Xəzər rayonunda “Qurtuluşun memarlıq izi” adlı tədbir keçirilib

Bakı:

14 °C

94 %

0 m/s

Əlaqə

AZ RU EN

Ana səhifə / YAP xəbərləri / Xəzər rayonunda “Qurtuluşun memarlıq izi” adlı tədbir keçirilib

Xəzər rayonunda “Qurtuluşun memarlıq izi” adlı tədbir keçirilib

13.06.2026 [16:21]

Xəzər Rayon İcra Hakimiyyəti və Yeni Azərbaycan Partiyası Xəzər rayon təşkilatı 15 iyun – Milli Qurtuluş Günü münasibətilə “Qurtuluşun memarlıq izi” mövzusunda birgə tədbir keçirib.
Tədbirdə Xəzər Rayon İcra Hakimiyyətinin başçısı Elşən Salahov, YAP Xəzər rayon təşkilatının sədri Namiq Əhmədov, Milli Məclisin İntizam komissiyasının sədri, millət vəkili Eldar İbrahimov, YAP Veteranlar Şurasının üzvü, tarix elmləri doktoru Dilarə Seyidzadə, YAP İdarə Heyətinin üzvü Rauf Əliyev, RİH başçısının müavinləri, RİH başçısı Aparatının əməkdaşları, hüquq-mühafizə orqanlarının həmçinin, idarə, müəssisə və təşkilatların rəhbərləri, şəhid ailələrinin üzvləri və qazilər, eləcə də rayon ictimaiyyətinin nümayəndələri və gənclər iştirak edib.
İlk olaraq tədbir iştirakçıları Ümummilli Lider Heydər Əliyevin abidəsini ziyarət edib, dahi şəxsiyyətin əziz xatirəsini dərin ehtiramla yad edərək abidə önünə gül dəstələri qoyublar.
Tədbir Azərbaycan Respublikasının Dövlət Himninin səsləndirilməsi və Ulu Öndər Heydər Əliyevin, eləcə də ölkəmizin ərazi bütövlüyü uğrunda canlarından keçmiş şəhidlərimizin əziz xatirələrinin bir dəqiqəlik sükutla yad edilməsi ilə başlayıb.
Öncə Milli Qurtuluş Gününün tarixi əhəmiyyətini, Ulu Öndər Heydər Əliyevin Azərbaycan dövlətçiliyinin qorunması və möhkəmləndirilməsi istiqamətində misilsiz xidmətlərini əks etdirən sənədli film nümayiş olunub.
Sonra rəsmi çıxışlar dinlənilib. Xəzər Rayon İcra Hakimiyyətinin başçısı Elşən Salahov çıxış edərək bildirib ki, 15 İyun 1993-cü il Azərbaycan tarixində dönüş nöqtəsi olmaqla ölkəmizin müstəqilliyinin qorunub saxlanılmasında, ictimai-siyasi sabitliyin təmin edilməsində və dövlət quruculuğunun möhkəmləndirilməsində mühüm rol oynayıb. Qeyd olunub ki, Ümummilli Lider Heydər Əliyevin xilaskarlıq missiyası nəticəsində Azərbaycan inkişaf və tərəqqi yoluna qədəm qoyub.
YAP Xəzər rayon təşkilatının sədri Namiq Əhmədov bildirib ki, Milli Qurtuluş Günü Azərbaycan xalqının yaddaşında dövlətçiliyin xilası, milli birliyin təntənəsi və müstəqilliyin qorunmasının rəmzi kimi yaşayır. 15 İyun 1993-cü ildə əsası qoyulan siyasi sabitlik və inkişaf kursu ölkəmizin müasir uğurlarının təməlini təşkil edir. Bu gün Azərbaycan tam bərpa olunmuş suverenliyi, güclü iqtisadi potensialı, müasir ordusu və artan beynəlxalq nüfuzu ilə regionun aparıcı dövlətlərindən biri kimi çıxış edir. Bütün bunlar bir daha təsdiq edir ki, Heydər Əliyevin müəyyən etdiyi strateji inkişaf yolu Azərbaycanın gələcəyinə işıq salan etibarlı siyasi xətt olaraq qalır. Bu siyasi kursun Prezident İlham Əliyev tərəfindən qətiyyətlə davam etdirilməsi ölkəmizin yeni uğurlar qazanmasına, milli maraqlarının daha etibarlı şəkildə qorunmasına və beynəlxalq mövqelərinin daha da möhkəmlənməsinə xidmət edir.
Daha sonra Eldar İbrahimov, Dilarə Seyidzadə, Rauf Əliyev və şəhid anası Reyhan Yusifzadə çıxışlarında Milli Qurtuluş Gününün Azərbaycan dövlətçiliyinin inkişafındakı müstəsna rolundan, Ulu Öndərin siyasi irsinin Prezident İlham Əliyev tərəfindən uğurla davam etdirilməsindən bəhs ediblər.
Natiqlər çıxışlarında vurğulayıblar ki, bu gün Azərbaycan güclü dövlət, qalib xalq kimi regionda və beynəlxalq aləmdə öz mövqeyini daha da möhkəmləndirir, əldə olunan bütün uğurların təməlində isə Ümummilli Lider Heydər Əliyevin müəyyən etdiyi inkişaf strategiyası dayanır.
Tədbirdə həmçinin YAP İdarə Heyətinin üzvü Rauf Əliyev 70 illik yubileyi və rayonun ictimai-siyasi həyatında müstəsna xidmətlərinə görə Xəzər Rayon İcra Hakimiyyətinin başçısının Fəxri Fərmanı ilə təktif olunub.
Rəsmi hissədən sonra tədbir bədii-musiqili proqramla davam edib.
Sonunda təşkilatçılar Milli Qurtuluş Gününün xalqımızın taleyində müstəsna əhəmiyyətə malik olduğunu bir daha vurğulayaraq iştirakçılara təşəkkür ediblər. Daha sonra Yeni Azərbaycan Partiyasının himni səsləndirilib və tədbir başa çatıb.

Paylaş:

Baxılıb: 568 dəfə