Elm millətin gələcəyidir

Bakı:

14 °C

67 %

4 m/s

Əlaqə

AZ RU EN

Ana səhifə / YAP xəbərləri / Elm millətin gələcəyidir

Elm millətin gələcəyidir

05.11.2025 [17:32]

Azərbaycan Milli Elmlər Akademiyasının (AMEA) 80 illik yubileyinə həsr olunmuş təntənəli yığıncaqda çıxış edən Prezident İlham Əliyev ölkəmizdə elmin inkişafı, alimlərə göstərilən diqqət və qayğı, eləcə də dövlətin bu sahəyə verdiyi strateji əhəmiyyət barədə əhatəli nitq söylədi. Dövlət başçısının çıxışı həm elmi ictimaiyyət, həm də bütövlükdə cəmiyyət üçün gələcəyə yönəlik mühüm mesajlar verdi.

Prezident İlham Əliyev çıxışında qeyd etdi ki, Azərbaycan elminin zəngin tarixi var və bu tarixdə AMEA-nın rolu misilsizdir. Akademiyanın fəaliyyət göstərdiyi səksən il ərzində Azərbaycan alimləri təkcə ölkə daxilində deyil, beynəlxalq miqyasda da mühüm nailiyyətlər əldə ediblər. Bu nailiyyətlər dövlətimizin elmə verdiyi dəyərin, alimlərə göstərilən etimadın bariz göstəricisidir.

Dövlət başçısı vurğuladı ki, bu gün Azərbaycan elmi yeni bir mərhələyə qədəm qoyur. Müstəqillik dövründə, xüsusilə də son illərdə elmi potensialın gücləndirilməsi, gənc tədqiqatçıların dəstəklənməsi, elmi nəticələrin praktiki tətbiqinə şərait yaradılması istiqamətində ardıcıl addımlar atılır. Prezident İlham Əliyev bildirdi ki, elmin inkişafı olmadan nə iqtisadi, nə texnoloji, nə də sosial tərəqqidən danışmaq mümkündür. Ona görə də Azərbaycan elminin modernləşdirilməsi, dünya elmi ilə inteqrasiyası dövlət siyasətinin prioritet istiqamətlərindən biridir.

Çıxışında ölkəmizdə həyata keçirilən “Elm və təhsil inteqrasiyası” siyasətinə də toxunan dövlət başçısı qeyd etdi ki, elmi araşdırmaların təhsil sistemi ilə vəhdətdə aparılması, gənclərin elmi fəaliyyətə cəlb olunması Azərbaycanın gələcək intellektual potensialının möhkəmlənməsinə xidmət edir. Prezident vurğuladı ki, bu gün gənc alimlər üçün yeni imkanlar yaradılır, innovasiya və texnologiyalara əsaslanan layihələrə dövlət dəstəyi artırılır.

AMEA-nın 80 illik yubileyi münasibətilə çıxış edən Prezident İlham Əliyev həmçinin Azərbaycanın elm xadimlərinə, alimlərə, tədqiqatçılara minnətdarlığını ifadə edərək onların milli dövlətçiliyimizin möhkəmlənməsi, cəmiyyətin tərəqqisi və müstəqilliyimizin qorunması işinə verdikləri töhfələri yüksək qiymətləndirdi. Dövlət başçısı dedi: “Elm xalqın düşüncə gücüdür. Elmi inkişaf etdirmədən müasir dünyada öz yerini qorumaq mümkün deyil. Azərbaycan elmi və alimləri qarşısında duran vəzifələr böyükdür və bu vəzifələrin öhdəsindən gəlmək üçün dövlət hər zaman onların yanındadır.”

Prezident İlham Əliyev AMEA-nın gələcək fəaliyyətinə dair də bir sıra mühüm tapşırıqlar verdi. O, xüsusilə vurğuladı ki, elmi nəticələrin iqtisadiyyatın real sektorunda tətbiqi, innovasiyaların istehsal sahələrinə ötürülməsi, texnopark və startap mühitinin inkişafı ölkənin rəqabət qabiliyyətini artıracaq əsas amillərdəndir.

Dövlət başçısının çıxışı bir daha göstərdi ki, Azərbaycan Respublikasında elmə dövlət səviyyəsində yüksək diqqət və qayğı mövcuddur. Prezident İlham Əliyevin rəhbərliyi ilə həyata keçirilən islahatlar nəticəsində elmi idarəetmənin təkmilləşdirilməsi, müasir texnologiyaların tətbiqi, beynəlxalq elmi əməkdaşlığın gücləndirilməsi istiqamətində mühüm addımlar atılır.

AMEA-nın 80 illik yubiley tədbiri bir daha sübut etdi ki, Azərbaycan elmi öz tarixi ənənələrinə sadiq qalmaqla, yeni dövrün tələblərinə uyğun şəkildə inkişaf edir. Prezident İlham Əliyevin bu tədbirdə səsləndirdiyi fikirlər elm və təhsilin gələcək inkişafına, milli kimliyimizin və intellektual potensialımızın möhkəmlənməsinə xidmət edən mühüm yol xəritəsidir.

Çingiz İbrahimov

YAP Göyçay rayon təşkilatının əməkdaşı

Paylaş:

Baxılıb: 351 dəfə