Azərbaycan Respublikası Hökuməti ilə Çex Respublikası Hökuməti arasında iqtisadi, elmi-texniki və mədəni əməkdaşlıq üzrə Qarışıq Komissiyanın 2-ci iclası keçirilib

Bakı:

27 °C

47 %

2 m/s

AZ RU EN

Ana səhifə / Siyasət / Azərbaycan Respublikası Hökuməti ilə Çex Respublikası Hökuməti arasında iqtisadi, elmi-texniki və mədəni əməkdaşlıq üzrə Qarışıq Komissiyanın 2-ci iclası keçirilib

Azərbaycan Respublikası Hökuməti ilə Çex Respublikası Hökuməti arasında iqtisadi, elmi-texniki və mədəni əməkdaşlıq üzrə Qarışıq Komissiyanın 2-ci iclası keçirilib

26.04.2014 [12:00]

Aprelin 25-də Bakı Biznes Mərkəzində Azərbaycan Respublikası Hökuməti ilə Çex Respublikası Hökuməti arasında iqtisadi, elmi-texniki və mədəni əməkdaşlıq üzrə Qarışıq Komissiyanın 2-ci iclası keçirilib.
Tədbirdə Qarışıq Komissiyanın həmsədrləri - Azərbaycan Respublikası iqtisadiyyat və sənaye nazirinin müavini Niyazi Səfərov, Çex Respublikası sənaye və ticarət nazirinin müavini İrji Qavliçek, eləcə də hər iki tərəfdən komissiyada təmsil olunan müvafiq qurumların nümayəndələri iştirak ediblər.
AzərTAc xəbər verir ki, iclasda komissiyanın həmsədri, iqtisadiyyat və sənaye nazirinin müavini Niyazi Səfərov çıxış edərək hər iki ölkə arasında siyasi, iqtisadi və mədəni əlaqələrin yüksələn xətlə inkişaf etdiyini vurğulayıb. Bildirilib ki, ölkələrimiz arasında əlaqələrin uğurlu inkişafında dövlət başçılarının, rəsmi nümayəndə heyətlərinin və işgüzar dairələrin qarşılıqlı səfərləri böyük əhəmiyyət kəsb edir.
Komissiyanın 1-ci iclasından ötən müddət ərzində görülmüş işlər barədə məlumat verən nazir müavini iki ölkə arasında müqavilə-hüquq bazasının təkmilləşdirilməsi istiqamətində bir sıra işlərin görüldüyünü, turizm, mədəniyyət, muzey işi və kitabxana sahəsində sənədlərin imzalandığını diqqətə çatdırıb. Qeyd edilib ki, ölkələrimiz arasında beynəlxalq yükdaşımalarına dair saziş layihəsi isə razılaşdırma mərhələsindədir. Sənaye, kənd təsərrüfatı, nəqliyyat, maliyyə, səhiyyə, mədəniyyət sahələrində də komissiyanın 1-ci iclasından ötən müddətdə əlaqələrimiz genişlənib.
Niyazi Səfərov ölkələrimizin potensialından istifadə edərək mövcud iqtisadi əlaqələrin daha da genişləndirilməsinin, biznes forum, sərgi və s. tədbirlərin keçirilməsinin əhəmiyyətini vurğulayıb, Azərbaycanın hazırkı sosial-iqtisadi vəziyyəti və qazanılmış uğurlar barədə danışıb.
Çex Respublikasının sənaye və ticarət nazirinin müavini İrji Qavliçek ölkəsinin Azərbaycan ilə əlaqələrə önəm verdiyini qeyd edərək, komissiyanın ölkələrimiz arasında əməkdaşlığın inkişafında əhəmiyyətli rol oynadığını diqqətə çatdırıb. Müxtəlif sahələrdə əlaqələrin genişləndirilməsi perspektivlərinə dair fikirlərini bölüşən nazir müavini ölkəsinin iqtisadiyyatı barədə məlumat verib.
Sonda Azərbaycan Respublikası Hökuməti ilə Çex Respublikası Hökuməti arasında iqtisadi, elmi-texniki və mədəni əməkdaşlıq üzrə Qarışıq Komissiyanın 2-ci iclasının yekunlarına dair Protokol imzalanıb. Sənədi Qarışıq Komissiyanın həmsədrləri - Azərbaycan Respublikası iqtisadiyyat və sənaye nazirinin müavini Niyazi Səfərov, Çex Respublikası sənaye və ticarət nazirinin müavini İrji Qavliçek imzalayıblar.
Protokola əsasən, ticarət, qarşılıqlı investisiya qoyuluşu, kiçik və orta biznesin və sənayenin inkişafı, energetika, kənd təsərrüfatı, nəqliyyat, İKT, təhsil, səhiyyə, turizm, mədəniyyət, ətraf mühitin mühafizəsi sahələrində əməkdaşlığın davam etdirilməsi nəzərdə tutulur.

Paylaş:

Baxılıb: 776 dəfə