Döyüşçü qadınlarla görüş keçirilib

Bakı:

20 °C

83 %

4 m/s

Əlaqə

AZ RU EN

Ana səhifə / Sosial / Döyüşçü qadınlarla görüş keçirilib

Döyüşçü qadınlarla görüş keçirilib

07.03.2015 [11:08]

Dünən “Müharibə Veteranı Qadınlara dəstək” İctimai Birliyinin Xocalı rayon şöbəsinin ofisində Qarabağ müharibəsində iştirak edən döyüşçü xanımlarla 8 mart Beynəlxalq Qadınlar Günü münasibəti ilə görüş keçirilib.
“Müharibə veteranı qadınlarına dəstək” İctimai Birliyinin Xocalı rayon şöbəsinin sədri Sahil Həsənov tədbiri giriş sözü ilə açaraq bildirib ki, tarix boyu Azərbaycan qadınları öz Vətəninə, xalqına, dövlətinə dayaq duraraq öz öhdələrinə düşən vəzifələri layiqincə yerinə yetiriblər: “Onlar Vətən üçün ləyaqətli övladlar tərbiyə edib, yeri gələndə qılınca qurşanaraq öz həyat yoldaşları ilə birlikdə çiyin-çiyinə müqəddəs torpaqlarımızın yağı əlinə keçməməsi üçün ölüm - dirim savaşına qalxıblar. Bu gün də bu missiyanı döyüşçü qadınlarımız şərəflə davam etdirirlər. Ölkənin ictimai-siyasi, mədəni, elmi, pedaqoji həyatında, hərbçi peşəsini seçən və taleyini Vətənə xidmətə həsr edən qadınlarımız da kifayət qədərdir. Ölkə rəhbərliyi onların xidmətlərini həmişə yüksək qiymətləndirir”.
Daha sonra çıxış edən “Əsgər Ailələrinə Dəstək” İctimai Birliyinin sədri Mətanət Əsgərqızı qeyd edib ki, dünyaya dahilər bəxş edən Azərbaycan qadını hər zaman Şərq qadınına məxsus iradəsi, mərdliyi, saflığı, sədaqəti ilə cəmiyyətimizin həyatında müstəsna rol oynayıb: “Əsrlərin yaddaşında qalan izlər qadınlarımızın qəhrəmanlıqla dolu keçmişindən xəbər verir. Ələlxsus biz Qarabağ savaşında qadınlarımızın igidliyinin, şücaətinin bir daha şahid olduq. Kişilərlə çiyin-çiyinə çarpışan qadınlarımızdan bəziləri şəhidlik zirvəsinə ucaldılar, bəziləri öz sağlamlıqlarını itirdilər. Həmin müharibədə öz yaxınlarını itirən qadınlarımız öz məğrurluqlarını itirmədilər. Bu gün də bizlər öz dəyanətini, mərdliyini itirməyən, düşmənin gözünün içinə dik baxmağı bacaran həmin qadınlarımızla fəxr edir, onlarla qürur duyuruq. Təsadüfi deyil ki, Ümummilli liderimiz Heydər Əliyev də qadınların cəmiyyətdə rolunu və fəaliyyətini yüksək dəyərləndirərək deyirdi: “Qadın bəşərə yaraşıq, zinət, insanlığa şərəf - şan, şöhrətdir. Qadın ucalıq, ülvilik məbədidir, ismət, qeyrət, qüdrət rəmzidir”.
Natiq çıxışı zamanı qeyd edib ki, bu gün bütün dünya Heydər Əliyev Fondunun prezidenti, UNESCO - nun və İSESCO-nun xoşməramlı səfiri, ölkəmizin birinci xanımı Mehriban Əliyevanın timsalında Azərbaycan qadınlarının nəyə qadir olduğunu görür və qiymətləndirir.
Xocalı rayon İcra Hakimiyyətinin məsul işçisi Xəlil Vəliyev tədbir iştirakçılarını bayram münasibətilə təbrik edib.
Sonda tədbir iştirakçılarına hədiyyələr verilib.
Oktay

Paylaş:

Baxılıb: 930 dəfə