Jurnalistlər üçün güzəştli ipoteka

Bakı:

23 °C

59 %

1 m/s

Əlaqə

AZ RU EN

Ana səhifə / Sosial / Jurnalistlər üçün güzəştli ipoteka

Jurnalistlər üçün güzəştli ipoteka

28.03.2023 [11:03]

Aidiyyəti üzrə müraciət edilməlidir

Nicat Dilqəmli

Ölkəmizdə medianın inkişafı, jurnalistlərin həyat şəraitinin yaxşılaşdırılması hər zaman diqqət mərkəzində saxlanılır. Dövlət başçımız tərəfindən imzalan çoxsaylı Fərman və Sərəncamlar əsasında həyata keçirilən layihələr əsasında bu günə qədər xeyli sayda media işçisi yaradılan şəraitdən istifadə imkanı qazanıb. Mətbuat nümayəndələri üçün nəzərdə tutulan güzəştlərdən biri də jurnalistlər üçün güzəştli ipoteka kreditinin verilməsidir. Bu barədə Azərbaycan Respublikası Prezidentinin

2016-cı il 22 iyun tarixli 940 nömrəli Fərmanı ilə təsdiq edilmiş “Azərbaycan Respublikası İpoteka və Kredit Zəmanət Fondunun vəsaiti hesabına ipoteka kreditinin, o cümlədən güzəştli ipoteka kreditinin verilməsi Qaydası”nda dəyişiklik edilməsi haqqında Prezidentin Fərmanında qeyd edilir. Fərmana əsasən “Azərbaycan Respublikası İpoteka və Kredit Zəmanət Fondunun vəsaiti hesabına ipoteka kreditinin, o cümlədən güzəştli ipoteka kreditinin verilməsi Qaydası”na 3.2.1-ci yarımbəndə aşağıdakı məzmunda 8-ci abzas əlavə edilib. Əlavəyə görə, gənc ailənin üzvü olan, azı 5 il jurnalist işləyən və Media Reyestrinə daxil edilmiş şəxslər güzəştli ipoteka kreditindən istifadə etmək hüququna malikdir.

Bu yeniliyə qədər şəhid ailəsinin üzvü (əri/arvadı, övladları), Milli Qəhrəman (özü, əri/arvadı, övladları), məcburi köçkün və ya ona bərabər tutulan şəxslər, ən azı 3 il dövlət qulluğunda qulluq edən, o cümlədən dövlət qulluğunun xüsusi növündə xidmət keçən şəxslər, ən azı 5 il dövlət ümumtəhsil məktəbində müəllim işləyən şəxslər, fəlsəfə doktoru elmi dərəcəsi olan şəxslər və idman sahəsində xüsusi xidmətləri olan şəxs (fəxri bədən tərbiyəsi və idman xadimi, ölkə miqyaslı yarışların qalibi (I yer), beynəlxalq miqyaslı yarışların mükafatçısı (I, II və ya III yer) olan şəxslər güzəştli ipotekada yararlanmaq hüququ var idi.

Bundan əlavə həmin maddəyə 3.2.8-ci yarımbənd əlavə edilib:

Bu bənddə də göstərilir ki, ən azı 15 il jurnalist işləyən və Media Reyestrinə daxil edilmiş şəxslər də güzəştli ipoteka şərtlərindən yararlana bilər.

Qaydaya əsasən, Fondun Himayəçilik Şurası tərəfindən kredit, o cümlədən güzəştli ipoteka krediti üzrə illik faiz dərəcələri müəyyən olunana qədər, kredit üzrə illik faiz dərəcəsi 8 faizdən, güzəştli ipoteka krediti üzrə isə 4 faizdən çox olmamalıdır.

Jurnalistlərin onlar üçün yaradılan güzəştlərdən istifadəsi məsələsinə gəlincə isə Medianın İnkişafı Agentliyinin mətbuat xidmətinin rəhbəri Səidə Şəfiyeva “Yeni Azərbaycan”a açıqlamasında bildirdi ki, jurnalistlər bu imkandan yararlanmaq üçün aidiyyəti üzrə müraciət edə bilərlər: “Azərbaycan Respublikası Prezidentinin 2022-ci il 8 fevral tarixli Fərmanı ilə jurnalistlərin güzəştli ipoteka kreditindən istifadə edə bilməsi üçün hüquqi əsas yaradılmışdır. Jurnalistlər Qanunvericiliyin tələblərinə uyğun olaraq bu imkandan istifadə məqsədilə aidiyyəti üzrə müraciət edə bilərlər”.

Xatırladaq ki, ötən ilin oktyabr ayından etibarən jurnalistlər və media subyektləri üçün Media Reyestri fəaliyyətə başlayıb. Media Reyestrində qeydiyyatdan keçən jurnalistlər və media subyektləri üçün bir sıra güzəştlər nəzərdə tutulub. Bunlardan biri və ən çox gözləniləni jurnalistlər üçün güzəştli şərtlərlə ipotekanın təqdim olunmasıdır. Müraciət edən şəxs güzəştli ipotekadan yararlanmaq üçün İpoteka və Kredit Zəmanət Fondunun ipoteka üzrə kriteriyalarına uyğun olmalıdır.

Paylaş:

Baxılıb: 631 dəfə