Şuşa şəhərində və onun ətrafında “İsgəndər” raketinin qalıqlarının tapılması Ermənistanın faşist mahiyyətinin növbəti təsdiqidir

Bakı:

29 °C

41 %

7 m/s

AZ RU EN

Ana səhifə / Siyasət / Şuşa şəhərində və onun ətrafında “İsgəndər” raketinin qalıqlarının tapılması Ermənistanın faşist mahiyyətinin növbəti təsdiqidir

Şuşa şəhərində və onun ətrafında “İsgəndər” raketinin qalıqlarının tapılması Ermənistanın faşist mahiyyətinin növbəti təsdiqidir

06.04.2021 [08:58]

Xəbər verildiyi kimi, ANAMA-nın işğaldan azad edilmiş Şuşa şəhərində və onun ətrafında həyata keçirdiyi minalardan təmizləmə tədbirləri zamanı Rusiya istehsalı olan və böyük dağıdıcı gücə malik “İsgəndər” raketinin qalıqları tapılıb. Araşdırma zamanı müəyyən edilib ki, bu Operativ-Taktik Raket Kompleksi “İsgəndər-M” raketinin qalıqlarıdır. Qeyd edilməlidir ki, atılan raket tam partlamadığı üçün onun müəyyən hissələri böyük əraziyə səpələnib. ANAMA əməkdaşları bir-birindən xeyli aralı məsafədə raketin qalıqlarının aşkar olunduğu 4 ərazi müəyyən ediblər. Raketin qalıqları aprelin 2-də Bakıda media nümayəndələrinə nümayiş etdirilib.
Məsələ ilə bağlı fikirlərini bölüşən Milli Məclisin deputatı Sədaqət Vəliyeva bildirib ki, 44 günlük Vətən müharibəsi dövründə bir sıra hərbi cinayətlərə əl atan Ermənistan hətta qadağan olunmuş silahlarla cəbhə xəttindən kənarda yerləşən yaşayış məntəqələrinə hücumlar həyata keçirib. Bu, onların faşist mahiyyətinin növbəti sübutudur: “Şuşa şəhərində qalıqları tapılmış “İsgəndər-M” raketi ilə bağlı məsələyə gəldikdə isə açıq mənbələrdən əldə edilən məlumata görə, Rusiya Ermənistana “İsgəndər-M” raketinin sadələşdirilmiş variantı olan, 280 km məsafəyədək uçan “İsgəndər-E” raket kompleksi verib. Bununla müqayisədə “İsgəndər-M” raketi daha çox dağıdıcı qüvvəyə malikdir və 500 km-dək məsafə qət edə bilir. Amma belə olan halda, ortaya sual çıxır ki, əgər Rusiya Ermənistana “İsgəndər-M” raket kompleksi verməyibsə, Şuşada həmin raketin qalıqlarının tapılması necə izah oluna bilər. Xatırlasaq, Rusiya Prezidentinin Administrasiyasından yayılan məlumatda bildirilirdi ki, Qarabağda münaqişə zamanı “İsgəndər” raketlərindən istifadə olunmayıb. Lakin qalıqların tapılması bu açıqlamanı şübhə altına alır. Onu da nəzərə almaq lazımdır ki, həmin dövrlərdə Rusiyadan Ermənistana silahların qeyri-qanuni ötürülməsi, habelə bu prosesdə erməniəsilli Rusiya vətəndaşlarının iştirakı ilə bağlı fikirlər də səsləndirilirdi”.
Milli Məclisin deputatı Ramil Həsən də 44 günlük Vətən müharibəsi dövründə Ermənistanın Azərbaycan ərazisini davamlı şəkildə raket atəşinə tutduğunu, Gəncə, Bərdə, Tərtər şəhərlərinin böyük dağıdıcı qüvvəyə malik olan raketlərlə vurulduğunu deyib. Bu hücumlar nəticəsində isə çoxlu sayda mülki insan qətlə yetirilib və yaralanıb. Onun sözlərinə görə, Ermənistan kimi ölkələrə müasir silahların verilməsinin neqativ nəticələri 44 günlük müharibə dövründə bir daha özünü göstərdi. Faşist düşüncəli Ermənistanın bu silahları dinc azərbaycanlı əhaliyə qarşı işlətməsi günahsız insanların qətl edilməsi ilə nəticələndi: “Hələ 44 günlük müharibə dövründə ayrı-ayrı şəhərlərimizə atılan raket və bombalarla bağlı Baş Prokurorluğun yaydığı məlumatlarda da bu fakt öz əksini tapıb. Bundan başqa, 44 gün ərzində Tərtər rayonuna atılan raket və bomba qalıqları da deyilənləri təsdiqləyir. Eləcə də həmin dövrdə bəzi beynəlxalq qeyri-hökumət təşkilatlarının, hətta KİV-lərin nümayəndələri də ermənilərin qadağan olunmuş silahlardan istifadə etməsi ilə bağlı həm hesabatlar, həm də reportajlar hazırlayıblar. Bu, bir daha Ermənistanın təcavüzkar xislətini ortaya çıxarır, onların regionun təhlükəsizliyinə təhdid yaratdığını göstərir”.
Pərviz SADAYOĞLU

Paylaş:

Baxılıb: 638 dəfə