Ərdoğan: Bu ilin ilk səkkiz ayında enerji idxalına görə 26 milyard dollar ödəmişik

Bakı:

10 °C

81 %

9 m/s

Əlaqə

AZ RU EN

Ana səhifə / Dünya / Ərdoğan: Bu ilin ilk səkkiz ayında enerji idxalına görə 26 milyard dollar ödəmişik

Ərdoğan: Bu ilin ilk səkkiz ayında enerji idxalına görə 26 milyard dollar ödəmişik

06.10.2025 [23:17]

Türkiyə iqtisadiyyatının 2028-ci ildə 1,9 trilyon dollarlıq həcmə, adambaşına düşən milli gəlirin isə 21 min dollar səviyyəsinə yüksələcəyi proqnozlaşdırılır. Yalnız bu ilin ilk 8 ayında enerji idxalı üçün ölkə 26 milyard dollar ödəyib. Türkiyənin neftdə gündəlik istehlakı təxminən 1 milyon barelə çatıb. Bunun 160 min bareli öz mənbələrindən təmin edilib.

AZƏRTAC xəbər verir ki, bu barədə Türkiyə Prezidenti Rəcəb Tayyib Ərdoğan İstanbulda keçirilən 11-ci Enerji Səmərəliliyi Forumu və sərgisində çıxışı zamanı bildirib.

“Qara dəniz qazı və Gabar bölgəsindəki neft kəşflərimizdə mühüm irəliləyiş əldə etsək də, qarşımızda qət etməli olduğumuz məsafə var. 2003-cü ildə təbii qaz tədarük etdiyimiz ölkələrin sayı 5 idi. Bu gün BOTAŞ 34 ölkə ilə təbii qaz idxalı və ixracı həyata keçirir. Enerji tədarükü baxımından tək bir ölkəyə, mənbəyə və ya xətə bağlı qalmaq ciddi risklər yaradır. 2002-ci ildən bəri ciddi bir iqtisadi aktivlik içindəyik. 2003–2024-cü illər ərzində iqtisadiyyatımız orta hesabla illik 5,4 faiz böyüyüb. 2024-cü ildə də 3,3 faiz artım qeydə almışıq. 2002-ci ildə 17,4 milyard kubmetr olan təbii qaz istehlakımız 2024-cü ildə 53,2 milyard kubmetrə yüksəlib. 2025-ci il üçün proqnozumuz 59,5 milyard kubmetrdir. Təkcə bu ilin ilk səkkiz ayında enerji idxalına görə 26 milyard dollar ödəmişik. Bu xərci azaltmaq üçün ciddi səylər göstəririk”, - deyə qardaş ölkənin lideri vurğulayıb.

Türkiyə xalqını Sakarya qaz yatağından çıxarılan təbii qazla təmin etdiklərini deyən Türkiyə lideri hazırda 4 milyon ev təsərrüfatının qaz ehtiyacını məhz bu mənbədən qarşıladığını bildirərək 2026-cı ildə bu rəqəmin 8 milyona, 2028-ci ildə isə 16 milyona çatacağını sözlərinə əlavə edib: “Neftdə gündəlik istehlakımız təxminən 1 milyon bareldir. Bunun 160 min barelini öz mənbələrimizdən təmin edirik. Hazırda 4 aktiv qazma və 2 seysmik araşdırma gəmisi ilə bu sahədə dünyada 5-ci yerdəyik. Yeni gəmilərimizin də inventara daxil olması ilə 4-cü yerə yüksələcəyik. Digər bütün sahələrdə olduğu kimi, enerjidə də tam müstəqil Türkiyə hədəfimizə çatana qədər dayanmadan çalışacağıq”.

Nüvə enerjisi sahəsində də ölkəsini daha irəli aparmağı hədəflədiyini dilə gətirən Türkiyə Prezidenti bildirib ki, hazırda dünya üzrə 31 ölkədə 416 reaktor aktiv şəkildə fəaliyyət göstərir.

“Bu reaktorlar dünya elektrik enerjisinin təxminən 9 faizini istehsal edir. Türkiyənin də daxil olduğu 15 ölkədə 63 reaktorun tikintisi davam edir. İnşallah “Akkuyu” AES-də ilk elektrik enerjisini çox qısa müddət ərzində istifadəyə verəcəyik. “Akkuyu”dan başqa digər nüvə stansiyası layihələrimiz də mövcuddur və onlarla bağlı danışıqlarımız davam edir. Həm Çin, həm də son ABŞ səfərimizdə bu mövzunu müvafiq tərəfdaşlarımızla müzakirə etdik. ABŞ ilə imzaladığımız strateji mülki nüvə əməkdaşlığı haqqında qarşılıqlı anlaşma memorandumu sülh məqsədli nüvə enerjisində əməkdaşlığa əsaslanan razılaşmadır. Bu müqavilə ilə qabaqcıl reaktor texnologiyaları və kiçik modulyar reaktorlar kimi yeni nəsil texnologiyaların inkişaf etdirilməsi nəzərdə tutulur”, - Ərdoğan əlavə edib.

Qardaş ölkə lideri Türkiyənin yaşıl enerjiyə investisiya qoyan ölkələrin ön sırasında olduğunu da qeyd edib. Bildirilib ki, bu il ölkədə ümumi bərpaolunan enerjinin payını 60 faizi ötəcək.

Paylaş:

Baxılıb: 475 dəfə