Novruz Məmmədov: Sankt-Peterburq görüşündə münaqişənin mərhələli həllinə dair razılığa gəlindi

Bakı:

25 °C

55 %

8 m/s

Əlaqə

AZ RU EN

Ana səhifə / Siyasət / Novruz Məmmədov: Sankt-Peterburq görüşündə münaqişənin mərhələli həllinə dair razılığa gəlindi

Novruz Məmmədov: Sankt-Peterburq görüşündə münaqişənin mərhələli həllinə dair razılığa gəlindi

23.06.2016 [10:17]

“İyunun 20-də Rusiya Prezidenti Vladimir Putinin təşəbbüsü ilə Azərbaycan və Ermənistan prezidentlərinin Rusiyanın Sankt-Peterburq şəhərində görüşü keçirildi. Görüş zamanı Ermənistan-Azərbaycan, Dağlıq Qarabağ münaqişəsinin həlli məsələsi ilə bağlı müzakirələr aparıldı, münaqişənin mərhələli həllinə dair razılığa gəlindi”. Bu sözləri Azərbaycan Prezidenti Administrasiyası rəhbərinin müavini, Xarici əlaqələr şöbəsinin müdiri Novruz Məmmədov deyib.
Onun sözlərinə görə, Sankt-Peterburq görüşü olduqca konstruktiv keçdi və aparılan müzakirələr zamanı münaqişənin həlli məsələsiylə bağlı konkret təkliflər səsləndirildi: “Vyana və Sankt-Peterburq görüşləri aprel hadisələrindən sonra yaranmış yeni şərait çərçivəsində baş tutdu. Bundan öncə - aprel hadisələri zamanı işğalçı ölkənin törətdiyi təxribatlara layiqli cavab verilməsi bir daha Ermənistana açıq mesaj oldu. Baş verən hadisələr beynəlxalq birliyə, ATƏT-in Minsk qrupu ölkələrinə onu göstərdi ki, bu münaqişə tezliklə öz həllini tapmalıdır. Bütün hallarda hər iki görüşün də konstruktiv keçdiyini əminliklə demək olar. Görüşlərin ümumi nəticəsi çərçivəsində birmənalı şəkildə bu qənaətə gəlindi ki, Dağlıq Qarabağ münaqişəsi dondurulmuş münaqişə deyil və bu problem tezliklə həll olunmalıdır”.
N.Məmmədov bildirib ki, Sankt-Peterburq görüşü çərçivəsində təmas xəttində gərginliyin azaldılması, monitorinq qrupunun üzvlərinin artırılması, danışıqların konstruktiv şəkildə davam etdirilməsi kimi məsələlər xüsusilə diqqət mərkəzində olub. Onun sözlərinə görə, bundan sonra münaqişənin həllində mərhələli şəkildə irəliyə getmək lazımdır: “Münaqişənin mərhələli həlli məlumdur. Əvvəlcə Azərbaycanın 5 rayonunun azad olunması, ondan sonra 2 rayonun azad olunması və dəhlizin müəyyən edilməsi nəzərdə tutulur. Daha sonra Dağlıq Qarabağın statusunun müəyyənləşdirilməsi məsələsi gəlir. Deyə bilərəm ki, bu istiqamətdə tərəflər prinsip etibarilə irəliyə addım atmaq barədə razılığa gəldilər. Görünən odur ki, hələlik bu məsələlərlə bağlı ümumi razılığa gəlinib. Amma bəzi hallarda bu cür situasiyalarda Ermənistan tərəfindən sonradan təxribat xarakterli addımlar atılır və ümumi razılaşmaya əməl olunmur”.
Prezident Administrasiyası rəhbərinin müavini əlavə edib ki, münaqişənin geosiyasi baxımdan çox mühüm əhəmiyyət daşıyan bir regionda həll olunması bütün tərəflər üçün faydalı olar: “Yəni Dağlıq Qarabağ münaqişəsinin həlli regional və qlobal miqyasda təhlükəsizlik üçün töhfə olar. Qeyd etdiyim kimi, Sankt-Peterburq görüşü zamanı aparılan müzakirələr, ortaya qoyulan mövqelər əsas etibarilə münaqişənin indiki vəziyyətdə hansı yollarla həll edilməsi ətrafında cərəyan etdi və Dağlıq Qarabağ münaqişəsinin mərhələli həll variantına üstünlük verildi. Prinsip etibarilə bütün bunlarla bağlı ümumi razılıq əldə olundu, bu, hələ ki, heç bir sənəd üzərində deyil”.
N.QƏLƏNDƏRLİ

Paylaş:

Baxılıb: 647 dəfə