Azərbaycan qlobal təhlükəsizliyə mühüm töhfələr verir

Bakı:

17 °C

72 %

8 m/s

Əlaqə

AZ RU EN

Ana səhifə / YAP xəbərləri / Azərbaycan qlobal təhlükəsizliyə mühüm töhfələr verir

Azərbaycan qlobal təhlükəsizliyə mühüm töhfələr verir

16.03.2026 [13:55]

Dünyada artan geosiyasi gərginlik, yeni münaqişə ocaqları və qlobal iqtisadi qeyri-müəyyənlik şəraitində təhlükəsizlik məsələsi beynəlxalq gündəliyin əsas mövzusuna çevrilib. Məhz bu kontekstdə paytaxtımızda keçirilən XIII Qlobal Bakı Forumu qlobal çağırışların müzakirəsi üçün mühüm platforma kimi diqqət çəkir. Forumda çıxış edən cənab Prezident İlham Əliyev müasir beynəlxalq münasibətlər sistemində təhlükəsizlik faktorunun həlledici rolunu xüsusi vurğuladı.

Dövlət başçısı qeyd etdi ki, hazırkı mərhələdə təhlükəsizlik, sabitlik və müdafiə məsələləri hər bir ölkənin gündəliyində prioritet olmalıdır. Bu gün dünyada yaranmış mürəkkəb vəziyyət göstərir ki, təhlükəsizlik təmin olunmadan heç bir inkişaf strategiyası real nəticə verə bilməz. Cənab Prezident bu fikri belə ifadə etdi: “İndi heç vaxt olmadığı qədər aydındır ki, təhlükəsizlik, sabitlik və müdafiə məsələləri hər bir ölkənin gündəliyində bir nömrəli prioritet olmalıdır. Çünki bunlar olmadan qalan bütün məsələlər tamamilə mənasızdır”.

Bu yanaşma əslində Azərbaycanın son onilliklərdə həyata keçirdiyi siyasətin mahiyyətini əks etdirir. Ölkəmiz uzun illər işğal və təhlükəsizlik riskləri ilə üzləşməsinə baxmayaraq, milli gücünü artıraraq sabitlik və inkişaf modelini formalaşdırdı. Prezident İlham Əliyevin çıxışında vurğulanan əsas məqamlardan biri də Azərbaycanın münaqişədən sonra sülh təşəbbüsləri ilə çıxış etməsi oldu. Dövlət başçısı bildirdi ki, ölkəmiz yalnız hərbi və siyasi qələbə ilə kifayətlənməyərək regionda dayanıqlı sülhün təmin olunması üçün addımlar atıb. “Biz Ermənistanla sülhü yalnız kağız üzərində əldə etməmişik, sülh sazişi yeddi ay əvvəl paraflandı və birgə bəyanat qəbul olundu. Lakin biz artıq real həyatda sülhü təmin etmişik. Sərhədimizdə sakit vəziyyət hökm sürür, atəş açılmır, artıq heç bir qurban və itki yoxdur”.

Bu reallıq Azərbaycanın regionda yeni təhlükəsizlik arxitekturasının formalaşmasına verdiyi töhfəni göstərir. Münaqişədən sonra sabitliyin təmin olunması, sərhədlərdə gərginliyin azalması və dialoq üçün yeni imkanların yaranması regionun gələcək inkişafı üçün mühüm şərt hesab olunur. Azərbaycan bu baxımdan yalnız öz milli maraqlarını qoruyan deyil, həm də regional təhlükəsizlik və əməkdaşlıq üçün yeni model təqdim edən ölkə kimi çıxış edir.

Digər bir mühüm məqam isə enerji təhlükəsizliyi ilə bağlıdır. Qlobal enerji bazarında baş verən kəskin dəyişikliklər, qiymətlərin dalğalanması və geosiyasi faktorların təsiri enerji məsələsini artıq iqtisadi deyil, strateji təhlükəsizlik məsələsinə çevirib. Dövlət başçımızın vurğuladığı kimi, bu gün enerji təhlükəsizliyi ölkələrin milli təhlükəsizliyinin ayrılmaz hissəsi olaraq əvvəllər heç vaxt olmadığı qədər önəm daşıyır. Azərbaycan bu sahədə də balanslı və məsuliyyətli siyasət yürüdən ölkələrdən biri kimi tanınır. Enerji resurslarının hasilatı və ixracı ilə yanaşı, ölkəmiz bazarda sabitliyin qorunmasına da xüsusi diqqət yetirir. Azərbaycan neft bazarında sabitliyin təmin olunması üçün OPEC+ formatında fəal iştirak edir və tarazlı qiymət siyasətinin tərəfdarıdır. Bu mövqe həm istehsalçı, həm də istehlakçı ölkələrin maraqlarının qorunmasına xidmət edir.

Bütün bu amillər göstərir ki, Azərbaycanın beynəlxalq siyasətdə tutduğu mövqe yalnız regional maraqlarla məhdudlaşmır. Ölkəmiz qlobal təhlükəsizlik, enerji sabitliyi və beynəlxalq əməkdaşlıq məsələlərində məsuliyyətli tərəfdaş kimi çıxış edir.

Natiq Quluzadə

YAP Zəngilan rayon təşkilatının sədri

Paylaş:

Baxılıb: 408 dəfə