Humanizm və mərhəmət aktı...

Bakı:

22 °C

88 %

6 m/s

Əlaqə

AZ RU EN

Ana səhifə / MEDİA / Humanizm və mərhəmət aktı...

Humanizm və mərhəmət aktı...

23.05.2025 [08:13]

28 mayda əfv olacaq?

İnsan hüquq və azadlıqlarının müdafiəsi dövlət siyasətimizin prioritet istiqamətlərindən biridir. Müstəqilliyimizin bərpasından sonra Azərbaycanda hüquqi dövlət quruculuğu sahəsində ardıcıl və kompleks islahatlar həyata keçirilib, bu istiqamətdə fundamental hüquqi baza formalaşdırılıb. Belə ki, insan hüquq və azadlıqları son dərəcə ciddi şəkildə qorunmaqdadır. Dövlət üçün prioritet olan bu məsələ hər zaman ali səviyyədə diqqətdə saxlanılıb. Azərbaycanda irqindən, dinindən, milliyyətindən asılı olamayaraq, hər kəsin hüquq və azadlıqları təmin edilməkdədir. Bu proses ölkə Prezidentinin də qarşısına qoyduğu əsas prioritet məsələlərdən birinə çevrilib.

Əfv sərəncamı humanizmin, insanpərvərliyin, mərhəmətin təntənəsidir. Həm əfv sərəncamları, həm də aministiya aktlarının təsdiqi insanların dövlətə inam və etimadının artırılmasında mühüm əhəmiyyət kəsb edir. Çünki əfv fərmanı ilə azadlığa qovuşan insanlar arasında cinayət törədənlər də var. Onların cəmiyyətə inteqrasiyası, vurduğu zərərin ödənilməsi və tərəflərlə barışığı nəzərə alınır. Bu baxımdan əfv sərəncamı insan hüquq və azadlıqlarına verilən dəyərin göstəricisidir. Məhz bunun bariz nümunəsi kimi Azərbaycanın dövlətçiliyi tarixində ənənəvi olaraq bayramlar ərəfəsində Prezident İlham Əliyev tərəfindən əfv sərəncamları imzalanır. 28 May Müstəqillik Günü ərəfəsində də növbəti humanist addımın atılacağına dair gözləntilər var.

800-dək müraciətə baxılıb

Bu günlərdə Prezident yanında Əfv Məsələləri Komissiyasının 2025-ci il üçün sayca 7-ci - sonuncu iclası keçirilib. İclasda 100-dən artıq müraciətə baxılıb. Bununla da komissiyaya daxil olan müraciətlərə baxılaraq bu il üçün iclaslara yekun vurulub. Müsbət rəy verilən müraciətlər siyahısı ölkə Prezidentinə təqdim ediləcək.

Qeyd edək ki, Əfv Məsələləri Komissiyasının 2025-ci il üzrə keçirilən iclaslarda ümumilikdə 800-dən çox müraciətə baxıb.

Siyahı Prezidentə təqdim olunacaq

Əfv Məsələləri Komissiyasının üzvü Əliməmməd Nuriyev “Yeni Azərbaycan”a açıqlamasında bildirib ki, əfv institutu dövlət siyasətimizin humanist mahiyyətini əks etdirən mühüm hüquqi və siyasi alətlərdən biridir. Onun sözlərinə görə, 2025-ci ilin “Konstitusiya və Suverenlik İli” elan edilməsi fonunda cəmiyyətdə əfv gözləntiləri artsa da, bu, yalnız Azərbaycan Prezidentinin qərarından asılıdır: “Əfv sərəncamına əsasən, müvafiq şəxslərə münasibətdə cəzanın azaldılması, yaxud cəzasının çox hissəsini çəkmiş şəxslərin azad olunması istiqamətində tədbirlər həyata keçirilir. Əfv sərəncamı cəza siyasətinin humanistləşdirilməsi istiqamətində atılan addımlardan biri kimi dəyərləndirilir. Cəmiyyət hər zaman əfv sərəncamının imzalanmasını gözləyir. Aydın məsələdir ki, xüsusilə məhkumların ailələri bu xəbəri səbirsizliklə gözləyirlər. Hesab edirəm ki, ehtiyatsızlıqdan cinayət törətmiş şəxslərin əfv sərəncamına düşməsi sevindirici hal kimi qarşılana bilər. Proses artıq yekunlaşıb, rəy verilən müraciətlərin siyahısı Prezident İlham Əliyevə təqdim olunacaq. Yaxın günlərdə sərəncam verilərsə, siyahı açıqlanacaq”.

“28 may ərəfəsində əfv ola bilər...”

Komissiyanın üzvü Rəşad Məcidin sözlərinə görə, yanvardan bəri 7 iclas keçirib və proses yekunlaşıb: “Yəqin ki, 28 May ərəfəsində yeni əfv sərəncamı imzalanacaq. Hər il mart və ya may ayında əfv sərəncamları imzalanır. Azərbaycan Prezidenti yanında Əfv Məsələləri Komissiyası adətən yanvar ayından işləməyə başlayır, müraciətləri təhlil edir və sənədlər hazır olandan sonra cənab Prezidentə təqdim olunur. Əfv məsələləri Prezidentin müstəsna səlahiyyətidir, humanizm və mərhəmət aktıdır. Yəqin ki, biz Prezident tərəfindən növbəti əfv sərəncamının imzalanmasının şahidi olacağıq”.

Respublikamızda humanizm prinsiplərinə xidmət edən xeyirxah tədbirlərin həyata keçirilməsi, cəzasının müəyyən bir hissəsini çəkən və törətdiyi əməldən peşmançılıq keçirən məhkum olunmuş şəxslərin əfv edilməsi, onlara yeni şans verilməsi ənənəyə çevrilib. Xatırladaq ki, sonuncu əfv sərəncamı 2024-cü ilin may ayında imzalanıb. Belə ki, mayın 25-də Prezident İlham Əliyev “Məhkum edilmiş bir sıra şəxslərin əfv olunması haqqında” sərəncam imzalayıb. Sərəncama əsasən 154 nəfər əfv edilib.

Yeganə

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “İnsan hüquq və azadlıqlarının müdafiəsi, vətəndaşların hüquqi, siyasi mədəniyyət səviyyəsinin yüksəldilməsi, sosial və siyasi fəallığının artırılması” istiqaməti üzrə hazırlanmışdır.

Paylaş:

Baxılıb: 710 dəfə

Xəbər lenti

Hamısına bax