrana qarşı konseptual iqtisadi mexanizmlərin hazırlanaraq həyata keçirilməsinə mane olur. Buna görə də Rusiyanın və MDB-nin inkişaf etmiş digər dövlətlərinin böhranla mübarizəyə dair təklif etdiyi müddəalar Avropa İttifaqı və beynəlxalq maliyyə institutları tərəfindən qəbul olunmalıdır.
MDB İcraiyyə Komitəsi sədrinin birinci müavini Vladimir Qarkun bildirib ki, Birlik çərçivəsində daxili bazarın maksimum dərəcədə qorunması, bank vəsaitlərinin perspektivli biznes-layihələrinin sərmayələşdirilməsinə yönləndirilməsi, hətta MDB-yə üzv ölkələrin sərhədlərindən xaricə kapital ixracının qarşısının alınması və sair təklifləri nəzərdə tutan proqramın hazırlanması lazımdır. Bu proqram, həmçinin, dünya bazarlarında baş verən spekulyasiyaların ləğvini, maliyyə bazarlarına nəzarətin gücləndirilməsini, maliyyə inamının bərpa olunması üçün bankların likvid fəaliyyətinin artırılmasını, beynəlxalq ticarətin stimullaşdırılmasını, ticarətdə mövcud olan proteksionizm siyasətinin qarşısının alınmasını və digər istiqamətləri də özündə əks etdirir. V.Qarkun MDB daxilində iqtisadi canlanma yaratmaq üçün iri banklar tərəfindən maliyyə axınlarının gücləndirilməsi ilə bağlı qərarın qəbul edilməsini də vacib saydığını diqqətə çatdırıb. O, həmçinin, Birlik daxilində vergidən yayınma hallarına qarşı birgə mübarizə tədbirlərinin həyata keçirilməsini də zəruri sayır. Vladimir Qarkun deyib ki, böhranın doğurduğu neqativ hallara qarşı Birlik dövlətləri tərəfindən birgə addımların atılması məqsədəuyğundur. MDB dövlətləri dünya iqtisadi-maliyyə böhranının öyrənilməsi və onun arxada qoyulması ilə bağlı müvafiq təkliflərin hazırlanması ilə məşğul olmalıdır. MDB İcraiyyə Komitəsinin birinci müavini həmin təkliflərin Sankt-Peterburq sammitində müzakirəyə çıxarılacağını istisna etməyib.
Rusiyanın “Qazprom” şirkətinin sədri Aleksey Miller isə sammitqabağı rus KİV-lərinə açıqlamasında bildirib ki, MDB ölkələrinin qaz və neft marşrutlarının birləşdirilməsi üçün ciddi addımların atılması vacibdir. Bu layihələri gerçəkləşdirmək üçün regionun zəngin enerji təchizatçıları olan dövlətlərinin dəstəyinə ehtiyac var. Onun fikrincə, Azərbaycan və Türkmənistanın enerji marşrutlarının diversifikasiyası ilə bağlı yürütdüyü siyasət bu cür enerji dəhlizlərinin yaradılmasına imkan verir.
Sankt-Peterburq Beynəlxalq İqtisadi Forumunda MDB regionunda ən iri aqrar-sənaye kompleksinin yaradılmasını nəzərdə tutan “Yaşıl dəhliz” layihəsi ilə bağlı təkliflərin müzakirə ediləcəyi də güman olunur. Bu layihə birbaşa kənd təsərrüfatı məhsullarının qarşılıqlı ticarətinin yaxşılaşdırılmasını əhatə edir. Bundan başqa, MDB dövlətlərinin nəqliyyat-kommunikasiya sahəsində birgə layihələrinin də sammitdə müzakirə olunacağı istisna edilmir. Burada əsas məqsəd dəmir yolu sahəsində bu quruma üzv olan ölkələrin əməkdaşlığının daha da genişləndirilməsini, həmçinin, 2010-cu ilədək razılaşdırılmış nəqliyyat siyasəti konsepsiyasının ən mühüm hədəflərini müzakirə etməkdir. MDB və Baltikyanı ölkələrin nəqliyyat qurumları arasında əlaqələr, birgə layihələr barədə fikir mübadiləsinin aparılması da nəzərdə tutulub. Azərbaycanın da müəllifi olduğu Şimal-Cənub layihəsi ümumilikdə MDB ölkələri ilə qarşılıqlı nəqliyyat əlaqələrinin həyata keçirilməsi ilə yanaşı, Avropa ilə Asiyanı birləşdirəcək ən böyük layihələrin gerçəkləşdiyi strateji məkan kimi xüsusi əhəmiyyət daşıyır.
Sankt-Peterburq sammitində MDB-nin gələcək inkişafı və fəaliyyətinin təkmilləşdirilməsi, Birlik ölkələrinin miqrasiya siyasəti kimi strateji əhəmiyyət kəsb edən məsələlərin də müzakirəsi nəzərdə tutulur. Bu məqsədlə MDB çərçivəsində təhlükəsizliyin təmin edilməsi, humanitar sahədə əməkdaşlığın gücləndirilməsi, Birliyin iqtisadi inkişaf strategiyasının formalaşdırılması, nəqliyyat sahəsində əməkdaşlığın möhkəmləndirilməsi və ərzaq təhlükəsizliyinin təmin edilməsi ilə bağlı tədbirlər həyata keçiriləcək. Eyni zamanda, MDB-nin gələcək inkişaf konsepsiyasının hazırlanması nəzərdə tutulur. Bir sözlə, MDB-nin effektiv çoxtərəfli əməkdaşlıq formatının yaradılması üçün səylərin artırılması sammitin strateji məqsədlərindən biridir.
ELBRUS CƏFƏRLİ

Paylaş:

Baxılıb: 1252 dəfə