Dövlət Suverenliyi Günü — Azərbaycan xalqının iradəsinin simvolu

Bakı:

30 °C

44 %

6 m/s

Əlaqə

AZ RU EN

Ana səhifə / YAP xəbərləri / Dövlət Suverenliyi Günü — Azərbaycan xalqının iradəsinin simvolu

Dövlət Suverenliyi Günü — Azərbaycan xalqının iradəsinin simvolu

19.09.2025 [17:05]

Hər bir xalqın taleyində elə günlər var ki, onlar tarixdə bir dönüm nöqtəsi, millətin yaddaşında isə əbədi bir işıq kimi yaşayır. Azərbaycan xalqı üçün bu günlərdən biri də Dövlət Suverenliyi Günüdür. Bu gün, sadəcə bir bayram deyil, millətin azadlıq arzularının, sərhədlərini bərpa etmək iradəsinin və öz gələcəyinə sahib çıxmaq əzminin rəmzidir. Suverenlik — azad nəfəs almaq, öz taleyinin sahibi olmaq, başqa qüvvələrin hökmündən xilas olmaq deməkdir. Bu anlayış sadəcə siyasi bir termin deyil, həm də bir millətin varlığını, kimliyini, müstəqilliyini qoruyub saxlamaq gücüdür. Xalq yalnız suveren olduğu halda öz dilində danışa, öz torpağında söz sahibi ola, öz gələcəyini qurmaq haqqına sahib ola bilər. Azərbaycan xalqı əsrlər boyu bu haqq uğrunda mübarizə aparmış, işğallara, zorakılıqlara sinə gərmişdir. Ancaq heç vaxt müstəqillik arzusu sönməmiş, qəlblərdə ümid çırağı daim yanmışdır. XX əsrin sonlarında isə bu ümid gerçəkliyə çevrildi. Dövlətimizin müstəqilliyi elan olundu, xalq özünün tarixi haqqını bərpa etdi və suveren dövlət kimi dünya xalqları arasında yerini tutdu. Dövlət Suverenliyi Günü bizə təkcə şanlı bir keçmişi xatırlatmır, həm də böyük bir məsuliyyəti xatırladır. Çünki suverenlik yalnız qazanmaqla bitmir, onu qorumaq, möhkəmləndirmək və gələcək nəsillərə ötürmək lazımdır. Bu günün mahiyyəti məhz buradadır: xalq öz azadlığını, dövlət öz müstəqilliyini qoruyub saxladıqca yaşayar.
Tarixin yaddaşında bəzən elə şəxsiyyətlər iz qoyur ki, onların fəaliyyəti xalqın taleyində dönüş nöqtəsinə çevrilir. Azərbaycanın müstəqillik yolunda belə simalardan biri də Prezident İlham Əliyevdir. Əgər suverenlik azadlığın başlanğıcıdırsa, onun qorunması və möhkəmlənməsi müdrik rəhbərin uzaqgörənliyi, qətiyyəti və xalq sevgisi ilə mümkündür. Azərbaycanın suverenliyi yalnız bir sənəd imzası ilə qazanılmadı. Bu yol fədakarlıq, zəhmət və bəzən də ağır sınaqlarla müşayiət olundu. İlham Əliyevin siyasi fəaliyyətində əsas məqsəd bu suverenliyi daha da gücləndirmək, onu dönməz etmək, xalqı müstəqil və qüdrətli dövlətin vətəndaşı kimi yaşatmaq olmuşdur. Onun rəhbərliyi ilə Azərbaycan dünya miqyasında söz sahibi olan, iqtisadi cəhətdən güclü, siyasi baxımdan sabit və nüfuzlu bir dövlətə çevrildi. Neft strategiyası yeni nəfəs aldı, enerji layihələri ölkəmizi regionun əsas aparıcı qüvvəsinə çevirdi. Bu, yalnız iqtisadi uğur deyildi – bu, həm də siyasi müstəqilliyin möhkəmlənməsi, dövlətimizin sərbəst qərar vermə gücünün artması idi. Ən mühüm məqam isə suverenliyimizin torpaq bütövlüyü ilə təsdiqlənməsidir. İlham Əliyevin rəhbərliyi ilə xalqımız 44 günlük Vətən müharibəsində və 19-20 sentyabr Antiterror əməliyyatlarında tarixi Zəfərə imza atdı. Bu qələbə təkcə əsgər gücü ilə deyil, həm də rəhbərin dəmir iradəsi, xalqla dövlətin birliyi ilə mümkün oldu. Torpaqlarımız azad edildikcə suverenliyimiz yalnız kağız üzərində deyil, reallıqda da təsdiqləndi.
İlham Əliyev bu yolda təkcə siyasi lider kimi deyil, həm də milli ruhun daşıyıcısı kimi çıxış etdi. Onun hər bir addımı – diplomatik mübarizəsi, beynəlxalq tribunalardan səsləndirdiyi haqq səsi, Azərbaycan gənclərinə ünvanladığı güvən – hamısı dövlətin müstəqilliyinə xidmət etdi. O, xalqa sadəcə lider kimi deyil, həm də milli iradənin təcəssümü kimi dayandı. Bu gün Azərbaycanın suverenliyi daha möhkəmdir. Çünki o, yalnız 1991-ci ildə qazanılan müstəqilliyin davamı deyil, həm də 2020 və 2023-cü ildə torpaqlar üzərində bərpa olunan haqqın təntənəsidir. Bu yolun memarı İlham Əliyevdir.
Suverenlik – dövlətin ürəyidir. O ürəyi döyündərən isə xalqın birliyi və rəhbərin iradəsidir. İlham Əliyev bu iradənin simvolu olaraq Azərbaycanı gücləndirdi, xalqın inamını artırdı və gələcək nəsillərə əsl suveren və tamlaşmış Azərbaycan bəxş etdi.

Səfa Ağayev
YAP İmişli rayon təşkilatının sədri

Paylaş:

Baxılıb: 433 dəfə