Aİ nazirlərinin müzakirəsi

Bakı:

27 °C

44 %

8 m/s

Əlaqə

AZ RU EN

Ana səhifə / Siyasət / Aİ nazirlərinin müzakirəsi

Aİ nazirlərinin müzakirəsi

21.07.2023 [10:25]

Münasibətlərin normallaşması prosesi diqqət mərkəzindədir

Nardar BAYRAMLI

Avropa İttifaqı (Aİ) ölkələrinin xarici işlər nazirləri ötən gün Brüsseldə keçirilən görüşdə Ukraynaya hərbi yardım və təhlükəsizlik təminatları, Türkiyə və Çin ilə münasibətlər kimi məsələlərlə yanaşı, Ermənistanla Azərbaycan arasında münasibətlərin normallaşdırılması prosesini də müzakirə ediblər. Avropa İttifaqının XİN Şurasının əsas iclası üç mövzuya həsr olunub. Bura Ukraynadakı münaqişə, iqtisadi təhlükəsizliyin xarici siyasət aspekti və Türkiyə ilə münasibətlər daxildir. Ötən günün ikinci yarısında nazirlər cari məsələləri, o cümlədən Çin, Latın Amerikası və Karib hövzəsi ölkələri ilə iyulun 17-18-də keçirilmiş toplantının nəticələrini, Ermənistanla Azərbaycan arasında münasibətlərin normallaşdırılması və s. məsələləri müzakirə ediblər.

Bu müzakirələr göstərir ki, Cənubi Qafqaz regionunda sülh və təhlükəsizliyin təmin olunması, o cümlədən Azərbaycanla Ermənistan arasında münasibətlərin normallaşdırılması məsələsi beynəlxalq birliyin diqqət mərkəzindədir. Xüsusilə, Azərbaycan ilə Ermənistan arasında sülh müqaviləsinin imzalanması məsələsi bölgənin strateji gündəliyinin və siyasi gündəminin aktual mövzusudur. Yeni mərhələdə bölgədə sabitlik və əməkdaşlıq mühitinin formalaşması, qarşıdurma və təhdidlərin istisna olunması üçün sülh müqaviləsinin imzalanması vacibdir.Bu gün sülh prosesində bir neçə beynəlxalq platforma mövcuddur. Bunlar Rusiyanın, Avropa İttifaqının və Amerika Birləşmiş Ştatlarının vasitəçiliyi ilə aparılan danışıqlardır. Rusiyanın vasitəçiliyi ilə liderlərin bir neçə üçtərəfli görüşlər keçirilib, bu görüşlərin nəticəsi olaraq üçtərəfli bəyanatlar imzalanıb. Son zamanlar ABŞ da vasitəçilik prosesində əhəmiyyətli dərəcədə fəallaşıb. Sülh prosesində Brüssel formatı xüsusilə diqqəti cəlb edir. Brüssel sülh gündəliyi təmasların intensivləşdirilməsi və nəticəyə yönəlik fəaliyyətin davam etdirilməsi baxımından əhəmiyyətlidir. Avropa İttifaqının qərəzsiz və bitərəf olaraq Cənubi Qafqaz regionunda etimad quruculuğu prosesində fəal iştirak etməsi faydalı və önəmlidir. Aİ regionda dayanıqlı sülh, etibarlı təhlükəsizlik və çoxtərəfli əməkdaşlıq mühitinin yaradılmasında maraqlıdır. Azərbaycan-Ermənistan münasibətlərinin normallaşdırılmasının tərəfdarı kimi, müvafiq təklif və təşəbbüslərlə çıxış edir. Digər tərəfdən, Avropa İttifaqı bu prosesdə Bakının mövqeyini əsas götürür. Çünki bu mövqe haqlı və qalib tərəfin, etibarlı tərəfdaşın yanaşmasını özündə əks etdirir, quruculuğa və proqressə xidmət edir.

Paylaş:

Baxılıb: 508 dəfə