Sənətkar ömrü

Bakı:

17 °C

94 %

2 m/s

Əlaqə

AZ RU EN

Ana səhifə / Mədəniyyət / Sənətkar ömrü

Sənətkar ömrü

21.06.2022 [11:03]

Bərdə Regional Mədəniyyət İdarəsi, Yevlax Şəhər Mədəniyyət Mərkəzinin filialı olan şəhər Yaradıcılıq evi “Unutsaq, unudularıq” rubrikası altında dramaturq, şair, aktyor, rejissor və pedaqoq Əlfayım Əziz oğlu İsmayılova həsr olunmuş “Sənətkar ömrü” mövzusunda xatirə tədbiri keçirib.

Yaradıcılıq evinin foyesində Ə.Ə.İsmayılovun keçdiyi həyat yolundan bəhs edən sərgi təşkil olunmuşdu. Əlfayım Əzizovun dramaturq, şair, aktyor, rejissor və pedaqoq kimi çalışdığı illərdə onun təkrarsız fəaliyyətini əks etdirən sərgini ziyarət edənlər şairin əziz və unudulmaz xatirəsini ehtiramla yad etdilər. Ziyarətçilər bu işıqlı şəxsiyyətin maraqlı və məhsuldar ömür yolunu əks etdirən nümunələrlə tanış olduqdan sonra, pedaqoqun xatirə tədbirinin izləyiciləri oldular. Yevlax Şəhər Mədəniyyət Mərkəzinin filialı olan şəhər Yaradıcılıq evi tədbirə aktyorlardan ibarət heyət də dəvət etmişdi. Bu isə tədbirin daha da rəngarəng olmasına zəmin yaradırdı.

Əlfayım İsmayılov 1940-cı ildə Zərdab rayonunun Seyidlər kəndində anadan olub. Orta təhsilini Zərdab rayonunda aldıqdan sonra, Əzim Əzimzadə adına Rəssamlıq Məktəbinə daxil olur. Ali təhsil almaq üçün M.A.Əliyev adına Azərbaycan Dövlət İncəsənət İnstitutuna daxil olur (indiki Azərbaycan Dövlət Mədəniyyət və İncəsənət Universiteti). İncəsənət İnstitutunda təhsil alarkən çalışqanlığı və nadir istedadı ilə nəinki pedaqoji kollektivin, eləcə də tələbə yoldaşlarının dərin hörmət və etimadını qazanır. Ali təhsil müddətində İnstitutda səhnələşdirilən bir sıra tamaşalarda aktyor kimi çıxış edir. Bu illər onun həyatında xüsusi mərhələ təşkil edir. Bəzi əsərlərə ssenarilər yazır, bir sıra tamaşalara rejissorluq edir, bəzən də yazıçı, şair kimi ədəbi nümunələr yaradırdı. İnstitutu bitirən zaman, artıq neçə-neçə əsərin müəllifinə çevrilir.

Əlfayım İsmayılovun yaradıcılığı və ictimai fəaliyyəti çoxşahəli olmaqla yanaşı, həm də çətin və məsuliyyətli idi. Bu peşəkar insan təkcə bir sahədə fəaliyyət göstərməklə kifayətlənmirdi. Bir xronologiyaya nəzər yetirək:

Ə.İsmayılov 1978-ci ildən Teatr Xadimləri İttifaqının üzvü olmuşdur.

2007-2010-cu illərdə Azərbaycan Dövlət İncəsənət Universitetində baş müəllim kimi fəaliyyət göstərmişdir.

2010-cu ildən Azərbaycan Respublikası Müharibə, Əmək, Silahlı Qüvvələr və Hüquq Orqanları Veteranları Şurasının sədri işləmişdir.

2011-ci ildən Azərbaycan Yazıçılar Birliyinin üzvü seçilmişdir.

Sadalanan bu qədər fəaliyyət ilə yanaşı, Əlfayım İsmayılovun çoxşahəli peşə istiqamətlərindən biri də pedaqoq işləməsidir. O, müəllimlik fəaliyyətini Yevlax şəhərində həyata keçirib. Əlfayım müəllim ömrünün 40 ilini Yevlax mədəniyyətinin inkişafına həsr edib. Ə.İsmayılovun Yevlax mədəniyyətinə bağlılığı 1965-ciillərə təsadüf edir. Həmin dövrdə “Dəmiryolçular” klubu nəzdində dram dərnəyi yaradır, həmin dərnəyə rəhbərlik edir. Rəhbərlik etdiyi dərnək 1976-1977-ci illərdə teatr-baxış müsabiqələrində özünəməxsusluğu və peşəkarlığı ilə seçilərək, ”Xalq teatrı” statusuna layiq görülür. Həmin teatr “Teart baharı-78” respublika baxış-müsabiqəsində İ.Coşqunun”Komsomol” poemasını səhnələşdirir. Bu müsabiqədə Ə.İsmayılovun rəhbərlik etdiyi teatr respublikada 1-ci yerə layiq görülür. Müsabiqənin laureatı 27 nominasiya üzrə qalib olur. Teatr medalla təltif edilir. Həmin dövrdən teatra görkəmli gülüş ustası, Azərbaycanın Xalq artisti Bəşir Səfəroğlunun adı verilir.

Maraqlı faktlardan biri də budur ki, teatr 12 il özfəaliyyətlə məşğul olduqdan sonra, 45 il Bəşir Səfəroğlunun adını daşıyan Xalq Teatrına çevrilir.

Əlfayım müəllim onlarca əsərə rejissorluq edib: “Ata laylası”, “Qardaş qatili”, “Namus”, “Komsomol” poeması, “Dayı”, “Sən olmasaydın”, “Ərimi qaçırıblar”, “Gənc qvardiya”, “Çobanlar”, “Tösüqulunun əməlləri”, “Şirinbala bal yığır”, “Laçın yuvası”, “Durna”, “Həyat”, “Şahsənəm, Gülpəri”,”Hicran”,”Oktay Eloğlu”,”Dursunəli ballı badı”, “Çimnaz xanım yuxudadı”, “Bekarçılıq kontoru” və digər yaradıcılıq nümunələrini peşəkarlıqla səhnələşdirib.

Paylaş:

Baxılıb: 1084 dəfə