Hikmət Hacıyev: Müvafiq qurumlar vətəndaşlarımızı narahat edən məsələlərlə bağlı dərhal zəruri tədbirlər görürlər

Bakı:

30 °C

46 %

3 m/s

AZ RU EN

Ana səhifə / Siyasət / Hikmət Hacıyev: Müvafiq qurumlar vətəndaşlarımızı narahat edən məsələlərlə bağlı dərhal zəruri tədbirlər görürlər

Hikmət Hacıyev: Müvafiq qurumlar vətəndaşlarımızı narahat edən məsələlərlə bağlı dərhal zəruri tədbirlər görürlər

11.07.2020 [10:11]

Xaricdə olan vətəndaşlarımızın təxliyəsi ilə əlaqədar tədbirlər davam etdirilir. Çox müsbət haldır ki, digər ölkələrlə qarşılıqlı razılıq əsasında müntəzəm xarakter daşıyan xüsusi çarter reyslərinin həyata keçirilməsinə dair qərar verilib.

AZƏRTAC xəbər verir ki, bunu Nazirlər Kabineti yanında Operativ Qərargahın iyulun 10-da keçirilən brifinqində Azərbaycan Respublikası Prezidentinin köməkçisi-Prezident Administrasiyasının Xarici siyasət məsələləri şöbəsinin müdiri Hikmət Hacıyev bildirib.

Prezidentin köməkçisi deyib: “Bu gün İstanbul-Bakı istiqaməti üzrə həftəlik əsasda Azərbaycan Hava Yolları tərəfindən 4, Türk Hava Yolları tərəfindən 4 dəfə olmaqla reyslər həyata keçirilir. Təbii ki, burada da bəlli şərtlər var. Artıq Avropa istiqamətində də uçuş reyslərimiz açılır. Belə ki, Azərbaycan Hava Yollarının Bakı-London istiqamətində uçuşlarla bağlı Britaniyanın müvafiq strukturları ilə apardığı danışıqlar yekunlaşıb. Yaxın vaxtlarda həftədə bir dəfə olmaqla Bakı-London-Bakı istiqaməti üzrə reyslər həyata keçiriləcək. Həmçinin Avropa İttifaqının üzv ölkəsi olan Almaniya ilə Azərbaycan arasında Berlin-Bakı istiqamətində uçuş reyslərinin həyata keçirilməsi nəzərdə tutulur. Bu xüsusda qonşu ölkələrlə, o cümlədən Rusiyanın aidiyyəti strukturları ilə danışıqlar aparılır”.

Azərbaycan-Rusiya sərhədi boyunca tam sabitliyin hökm sürdüyünü söyləyən Hikmət Hacıyev qeyd edib ki, iyulun 6-12-də Azərbaycan-Rusiya sərhədi boyunca 250-dən çox vətəndaşımızın ölkəmizə keçməsi təmin olunub.

“Bu həftə ərzində Moskva-Bakı, Kiyev-Bakı, Ər-Riyad-Bakı, Dubay-Bakı istiqamətləri üzrə reyslər həyata keçirilib. Qarşıdakı həftə ərzində isə Rusiya-Azərbaycan sərhədində 250 vətəndaşımızın, həmçinin İran-Azərbaycan quru sərhədi, Türkiyə-Gürcüstan-Azərbaycan quru sərhədi boyunca digər ölkələrdə olan vətəndaşlarımızın öz şəxsi avtomobilləri, digər şəxsi nəqliyyat vasitələri ilə ölkəmizə gəlməsi nəzərdə tutulub. Bununla yanaşı, Gürcüstanda olan təxminən 200 vətəndaşımızın da ölkəmizə gətirilməsi nəzərdə tutulub. Bu vətəndaşlarımızın testdən keçmələri və 14 günlük karantin rejiminə əməl etmələri vacib şərtlərdən biridir. Həftə ərzində Budapeşt-Bakı, Daşkənd-Bakı, Moskva-Bakı, Yekaterinburq-Bakı və Doha-Bakı istiqaməti üzrə Azərbaycan vətəndaşlarının ölkəmizə gətirilməsi nəzərdə tutulub”, - deyə Prezidentin köməkçisi vurğulayıb.

Hikmət Hacıyev qeyd edib ki, Azərbaycanın xaricdəki diplomatik nümayəndəliklərində və səfirliklərdə çalışan vətəndaşlarımız arasında da yoluxma halları müəyyən olunub. Xüsusilə səfirliklərin əməkdaşları ilə yanaşı, onların ailə üzvləri arasında da yoluxma halları var. Meksikadakı, Moldovadakı və digər ölkələrdəki səfirliklərimizin əməkdaşları arasında yoluxma halları var. Buna baxmayaraq, Azərbaycanın xaricdəki diplomatik nümayəndəlikləri öz fəaliyyətlərini davam etdirirlər.

Cəzaçəkmə müəssisələrindəki epidemioloji vəziyyət barədə məlumat verən Prezidentin köməkçisi qeyd edib ki, 12 saylı cəzaçəkmə müəssisəsində 11 məhkumda, 14 saylı cəzaçəkmə müəssisəsində 5 məhkumda, 4 saylı cəzaçəkmə müəssisəsində 2 məhkumda testlərin nəticəsi pozitiv olub. Həmçinin Penitensiar Xidmətin əməkdaşları arasında da yoluxma halları müəyyən olunur ki, onlar da dərhal nəzarətə götürülür.

“Sosial mediada yayılan informasiyalar təhlil edilir, vətəndaşlarımız tərəfindən qaldırılan problemlər öyrənilir. Həmçinin konstruktiv tənqidlər də qəbul edilir və nəzarətə götürülür. Hər hansı şikayət, vətəndaşımızı narahat edən məsələ varsa, müvafiq qurumlar tərəfindən dərhal zəruri tədbirlər görülür. Həmişə olduğu kimi, bu məsələdə də dövlətimizlə vətəndaşlarımız arasında konstruktiv dialoq mövcuddur. Əsas məqsəd mövcud vəziyyətdən qısa müddət ərzində çıxış yolu tapmaqdır”, - deyə Hikmət Hacıyev vurğulayıb.

Paylaş:

Baxılıb: 397 dəfə