İşğalçı ölkənin təcavüzkar siyasəti nəticəsində yüzminlərlə azərbaycanlı məktəbli silahlı münaqişədən bu gün də əziyyət çəkir

Bakı:

25 °C

60 %

1 m/s

AZ RU EN

Ana səhifə / Sosial / İşğalçı ölkənin təcavüzkar siyasəti nəticəsində yüzminlərlə azərbaycanlı məktəbli silahlı münaqişədən bu gün də əziyyət çəkir

İşğalçı ölkənin təcavüzkar siyasəti nəticəsində yüzminlərlə azərbaycanlı məktəbli silahlı münaqişədən bu gün də əziyyət çəkir

11.09.2020 [09:42]

Azərbaycanın Ermənistan tərəfindən işğal olunmuş ərazilərində 1107 təhsil müəssisəsi və 855 uşaq bağçası tamamilə məhv edilib
Məlum olduğu kimi, Birləşmiş Millətlər Təşkilatının (BMT) Baş Assambleyası tərəfindən bu il mayın 28-də qəbul edilən 74/275 saylı qətnaməyə uyğun olaraq 9 sentyabr tarixi Təhsilin Hücumlardan Beynəlxalq Müdafiəsi Günü elan edilib. Bununla əlaqədar Azərbaycanın Xarici İşlər Nazirliyi bəyanat yayıb. Bəyanatda qeyd olunduğu kimi, Uşaq Hüquqları Konvensiyasının və onun Uşaqların Silahlı Münaqişələrə cəlb edilməsinə dair Əlavə Protokolun, habelə 1949-cu il Müharibə Qurbanlarının Müdafiəsi üzrə Cenevrə Konvensiyalarının tərəfdaşı olan Azərbaycan Respublikası qətiyyətlə və davamlı olaraq uşaq hüquqlarının səmərəli müdafiəsinin təmin edilməsinə və silahlı münaqişələrdən əziyyət çəkən uşaqların vəziyyətinin yaxşılaşdırılmasına yönəlmiş beynəlxalq səylərə dəstək verir.
Qeyd edək ki, Ermənistanın Azərbaycana qarşı davam edən silahlı təcavüzü Azərbaycanın təhsil infrastrukturuna da ciddi ziyan vurub. Belə ki, ölkəmizin işğal olunmuş ərazilərində 1107 təhsil müəssisəsi və 855 uşaq bağçası tamamilə məhv edilib. Bütövlükdə, Ermənistanın təcavüzkar siyasəti nəticəsində yüzminlərlə azərbaycanlı məktəbli silahlı münaqişədən bu gün də əziyyət çəkir. Ümumiyyətlə, etnik təmizləmə siyasəti nəticəsində azərbaycanlılar, o cümlədən məktəblilər, tələbələr və müəllimlər Ermənistandakı doğma torpaqlarından və Azərbaycanın işğal olunmuş ərazilərindən didərgin düşüblər. On minlərlə azərbaycanlı qaçqın və məcburi köçkün düşmüş oğlan və qızlar, bu vəziyyətdən irəli gələn ciddi problemlərin təsiri altında təhsil hüquqlarını həyata keçirməyə davam edirlər. Eyni zamanda, təmas xətti boyunca yaşayan sakinlər kimi bir çox məktəblilər də işğalçı tərəfin atəşkəsi pozmasından əziyyət çəkir. Onlar Ermənistan silahlı qüvvələri tərəfindən heç bir fərq qoyulmadan atəşə məruz qalmaq təhlükəsi altında davamlı olaraq dərslərində iştirak edirlər. Belə ki, yalnız 2016-cı ilin aprelində Ermənistan silahlı qüvvələrinin atəşə tutması nəticəsində Azərbaycanın Goranboy, Tərtər, Ağdam və Ağcabədi rayonlarında bir çox məktəb ciddi ziyan görüb, Ağdam rayonunun Sarıcalı kəndində 220 məktəblinin təhsil aldığı orta məktəb də erməni vandalizminə məruz qalaraq məhv olub.
Xüsusi olaraq qeyd etmək lazımdır ki, Ermənistan cəbhə xəttinə yaxın bölgələrdəki mülki əhalini, xüsusilə uşaqları intensiv olaraq atəşə tutur. Bunun nəticəsində 2017-ci ildə iyulun 4-də Füzuli rayonunun Alxanlı kəndində 2016-cı il təvəllüdlü Zəhra Quliyeva qətlə yetirilib. Eyni zamanda, Ermənistanın azərbaycanlı əhaliyə qarşı silsilə etnik təmizləmələr həyata keçirməsi nəticəsində Xocalıda, Kəlbəcərin Ağdaban kəndində, Goranboyun Ballıqaya kəndində və digər yaşayış yerlərində xeyli sayda uşaqlar, məktəblilər öldürülüb. Azərbaycan Respublikası Xarici İşlər Nazirliyinin bəyanatında qeyd olunduğu kimi, azərbaycanlı məktəblilərə qarşı törətdiyi müharibə cinayətlərinə görə Ermənistan məsuliyyət daşıyır. Eyni zamanda, Təhsilin Hücumlardan Beynəlxalq Müdafiəsi Gününün məqsədinin həyata keçirilməsi kontekstində bütün günahkarların ədalət qarşısına çıxarılması vasitəsilə yuxarıda göstərilən cinayətlərin cəzasızlığına son qoyulması son dərəcə vacibdir. Azərbaycan ictimaiyyətinin mövqeyi bundan ibarətdir ki, Ermənistan BMT Təhlükəsizlik Şurasının Dağlıq Qarabağ münaqişəsinin həlli ilə bağlı qətnamələrinin tələblərini yerinə yetirməli, on minlərlə azərbaycanlının təhlükəsiz təhsil almaq hüquqlarının həyata keçirməsinə imkan yaratmalıdır. Cəmiyyətimiz bununla bağlı beynəlxalq birlikdən ədalətli mövqe və qətiyyətli, konkret yanaşma gözləyir.
Nardar BAYRAMLI

Paylaş:

Baxılıb: 627 dəfə