4 saylı Xankəndi orta məktəbində “Açıq Əyləncəli Futbol Məktəbləri” Festivalı keçirilib

Bakı:

22 °C

65 %

4 m/s

Əlaqə

AZ RU EN

Ana səhifə / Sosial / 4 saylı Xankəndi orta məktəbində “Açıq Əyləncəli Futbol Məktəbləri” Festivalı keçirilib

4 saylı Xankəndi orta məktəbində “Açıq Əyləncəli Futbol Məktəbləri” Festivalı keçirilib

21.10.2014 [09:56]

Dünən Ramanı qəsəbəsində yerləşən Şuşa və Xankəndi qaçqın şəhərciyində inşa edilmiş Nizami Gəncəvi adına 4 saylı Xankəndi orta məktəbində “Açıq Əyləncəli Futbol Məktəbləri” Festivalı keçirilib. Açılış mərasimində AFFA-nın vitse-prezidenti, millət vəkili Rauf Əliyev, Şuşa rayon təhsil şöbəsinin müdiri Təvəkkül Əliyev, məktəbin direktoru Nizami Xudiyev, Şuşa UGİM direktoru Novruz Əbülqasımov iştirak ediblər. Festivala 150 nəfər 7-12 yaşda olan qız və oğlanlar qatılıblar.
Tədbirdə çıxış edən Rauf Əliyev məktəblilərə uğurlar arzulayıb. “Açıq Əyləncəli Futbol Məktəbləri” ilə ilk tanışlığının 2002-ci ildə Bosniya və Herseqovinada olduğunu deyən R.Əliyev bildirib ki, “Açıq Əyləncəli Futbol Məktəbləri” layihəsi Kopenhagendə Kəsişən Mədəniyyətlər Assosasiyası (CCPA) və Norveç Futbol Federasiyası arasında birgə əməkdaşlıq vasitəsi ilə münaqişələr olan ölkələrdə həyata keçirilir. Onun sözlərinə görə, layihənin əsas məqsədi etnik münaqişələr olan ölkələrdə yaşayan uşaqlara həyatlarının ağrı-acılarını bir qədər unutdurmaq, onların həyat tərzinə futbol və əyləncəli oyunlar vasitəsi ilə müsbət təsir göstərməkdir: “Burada başlıca məqsəd “əyləncəli konsepsiya”dan ibarətdir. Tapşırıqlarımız futbol oyununda elə bir aspektə yönəlir ki, oyun tam əyləncədən ibarət olsun, yalnız bundan sonra xal və əldə olunan nəticənin səviyyəsinə əhəmiyyət verilir. “Açıq Əyləncəli Futbol Məktəbləri”nin əsas prinsipi istedadlı futbolçu hazırlayıb təkmilləşdirməkdən ibarət deyil. Təşkilatçıların, klubların əsas məqsədi istedadlı uşaqları seçmək, bundan sonra onlarda olan istedadı inkişaf etdirməkdir. Bu məktəblərə bacarığından, istedadından asılı olmayaraq 7-12 yaşında oğlan və qız uşaqları qəbul olunur”.
Millət vəkili qeyd edib ki, Azərbaycanda ilk nümunəvi “Açıq Əyləncəli Futbol Məktəbi” 2003-cü ildə “Neftçi” İdman-Sağlamlıq Mərkəzində olub. Məktəbin fəaliyyətində 200 uşaq, 12 nəfər məşqçi, 2 nəfər lider iştirak edib. 2004-cü ildə isə AFFA-nın nəzdində “Açıq Əyləncəli Futbol Məktəbləri”nin ofisi açılıb və o zamandan Azərbaycanda “Açıq Əyləncəli Futbol Məktəbləri” layihəsi tam fəaliyyətə başlayıb. Artıq bu layihə bir çox rayonlarda həyata keçirilir. R.Əliyev 2014-cü il ərzində ölkədə 12 “Açıq Əyləncəli Futbol Məktəbi”nin açılmasının planlaşdırıldığını deyib: “Bununla da, ölkəmizdə bu məktəblərin ümumi sayı 137-ə çatacaq ki, bu da təxminən 24000 uşaq, 1800 məşqçi-müəllim, lider və təlimatçı deməkdir”.
R.Əliyev bu layihənin həyata keçirilməsində dəstək göstərən bütün təşkilatlara təşəkkür edib.
Tədbirdə digər çıxış edən natiqlər də layihənin əhəmiyyətini vurğulayıblar.
Qeyd edək ki, 4 saylı Xankəndi orta məktəbində keçirilən festivalın iştirakçılarına top, idman forması və başqa inventarlar hədiyyə edilib.
N.BAYRAMLI

Paylaş:

Baxılıb: 1109 dəfə