Azərbaycan və Türkiyə Vətən müharibəsində qazanılan böyük Qələbənin sevincini birlikdə yaşayırlar

Bakı:

21 °C

74 %

5 m/s

AZ RU EN

Ana səhifə / Siyasət / Azərbaycan və Türkiyə Vətən müharibəsində qazanılan böyük Qələbənin sevincini birlikdə yaşayırlar

Azərbaycan və Türkiyə Vətən müharibəsində qazanılan böyük Qələbənin sevincini birlikdə yaşayırlar

15.06.2021 [08:43]

Rəcəb Tayyib Ərdoğanın Şuşaya səfərə gəlməsi Azərbaycanla Türkiyə arasındakı əlaqələrin qardaşlıq münasibətləri üzərində qurulduğunu bir daha nümayiş etdirir

Nəhayət, iki qardaş ölkə olan Azərbaycan və Türkiyə cəmiyyətlərinin çoxdan gözlədikləri an gəlib çatdı. Öncədən verilən məlumata görə, bu gün Türkiyə Prezidenti Rəcəb Tayyib Ərdoğan bizim hər birimiz üçün əziz olan Şuşaya səfər edəcək. Rəcəb Tayyib Ərdoğan ötən il 44 günlük Vətən müharibəsində işğaldan azad olunan Şuşaya səfər edən ilk xarici ölkə prezidentidir və bu, tamamilə təbiidir. Türkiyənin dövlət başçısının xarici ölkə liderləri arasında ilk olaraq Şuşaya səfərə gəlməyə tam mənəvi haqqı var. Bu səfər iki ölkə arasındakı əlaqələrin qardaşlıq münasibətləri üzərində qurulduğunu nümayiş etdirir. Artıq dəfələrlə sübut olunmuş bir həqiqətdir ki, Azərbaycan-Türkiyə münasibətləri dostluğun, qardaşlığın zirvə nöqtəsidir.

Azərbaycan və Türkiyə arasında əlaqələr bütün sahələrdə uğurla inkişaf edir

Azərbaycan və Türkiyə arasında qardaşlıq münasibətləri zəminində qurulan əlaqələr bütün sahələrdə uğurla inkişaf edir. İkitərəfli əlaqələrdən bəhs edərkən ölkələrimiz arasındakı siyasi dialoqun dinamik səciyyə daşıdığını xüsusi vurğulamaq lazımdır. İki ölkə liderləri bir-birlərinə “qardaşım” deyə xitab edirlər. Artıq yaxşı ənənə formalaşıb. Qarşılıqlı hörmətin və etimadın ifadəsi olaraq Azərbaycan Prezidenti dövlət başçısı seçildikdən sonra ilk səfərini, bir qayda olaraq, Türkiyəyə edir, eləcə də Türkiyə Prezidenti dövlət başçısı statusunda ilk səfərini respublikamıza reallaşdırır. Bu ənənə digər səviyyələrdə də davam etdirilir. Eyni zamanda, iki qardaş ölkənin rəhbərləri ikitərəfli və digər platformalarda davamlı olaraq görüşür və səmərəli təmaslar qururlar.

İki ölkə arasında digər sahələrdə əməkdaşlıq əlaqələri də məhz siyasi dialoqun yüksək səviyyəsinə adekvat olaraq inkişaf etdirilir. Bu gün ölkələrimiz arasında qarşılıqlı investisiya qoyuluşunu və ticarət dövriyyəsini artırmaq üçün möhkəm hüquqi baza mövcuddur. Belə ki, indiyədək Azərbaycanla Türkiyə arasında iqtisadi əməkdaşlığın perspektiv inkişafını özündə ehtiva edən bir sıra sənədlər imzalanıb. Hökumətlərarası Komissiyanın cari ilin fevralında Ankarada baş tutan son iclasında isə sənaye və texnologiya, enerji, müdafiə, mədəniyyət və turizm, nəqliyyat və kommunikasiya, kənd təsərrüfatı və qida təhlükəsizliyi, təhsil, gənclər və idman kimi sahələrdə əməkdaşlıq imkanları müzakirə edilib və bir sıra önəmli qərarlar qəbul olunub. Hökumətlərarası Komissiyanın iclasından sonra keçirilən mətbuat konfransında bildirildiyi kimi, COVID-19 pandemiyasının mənfi təsirlərinə baxmayaraq, Azərbaycan və Türkiyə arasında ikitərəfli ticarət əlaqələri 2020-ci ildə əvvəlki illə müqayisədə 14 faiz artaraq 4,6 milyard dollara çatıb. Ölkələrimiz qarşıya 2023-cü ilədək ticarət dövriyyəsinin həcmini 15 milyard dollara çatdırmaqla bağlı real hədəf qoyublar. Məlumat üçün bildirək ki, Türkiyə şirkətləri Azərbaycanda indiyədək 400-dən çox layihə həyata keçiriblər. Azərbaycanlı iş adamları da qardaş ölkədə yüksək fəallıq nümayiş etdirirlər. Hazırda Türkiyədə Azərbaycan kapitallı 2 minə yaxın şirkət fəaliyyət göstərir.

Qardaş ölkənin mənəvi-siyasi dəstəyi Vətən müharibəsində şanlı qələbəmizin təmin olunmasında mühüm rol oynadı

Azərbaycan ötən il sentyabrın 27-dən noyabrın 10-dək davam edən Vətən müharibəsində şanlı qələbə qazanaraq özünün ərazi bütövlüyünü təmin etdi. Bu qələbənin təmin olunmasına dost ölkələr də respublikamıza mənəvi-siyasi dəstək göstərməklə öz töhfələrini verdilər. Bu sırada qardaş Türkiyə həmişəki kimi, yenə də öndə gəlir. Məlum olduğu kimi, Türkiyə lap əvvəldən artıq keçmişdə qalmış Dağlıq Qarabağ münaqişəsinin həllində tarixi ədalətə və beynəlxalq hüquqa istinad edən Azərbaycanın mövqeyini dəstəkləyirdi. Qardaş ölkə Ermənistanın işğalçılıq siyasətinə etiraz əlaməti olaraq bu ölkə ilə sərhədlərini bağlamışdı.

Türkiyə Vətən müharibəsində elə ilk saatlardan Azərbaycanın yanında olduğunu bildirdi və müharibənin sonunadək mövqeyini dəyişmədi. Türkiyənin və diğər dost ölkələrin bu dəstəyi isə Azərbaycanın özünəinam hissini artırdı və müzəffər Ordumuz düşməni tam kapitulyasiyaya məruz qoydu.

Azərbaycan dost ölkələrin Vətən müharibəsində respublikamıza göstərdikləri mənəvi-siyasi dəstəyi yüksək dəyərləndirir. Elə işğaldan azad olunmuş ərazilərdə bərpa işlərinə məhz dost ölkələrin şirkətləri cəlb olunur. Bəhs olunan ərazilərdə layihələrin reallaşdırılmasında Türkiyə şirkətləri də yaxından iştirak edirlər. Bir sözlə, Azərbaycan və Türkiyə həmişə bir yerdədirlər. Qardaş Türkiyənin Prezidentinin Şuşaya səfərə gəlməsi bir daha təsdiqləyir ki, iki ölkə Vətən müharibəsində qazanılan böyük Qələbənin sevincini birgə yaşayır.

M.ABDULLAYEV

Paylaş:

Baxılıb: 634 dəfə