1 iyun - Uşaqları Beynəlxalq Müdafiə Günü Qaradağda təntənə ilə qeyd olunub

Bakı:

12 °C

54 %

12 m/s

Əlaqə

AZ RU EN

Ana səhifə / Sosial / 1 iyun - Uşaqları Beynəlxalq Müdafiə Günü Qaradağda təntənə ilə qeyd olunub

1 iyun - Uşaqları Beynəlxalq Müdafiə Günü Qaradağda təntənə ilə qeyd olunub

03.06.2014 [09:15]

Heydər Əliyev Fondunun dəstəyi ilə Qaradağ rayonu, Lökbatan qəsəbəsindəki “Qaradağ” şadlıq evində 1 iyun - Uşaqları Beynəlxalq Müdafiə Günü münasibəti ilə xüsusi qayğıya ehtiyacı olan, əlil və kimsəsiz uşaqlar üçün bayram şənliyi keçirilib. Tədbirdə Qaradağ rayon İcra Hakimiyyəti başçısı Süleyman Mikayılov, rayon İcra Hakimiyyətinin məsul işçiləri, Sağlamlıq imkanları məhdud olan uşaqlar üçün 9 saylı Xüsusi internat məktəbi, 39 nömrəli Kardiorevmotoloji Uşaq Sanatoriyası və “Müşfiq” Əlil Uşaqlara Yardım İctimai Birliyinin uşaqları iştirak ediblər.
Tədbiri giriş sözü ilə açan Qaradağ rayon İcra Hakimiyyəti başçısı Süleyman Mikayılov cəmiyyətimizin həssas və kövrək zümrəsi olan uşaqların ölkəmizdə daim yüksək qayğı, diqqət və nəvazişlə əhatə olunduqlarını bildirib. O, qeyd edib ki, Ümummilli lider Heydər Əliyev tərəfindən əsası qoyulmuş dövlət uşaq siyasəti ölkəmizdə uşaqların hərtərəfli və ahəngdar inkişafının təmin edilməsinə yönəlib: “İnkişaf yolu ilə irəliləyən Azərbaycanda tikilən tibb ocaqları, təhsil müəssisələri, idman-sağlamlıq kompleksləri uşaqların istifadəsinə verilir. Azərbaycan Respublikasının Prezidenti İlham Əliyevin 2008-ci il 22 dekabr tarixli Sərəncamı ilə 2009-cu ilin “Uşaq ili” elan edilməsi də Azərbaycan dövlətinin uşaqlara sonsuz qayğısının bariz təzahürü sayılmalıdır. Uşaq hüquqlarının qorunması istiqamətində həyata keçirilən çoxşaxəli təşəbbüslərin uğurla reallaşdırılmasında Heydər Əliyev Fondu da böyük işlər görür. Fondun təhsil və səhiyyənin bir sıra problemlərinin həlli, yeni məktəblərin inşası, körpələr evi və internat məktəblərinin əsaslı təmiri və yenidən qurulması prosesində yaxından iştirakı, Azərbaycanın gələcəyi olan uşaqlara yüksək qayğı nümunəsi olması, uşaqların intellektual inkişafı, onların yüksək mədəniyyətə malik sağlam insanlar kimi böyüyüb boya-başa çatması üçün mühüm əhəmiyyətə malik layihələr həyata keçirir”.
Daha sonra tədbirdə uşaqlar cizgi film qəhrəmanlarının, illuziyaçıların, klounların göstərdikləri nömrələri maraqla izləyiblər. Tədbir tanınmış incəsənət xadimlərinin çıxışları ilə davam edib. Tədbirdə iştirak edən hər bir uşağa Heydər Əliyev Fondu tərəfindən geyim dəstləri paylanıb.
Eyni zamanda, “Cırtdan” uşaq əyləncə parkında davam edən tədbir hər bir uşağın könlünü oxşayıb, onlara unudulmaz bayram sevinci bəxş edib. Körpələr pulsuz atraksionlardan istifadə edərək xoş anlar yaşayıblar. Tədbirdə iştirak edən hər bir uşaq diqqətdən kənar qalmayaraq müxtəlif növ hədiyyələr alıblar.

Paylaş:

Baxılıb: 1101 dəfə