Dövlətçilik tariximizin qızıl səhifəsi

Bakı:

25 °C

56 %

8 m/s

Əlaqə

AZ RU EN

Ana səhifə / Xəbər lenti / Dövlətçilik tariximizin qızıl səhifəsi

Dövlətçilik tariximizin qızıl səhifəsi

14.06.2026 [21:52]

Azərbaycan xalqının müasir tarixində elə günlər vardır ki, həmin tarixlər bütöv bir dövlətin taleyini müəyyən edən dönüş nöqtəsi kimi qiymətləndirilir. 15 İyun – Milli Qurtuluş Günü məhz belə günlərdəndir. Bu tarix Azərbaycan dövlətçiliyinin qorunması, milli birliyin təmin olunması və müstəqilliyin möhkəmləndirilməsi baxımından xüsusi əhəmiyyət daşıyır.

1991-ci ildə dövlət müstəqilliyini bərpa edən Azərbaycan Respublikası qısa müddət ərzində ciddi siyasi, iqtisadi və hərbi problemlərlə üzləşdi. Dövlət idarəçiliyində yaranmış böhran, hakimiyyət uğrunda daxili qarşıdurmalar, ölkənin müxtəlif bölgələrində müşahidə olunan gərginlik və Ermənistanın Azərbaycana qarşı təcavüzü müstəqilliyin taleyini sual altında qoyurdu. 1993-cü ilin yayında vəziyyət xüsusilə kritik həddə çatmış, ölkədə vətəndaş qarşıdurması təhlükəsi meydana çıxmışdı.

Belə mürəkkəb bir dövrdə xalqın çağırışı ilə Naxçıvanda fəaliyyət göstərən Ulu Öndər Heydər Əliyev 1993-cü il iyunun 9-da Bakıya gəldi. Onun paytaxta qayıdışı cəmiyyət tərəfindən böyük ümidlə qarşılandı. Çünki Azərbaycan xalqı yaxşı anlayırdı ki, dövlətçilik ənənələrinə malik, zəngin siyasi təcrübəsi olan və mürəkkəb vəziyyətlərdə strateji qərarlar verməyi bacaran liderə ehtiyac vardır.

İyunun 15-də Heydər Əliyevin Azərbaycan Respublikası Ali Sovetinin sədri seçilməsi ölkənin siyasi həyatında yeni mərhələnin başlanğıcı oldu. Məhz bu tarix sonradan Milli Qurtuluş Günü kimi tarixə düşdü. Həmin gün Azərbaycan dövlətçiliyinin dağılmaq təhlükəsindən xilas olduğu, siyasi sabitliyin bərpasına doğru ilk ciddi addımın atıldığı gün kimi qiymətləndirilir.

Heydər Əliyevin hakimiyyətə qayıdışından sonra ölkədə sabitliyin təmin edilməsi istiqamətində mühüm tədbirlər həyata keçirildi. Dövlət institutlarının fəaliyyəti bərpa olundu, idarəetmədə vahidlik yaradıldı, hüquqi dövlət quruculuğu prosesinə başlanıldı. Azərbaycanın beynəlxalq aləmdə mövqelərinin gücləndirilməsi, xarici siyasət kursunun müəyyənləşdirilməsi və milli maraqlara əsaslanan inkişaf strategiyasının formalaşdırılması da həmin dövrün əsas nailiyyətləri sırasında yer aldı.

Milli Qurtuluşun nəticələri təkcə 1993-cü ilin hadisələri ilə məhdudlaşmır. Sonrakı illərdə ölkədə əldə olunan siyasi sabitlik, iqtisadi inkişaf, beynəlxalq nüfuzun yüksəlməsi və müstəqil dövlət quruculuğunun möhkəmlənməsi həmin tarixi qərarların məntiqi nəticəsi kimi çıxış etdi. Xüsusilə 1994-cü ildə imzalanan “Əsrin müqaviləsi” Azərbaycanın iqtisadi inkişafının əsasını qoyaraq ölkəni regionun mühüm enerji mərkəzlərindən birinə çevirdi.

Bu gün Azərbaycan xalqı 15 İyun Milli Qurtuluş Gününü təkcə tarixi hadisə kimi deyil, dövlətçilik ənənələrinin, milli həmrəyliyin və müstəqilliyin qorunmasının rəmzi kimi qeyd edir. Qurtuluş fəlsəfəsi Azərbaycan dövlətinin gələcək inkişaf strategiyasının da əsas sütunlarından biri olaraq qalır. Məhz həmin gün atılan addımlar müasir Azərbaycanın formalaşmasına, güclənməsinə və öz milli maraqlarını qətiyyətlə müdafiə edən dövlətə çevrilməsinə zəmin yaratmışdır.

15 İyun Milli Qurtuluş Günü hər bir Azərbaycan vətəndaşına dövlətçiliyin nə qədər böyük dəyər olduğunu xatırladır. Bu günün mahiyyəti ondan ibarətdir ki, dövlətin taleyi təhlükə qarşısında qaldıqda xalqın iradəsi, milli birlik və uzaqgörən liderlik ölkənin gələcəyini müəyyən edə bilir. Azərbaycanın müasir inkişaf tarixində Milli Qurtuluş Günü məhz bu həqiqətin ən parlaq təcəssümüdür.

Əli Bədəlov

Paylaş:

Baxılıb: 465 dəfə