Azərbaycan-Rusiya əlaqələri strateji tərəfdaşlıq müstəvisində hərtərəfli inkişaf edir

Bakı:

29 °C

51 %

2 m/s

Əlaqə

AZ RU EN

Ana səhifə / Siyasət / Azərbaycan-Rusiya əlaqələri strateji tərəfdaşlıq müstəvisində hərtərəfli inkişaf edir

Azərbaycan-Rusiya əlaqələri strateji tərəfdaşlıq müstəvisində hərtərəfli inkişaf edir

13.07.2016 [09:48]

Azərbaycanın xarici işlər naziri Elmar Məmmədyarov iyulun 12-də rusiyalı həmkarı Sergey Lavrov ilə görüşüb.
AZƏRTAC xəbər verir ki, görüşdə iki ölkənin liderlərinin yüksək səviyyəli dialoqunun və nümayiş etdirdikləri siyasi iradənin Azərbaycan və Rusiya arasında əlaqələrin strateji tərəfdaşlıq müstəvisində hərtərəfli inkişafına ciddi təkan verdiyi qeyd edilib. Müntəzəm xarakter daşıyan yüksək səviyyəli qarşılıqlı səfərlərin əməkdaşlığın irəli aparılmasında mühüm amil olduğunu deyən nazirlər əlaqələrin ikitərəfli və çoxtərəfli gündəliyinə və Ermənistan-Azərbaycan, Dağlıq Qarabağ münaqişəsinin həlli prosesinə dair ətraflı fikir mübadiləsi aparıblar.
Ölkələrimiz arasında qarşılıqlı hörmət prinsipləri əsasında ikitərəfli əlaqələrin inkişafı baxımından 2008-ci il iyulun 3-də imzalanmış Azərbaycan Respublikası və Rusiya Federasiyası arasında dostluq və strateji tərəfdaşlıq haqqında Bakı Bəyannaməsinin mühüm siyasi əhəmiyyəti vurğulanıb.
Azərbaycan və Rusiya arasında 2003-cü ilin fevralından parlamentlərarası komissiyanın fəaliyyətini qeyd edən tərəflər iki ölkənin qanunverici orqanlarının əməkdaşlığının davamlı xarakter daşımasından məmnunluq ifadə ediblər.
Söhbət zamanı Ermənistan-Azərbaycan, Dağlıq Qarabağ münaqişəsinin həlli prosesində Vyana və Sankt-Peterburq görüşləri və bu xüsusda substantiv xarakter daşıyan danışıqların əhəmiyyəti vurğulanıb.
Ölkələrimiz arasında iqtisadi əlaqələrin inkişafında “Azərbaycan Respublikası ilə Rusiya Federasiyası arasında iqtisadi məsələlər üzrə Hökumətlərarası Komissiya”, kənd təsərrüfatı və energetika məsələləri üzrə işçi qrupun oynadığı mühüm rol qeyd olunub. Nazirlər 2011-ci ildən başlayaraq keçirilən Azərbaycan-Rusiya Regionlararası Forumunun ölkələrimiz arasında iqtisadi-ticarət əlaqələrinin artmasına əsaslı töhfə verdiyini diqqətə çatdırıblar.
İki ölkə arasında ticarət dövriyyəsinin həcmindən məmnunluq ifadə edən tərəflər birgə səylərlə ikitərəfli ticarət əlaqələrinin tempinin daha da artırılmasını gündəlikdə duran vacib məsələlərdən biri kimi qeyd ediblər.
Azərbaycan və Rusiya arasında neft maşınqayırma, neft-kimya, metallurgiya, dağ-mədən sənayesi, aviasiya sənayesi, avtomobil sənayesi və kənd təsərrüfatı maşınqayırması, nəqliyyat və ağır maşınqayırma, əczaçılıq, turizm və digər sahələrdə əməkdaşlığın daha da inkişafı üçün əlverişli imkanların mövcudluğu vurğulanıb.
Şimal-Cənub nəqliyyat dəhlizinin genişmiqyaslı tranzit daşımaları üçün əhəmiyyətini vurğulayan nazirlər bu sahədə Azərbaycan-İran-Rusiya üçtərəfli əməkdaşlığını qeyd ediblər.
Tərəflər Xəzər məsələsində də ölkələrimiz arasında qarşılıqlı anlaşma və əməkdaşlığın mövcudluğuna toxunaraq, Azərbaycan və Rusiyanın digər Xəzəryanı ölkələrlə birlikdə Xəzər dənizinin dostluq və əməkdaşlıq məkanı olması istiqamətdə səylər göstərdiklərini bildiriblər.
Nazirlər Azərbaycan-Rusiya əlaqələrinin inkişafında humanitar ölçülərin xüsusi əhəmiyyətini qeyd edərək bu xüsusda Azərbaycan-Rusiya Humanitar Forumu, Bakı Humanitar Forumu, təhsil, elm və mədəniyyət sahələrində əməkdaşlığın inkişafına dair birgə layihələri, Rusiya ali təhsil müəssisələrinin Azərbaycanda filiallarının açılması və Azərbaycan Dövlət İqtisad Universitetinin Dağıstanda filialının açılmasını qeyd ediblər.
Rusiya mədəniyyət və incəsənət xadimlərinin Bakıya qastrollarının müntəzəm xarakter daşıdığını deyən nazirlər Bakının mədəni həyatında mühüm hadisəyə çevrilən “Jara” musiqi festivalının uğurla keçdiyini vurğulayıblar.
Söhbət zamanı qarşılıqlı maraq doğuran digər məsələlər ətrafında fikir mübadiləsi aparılıb.
Görüşdən sonra nazirlər birgə mətbuat konfransı keçiriblər.

Paylaş:

Baxılıb: 683 dəfə