Heydər Əliyev
yeni azerbaycan logo

Ana səhifə / İqtisadiyyat / Azərbaycan dünyaya nümunə göstərir

Azərbaycan dünyaya nümunə göstərir

25.11.2021 [11:07]

Ölkəmizdə dizayn edilən və reallaşdırılan “İqtisadi İslahatların İdarəedilməsi Modeli” qlobal miqyasda innovativ təcrübə kimi qəbul olunub - OECD-in dəyərləndirməsi

Son 18 ildə respublikamızda müxtəlif istiqamətlərdə uğurla reallaşdırılan islahatlar beynəlxalq səviyyədə ciddi rezonans doğurub. Bunu Dünya Bankının, Beynəlxalq Valyuta Fondunun, Davos İqtisadi Forumunun və bir sıra nüfuzlu reytinq agentliklərinin hesabatlarında yer alan dəyərləndirmələrdən də görmək mümkündür. Həmin hesabatlarda Azərbaycanın adının dünyanın on ən islahatçı ölkəsi sırasında yer alması qürurverici haldır. Belə xoş soraqlardan biri də  İqtisadi Əməkdaşlıq və İnkişaf Təşkilatından (OECD) gəlib. Qurum Azərbaycanda dizayn edilən və reallaşdırılan “İqtisadi İslahatların İdarəedilməsi Modeli”ni qlobal miqyasda nümunəvi innovativ təcrübə olaraq rəsmi platformasında göstərib.

İslahatlar inkişafa güclü impuls verir

Ötən illərin təcrübəsinə nəzər salsaq, görərik ki, ölkəmizdə iqtisadi inkişafın ardıcıllığının təmin olunması üçün həm hüquqi baza davamlı şəkildə möhkəmləndirilib, həm də praktiki müstəvidə  zəruri tədbirlər görülüb, iqtisadi subyektlərin öz fəaliyyətlərini genişləndirmələrinə dəstək artırılıb. Yeni iqtisadi şəraitdə Prezident İlham Əliyev milli iqtisadiyyatımızda istehsal və ixrac imkanlarının genişləndirilməsini hədəfləyən çoxsaylı Fərman və sərəncamlar imzalayıb. Bəhs olunan sənədlər əsasında reallaşdırılan islahatlar indiki mərhələdə meydana çıxan yeni çağırışlar nəzərə alınmaqla, daxili imkanlardan maksimum səmərə ilə istifadə edilməsinə hədəflənib. Bütövlükdə, islahatların spektri kifayət qədər rəngarəng və əhatəlidir. Respublikamızda biznes mühitinin daha da optimallaşdırılması, sahibkarların maliyyə mənbələrinə çıxış imkanlarının genişləndirilməsi, sərmayə cəlbediciliyinin artırılması, investisiya qoyuluşunun, ixracın təşviq edilməsi, vergitutma bazasının genişləndirilməsi yolu ilə vergi yükünün azaldılması, daxili istehsalın qorunması, kölgə iqtisadiyyatının aradan qaldırılması və digər aktual məsələlər ölkəmizin islahatlar proqramında xüsusi yer tutur. Respublikamız Prezident İlham Əliyevin 2016-cı ilin dekabrında imzaladığı müvafiq Fərman əsasında iqtisadiyyatın 11 mühüm sektoru üzrə strateji yol xəritələri qəbul edib. Bəhs olunan sənədlərdə mühüm sahələrin və bütövlükdə milli iqtisadiyyatımızın yaxın, orta və uzunmüddətli dövrdə strateji inkişaf istiqamətləri öz əksini tapıb.

Dərin nəzəri əsaslandırmalar, praktiki müstəvidəki münbit zəmin və dövlətin güclü siyasi iradəsi, genişmiqyaslı dəstək tədbirləri respublikamızda davamlı şəkildə aparılan islahatların yüksək funksionallığını təmin edir. Ölkəmizin reallıqlarına istinadən deyə bilərik ki, kompleks səciyyə daşıyan islahatlar Azərbaycanın hərtərəfli inkişafına güclü impuls verib. Aparılan islahatların məntiqi nəticəsi olaraq respublikamızda yüksək rəqabət qabiliyyətinə malik iqtisadiyyat formalaşıb. Son 18 ilin göstəriciləri ölkəmizin Prezident İlham Əliyev tərəfindən innovativ əsaslı güclü  iqtisadiyyat quruculuğu ilə bağlı qarşıya qoyulan strateji hədəfə doğru inamla irəlilədiyini əyani şəkildə təsdiqləyir.

OECD-in dəyərləndirmələri ölkəmizin nüfuzunun daha da artmasına müsbət təsir göstərəcək

Bütün dünyada nüfuzlu qurum kimi tanınan OECD-nin müvafiq platformasında müxtəlif parametrlər baxımından ən yaxşı innovativ layihələr yayımlanır. Qurum dəyərləndirmələrində hansısa bir subyektiv yanaşmadan söhbət belə gedə bilməz. Azərbaycanın “İqtisadi İslahatların İdarə­edilməsi Modeli”nin OECD tərəfindən nümunəvi innovativ təcrübə kimi qəbul edilməsi böyük və ardıcıl işin nəticəsidir. Bu məqsədlə 2019-cu ildən etibarən bəhs olunan qurumla intensiv danışıqlar və müzakirələr aparılıb. Qeyd edək ki, qurumun platformasında əsas üstünlük Böyük Britaniya, Kanada və ABŞ kimi ölkələrə məxsusdur. Azərbaycanda reallaşdırılan iqtisadi islahatların OECD tərəfindən innovativ təcrübə kimi qəbul edilməsi ölkəmizin günbəgün yüksələn nüfuzunun daha da artmasına müsbət təsir göstərəcək. “OECD tərəfindən Azərbaycanın iqtisadi modelinə verilən yüksək qiymət ölkəmizin dünyada imicini daha da yaxşılaşdıracaq, investor inamını artıracaq və beynəlxalq, regional miqyaslı layihələrin həyata keçirilməsində mövqelərimizi gücləndirəcək. Bu, həm də postkonflikt quruculuğu və regional inkişafda Azərbaycanın aparıcı roluna əlavə bir stimuldur”. Bu fikirləri İqtisadi İslahatların Təhlili və Kommunikasiya Mərkəzində (İİTKM) keçirilən mətbuat konfransında qurumun icraçı direktoru Vüsal Qasımlı deyib.

OECD-nin rəsmi platformasında ölkəmizin iqtisadi modeli haqqında məlumatlar ətraflı və strukturlaşdırılmış formada təqdim olunub. Burada modelin yenidənqurma prosesində özəl sektor və sivil cəmiyyətin rəqabətqabiliyyətliliyinin artırılması yolu ilə çağırışların aradan qaldırılması, dövlət xidmətlərində şəffaflıq səviyyəsinin daha da yüksəldilməsi və rəqəmsal dövlət xidmətlərinin inkişaf etdirilməsi kimi məsələlərdə rolu barədə məlumatlar qeyd edilib.

M.ABDULLAYEV

 

Paylaş
Baxılıb: 106 dəfə

Xəbər lenti

Hamısına bax

Manata inam artır

27 Noyabr 10:15

ARXİV
B Be Ça Ç Ca C Ş
1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30