Ağdamda təhqir edilmiş məscid...

Bakı:

19 °C

88 %

4 m/s

Əlaqə

AZ RU EN

Ana səhifə / Siyasət / Ağdamda təhqir edilmiş məscid...

Ağdamda təhqir edilmiş məscid...

15.02.2022 [10:10]

Erməni vandalizminin simasıdır

Nurlan QƏLƏNDƏRLİ

Hər bir xalqın xarakterini, mənəviyyatını əks etdirən göstəricilərdən biri milli-mənəvi, dini və bəşəri dəyərlərə yanaşmasıdır. 30 ilə yaxın müddət ərzində Ermənistanın işğalçı siyasətindən əziyyət çəkməsinə, müxtəlif vandalizm aktları ilə üzləşməsinə baxmayaraq, Azərbaycan xalqı iradəli, əzmkar və mübariz olmaqla yanaşı, humanist, tolerant və qurucu xalq olduğunu sübuta yetirib. Ermənilər isə 30 il ərzində işğal altında saxladıqları Azərbaycan torpaqlarında misli görünməmiş vəhşiliklər törədib, tarixi, dini, mədəni abidələri dağıdıblar, məscidlərimiz təhqir olunub. Bu, əslində, təkcə xalqımıza deyil, bütövlükdə, dünya mədəni irsinə, bəşər sivilizasiyasına qarşı barbarlıq, vandalizm aktı və soyqırımı siyasəti, cinayət əməlidir.

Postmüharibə dövrünün reallıqları erməni vandalizminin simasını daha aydın göstərir - daha dəqiq əks etdirir. İşğaldan azad edilmiş ərazilərin acınacaqlı mənzərəsi - dağıntılar, vandalizm aktları erməni faşizminin hansı bəşəri cinayətlərə imza atdığını nümayiş etdirir. Vəhşi qəbilə kimi kəndlərin, qəsəbələrin, şəhərlərin darmadağın edilməsi, dini abidələrin təhqirə məruz qoyulması erməni barbarizminin sərhəd tanımadığını göstərir. Dövlət başçısı Heydər Əliyev Fondu tərəfindən Ağdam Cümə məscidində görülən bərpa-restavrasiya işlərinin gedişi ilə tanışlıqdan sonra çıxışı zamanı bu məqamlara xüsusi diqqət yetirib. Müharibədən sonra Ağdama 3-cü dəfədir ki, səfər etdiyini, hər dəfə buraya gələndə ürəyinin ağrıdığını, çünki Ağdamda bir dənə də salamat bina olmadığını söyləyən Prezident İlham Əliyev “Təkcə bu yarıdağılmış məsciddir ki, onun da dam örtüyü zədələnmişdir. Bu məscid ermənilər tərəfindən təhqir edilib, burada inəklər, donuzlar saxlanılıb. Ermənilər nəinki Azərbaycan xalqını, bütün müsəlman aləmini təhqir ediblər”, - deyə vurğulayıb. Azərbaycan Prezidenti Ağdam rayonunda bu yarıdağılmış məsciddən başqa bir dənə də binanın ayaq üstə olmadığını deyib. O qeyd edib ki, bütün binalar, bütün kəndlərdəki evlər, ictimai binalar ermənilər tərəfindən dağıdılıb: “Bu, misli görünməmiş barbarlıqdır, vandallıqdır, vəhşilikdir. Bu, erməni faşizminin eybəcər sifətinin göstəricisidir. Bütün dünya bunu görməlidir və görür. Biz bundan sonra da xarici vətəndaşları buraya dəvət edəcəyik. Onlar gələcəklər və erməni vəhşiliyi nədir onu görəcəklər”.

Azərbaycan Prezidenti bir məscidin simasında erməni vəhşiliyini ifşa edir, beynəlxalq ictimaiyyətin diqqətini növbəti dəfə konkret faktlara - reallıqlara cəlb edir. Ümumiyyətlə, dövlət başçısının ictimai rəylə iş strategiyası Ermənistanın sülh və insanlıq əleyhinə cinayətləri ilə bağlı həqiqətlərin dünya ictimaiyyətinin diqqətinə dolğun surətdə çatdırılması baxımından böyük əhəmiyyətə malikdir. Bu, həm erməni vandalizminin ifşası, həm də ermənipərəst dairələrin qara piar kampaniyasının iflasa uğradılması üçün olduqca vacibdir. Təsadüfi deyil ki, Ermənistan havadarlarına əsaslanaraq yenidən özü üçün münbit informasiya mühitini yaratmaq niyyətini gerçəkləşdirə bilmir. Beynəlxalq mediaya nəzər yetirdikdə görürük ki, qalib Azərbaycanın haqlı, ədalətli və prinsipial mövqeyi dünya miqyasında geniş təbliğ olunur. Dünyanın nüfuzlu nəşrlərində Azərbaycan həqiqətlərinin təbliğ edildiyi, ermənilərin çirkin təbliğatının darmadağın olunduğu çox sayda informasiyaya və analitik materiallara rast gələ bilərik. Xüsusilə də, nüfuzlu ekspertlər, tanınmış jurnalistlər Azərbaycan Prezidentinin fikirlərinə və faktlara istinad etməklə mühüm məqamları gündəmə gətirirlər.

Proses davam edir: Azərbaycan həm qurur, yaradır və yaşadır, həm də erməni vandalizminin ifşasına nail olur. İşğaldan azad edilmiş ərazilərdə kənd və şəhərlərimizin, mədəni irsimizin bərpa olunması, yeni reallıqlar əsasında ölkəmizin və regionumuzun gələcəyinin inşa edilməsi Zəfər yürüşümüzün davam etdiyini göstərir!

Paylaş:

Baxılıb: 833 dəfə