Qadın hüquqları uğrunda mübarizənin rəmzi

Bakı:

10 °C

93 %

2 m/s

Əlaqə

AZ RU EN

Ana səhifə / Arxiv / Qadın hüquqları uğrunda mübarizənin rəmzi - 8 Mart

Qadın hüquqları uğrunda mübarizənin rəmzi - 8 Mart

06.03.2026 [22:08]

Hər il mart ayının 8-də dünyada qeyd olunan Beynəlxalq Qadınlar Günü qadınların cəmiyyətin inkişafında oynadığı mühüm rolu, onların hüquqları uğrunda apardıqları mübarizəni və nailiyyətlərini əks etdirən əlamətdar gündür. Bu gün qadınların sosial, iqtisadi, siyasi və mədəni sahələrdə qazandıqları uğurların qeyd olunması ilə yanaşı, gender bərabərliyinin təmin edilməsi istiqamətində görülən işlərin də xatırlanmasına xidmət edir.

8 Mart gününün tarixi XX əsrin əvvəllərinə gedib çıxır. 1908-ci ildə ABŞ-da minlərlə qadın işçi daha yaxşı əmək şəraiti, əməkhaqqının artırılması və seçki hüququnun verilməsi tələbi ilə nümayişlər keçirmişdir. Bu hərəkat sonradan qadın hüquqları uğrunda beynəlxalq mübarizənin əsas mərhələlərindən birinə çevrilmişdir.

1910-cu ildə Danimarkanın paytaxtı Kopenhagen şəhərində keçirilən Beynəlxalq Sosialist Qadınlar Konfransında alman ictimai xadimi Klara Setkin tərəfindən qadınların hüquqlarının müdafiəsi məqsədilə xüsusi bir günün təsis edilməsi təklif olunmuşdur. Bu təşəbbüs böyük dəstək qazanmış və sonrakı illərdə bir çox ölkələrdə qeyd olunmağa başlanmışdır.

1975-ci ildə isə Birləşmiş Millətlər Təşkilatı tərəfindən 8 Mart rəsmi şəkildə beynəlxalq səviyyədə tanınmış və dünya ölkələrində geniş şəkildə qeyd olunmağa başlamışdır.

Qadınlar hər bir cəmiyyətin sosial və mənəvi inkişafında mühüm rol oynayırlar. Onlar ailənin dayağı, gələcək nəslin tərbiyəçisi olmaqla yanaşı, elm, təhsil, səhiyyə, iqtisadiyyat, siyasət və digər sahələrdə də fəal iştirak edirlər. Müasir dövrdə qadınların dövlət idarəçiliyində, elmi fəaliyyətlərdə, biznes və ictimai həyatda əldə etdikləri uğurlar cəmiyyətin inkişafına böyük töhfə verir.

Azərbaycanda da 8 Mart xüsusi ehtiramla qeyd olunan bayramlardan biridir. Ölkəmizdə qadınların hüquqlarının qorunması və onların ictimai-siyasi həyatda fəal iştirakının təmin edilməsi dövlət siyasətinin mühüm istiqamətlərindən biridir. Azərbaycan qadınları tarix boyu vətənpərvərlik, fədakarlıq və yüksək mənəvi keyfiyyətləri ilə seçilmiş, ölkənin inkişafına mühüm töhfələr vermişlər.

Bu gün Azərbaycan qadınları dövlət idarəçiliyində, təhsildə, səhiyyədə, mədəniyyətdə və digər sahələrdə uğurla fəaliyyət göstərir, ölkənin sosial-iqtisadi inkişafında mühüm rol oynayırlar.

8 Mart – Beynəlxalq Qadınlar Günü yalnız bayram kimi deyil, həm də qadınların hüquqlarının qorunmasının və gender bərabərliyinin təmin edilməsinin vacibliyini xatırladan mühüm gündür. Bu gün qadınlara göstərilən hörmət və ehtiramın ifadəsi olmaqla yanaşı, onların cəmiyyətin inkişafındakı əvəzsiz rolunu bir daha təsdiq edir.

Qadınlar cəmiyyətin mənəvi dayağı, ailənin sütunu və gələcəyin formalaşdırıcılarıdır. Buna görə də onların əməyinin, zəhmətinin və fədakarlığının qiymətləndirilməsi hər zaman xüsusi əhəmiyyət daşıyır.

Eyni zamanda qadınların ailə institutunun möhkəmləndirilməsində, milli-mənəvi dəyərlərin qorunub saxlanılmasında və gənc nəslin sağlam ruhda tərbiyə olunmasında da əvəzsiz xidmətləri vardır. Ana adı insan həyatında ən müqəddəs anlayışlardan biri hesab olunur. Məhz anaların qayğısı, sevgisi və zəhməti sayəsində cəmiyyətin gələcəyi olan sağlam və vətənpərvər gənc nəsil formalaşır.

8 Mart– Beynəlxalq Qadınlar Günü münasibətilə bütün qadınları – anaları, müəllimləri və cəmiyyətin müxtəlif sahələrində çalışan fədakar xanımları səmimi qəlbdən təbrik edir, onlara möhkəm cansağlığı, xoşbəxtlik və gələcək fəaliyyətlərində uğurlar arzulayıram.

Seymur Fərhadlı

YAP Şahbuz rayon İcra Hakimiyyətinin əməkdaşı, YAP fəalı

Paylaş:

Baxılıb: 277 dəfə