Xətai rayonunda 2017-ci ilin sosial-iqtisadi inkişafının yekunları ilə bağlı hesabat yığıncağı keçirilib

Bakı:

22 °C

76 %

12 m/s

AZ RU EN

Ana səhifə / Sosial / Xətai rayonunda 2017-ci ilin sosial-iqtisadi inkişafının yekunları ilə bağlı hesabat yığıncağı keçirilib

Xətai rayonunda 2017-ci ilin sosial-iqtisadi inkişafının yekunları ilə bağlı hesabat yığıncağı keçirilib

08.02.2018 [10:00]

Xətai rayon İcra Hakimiyyətində 2017-ci ilin sosial-iqtisadi inkişafının yekunları və 2018-ci ildə qarşıda duran vəzifələrlə əlaqədar hesabat yığıncağı keçirilib. Yığıncaqda hesabat məruzəsi ilə çıxış edən Xətai rayon İcra Hakimiyyətinin başçısı Razım Məmmədov qeyd edib ki, Prezident İlham Əliyev Ümummilli liderimiz Heydər Əliyev tərəfindən əsası qoyulmuş müstəqil Azərbaycanın siyasi və iqtisadi inkişaf strategiyasını son 14 ildə uğurla və qətiyyətlə davam etdirərək, respublikanın sosial-iqtisadi və siyasi dayaqlarını əsaslı şəkildə möhkəmləndirərək onu dünyanın sabit inkişaf edən nüfuzlu dövlətlərindən birinə çevirib. R.Məmmədov bildirib ki, yanvarın 10-da Prezident İlham Əliyevin Sədrliyi ilə keçirilən Nazirlər Kabinetinin 2017-ci ilin sosial-iqtisadi inkişafının yekunlarına və qarşıda duran vəzifələrə həsr olunmuş iclasında dövlət başçısının bildirdiyi kimi, 2017-ci ildə də ölkəmiz dünyanın uğurla inkişaf edən sabit dövlətlərindən biri olmuşdur.
Xətai rayonunda ötən ilin sosial-iqtisadi göstəriciləri haqqında danışan R.Məmmədov bildirib ki, 2017-ci ilin yekunlarına əsasən, rayonun sənaye müəssisələrində 1 milyard 336,4 milyon manatlıq məhsul istehsal edilib və xidmətlər göstərilib: “Bu göstəricidə dövlət sektorunun payı 1 milyard 253,8 milyon manat və ya ümumi istehsalın 93,8 faizi qədər, qeyri-dövlət sektorunda isə 82 milyon 609 min manat və ya ümumi istehsalın 6,2 faizi qədər olmuşdur. İstehlakçılara 1 milyard 340,2 milyon manatlıq və ya bütün sənaye istehsalının 100,3 faizi qədər məhsul göndərilmişdir. 2017-ci ildə pərakəndə ticarət şəbəkəsindən əhaliyə 2 milyard 522, 9 milyon manata yaxın və ya əvvəlki illə müqayisədə 18,4 faiz çox istehsal malları satılmışdır. Özəl müəssisələrdə 2 milyard 522, 8 milyon manatlıq və ya 2016-cı illə müqayisədə 18,4 faiz çox istehlak malları satılmışdır. Rayonun ticarət şəbəkəsindən əhaliyə satılmış ərzaq məhsullarının həcmi 1 milyard 479, 6 milyon manatı ötmüş, qeyri-ərzaq mallarının həcmi isə 1,045 milyard manat təşkil etmişdir.
Bütün maliyyə mənbələri hesabına 38 milyon 986 min manat əsas fondlar istifadəyə verilmiş, iqtisadi və sosial sahələrin inkişafı üçün əsas kapitala 709,703 milyon manat investisiya yönəldilmişdir ki, bu da 2016-cı illə müqayisədə 49,6 faiz çoxdur. 681,5 milyon manatlıqdan çox tikinti-quraşdırma işləri görülmüşdür. Tikinti-quraşdırma təşkilatlarının öz gücləri ilə yerinə yetirdikləri podrat işlərinin həcmi isə 1 milyard 93,14 milyon manatdan çox olmuşdur”.
Xüsusi vurğulanıb ki, 2017-ci ildə qeyri-dövlət mülkiyyətində olan tikinti müəssisələrinin yerinə yetirdikləri işlərin həcmi 716 milyon manat, dövlət mülkiyyətində olanların işlərinin həcmi isə 376,3 milyon manat olub. 10 min nəfərdən artıq insanın çalışdığı tikinti sektorunda orta aylıq əməkhaqqı 1567,3 manat təşkil edib. Nəqliyyat sektorunda xidmətlər ötən ildəkindən 18 faiz artaraq 839,2 milyon manata çatıb, rabitə müəssisələri tərəfindən hüquqi və fiziki şəxslərə faktiki qiymətlərlə 43 milyon manata yaxın xidmətlər göstərilib ki, bu da əvvəlki illə müqayisədə 3,6 faiz çoxdur. Nəqliyyatda çalışanların orta aylıq əmək haqqı 15,5 faiz artaraq 1 min manatı keçib, rabitə işçilərinin orta aylıq əmək haqqı isə 2,8 artaraq 666 manat təşkil edib. Əhalinin orta aylıq əmək haqlarının artımı pullu xidmətlərin həcminin də artmasına və 693,2 milyon manata çatmasına səbəb olub.
Hesabat məruzəsi ətrafında çıxış edən Milli Məclisin deputatı, YAP Xətai rayon təşkilatının sədri Hüseynbala Mirələmov, Xətai rayon prokuroru Yusif İldırımzadə, Səfərbərlik və Hərbi Xidmətə Çağırış üzrə Dövlət Xidmətinin Xətai rayon İdarəsinin rəisi Mehman Qurbanov və başqaları 2017-ci ildə görülən işləri yüksək qiymətləndiriblər.
Hesabat yığıncağında çıxış edən Azərbaycan Respublikası Prezident Administrasiyasının məsul əməkdaşı Tağı Tağıyev Prezident İlham Əliyevin rəhbərliyi ilə həyata keçirilən dövlət siyasətinin mühüm məqamları və 2018-ci il üçün nəzərdə tutulan sosial-iqtisadi inkişaf layihələrinin əsas mahiyyətini açıqlayıb.
Sonda Azərbaycan Prezidenti İlham Əliyevə yığıncaq iştirakçıları adından müraciət qəbul edilib.

Paylaş:

Baxılıb: 613 dəfə