Dostluq və qarşılıqlı etimad əsasında inkişaf edən münasibətlər

Bakı:

22 °C

83 %

7 m/s

Əlaqə

AZ RU EN

Ana səhifə / Arxiv / Dostluq və qarşılıqlı etimad əsasında inkişaf edən münasibətlər

Dostluq və qarşılıqlı etimad əsasında inkişaf edən münasibətlər

15.10.2026 [16:22]

Azərbaycan Respublikasının Prezidenti İlham Əliyevin oktyabrın 13-də Laos Xalq Demokratik Respublikasının Prezidenti Thonqlun Sisulitin Azərbaycana rəsmi səfəri zamanı mətbuata verdiyi bəyanat iki ölkə arasında dostluq münasibətlərinin möhkəmləndirilməsi və qarşılıqlı əməkdaşlığın genişləndirilməsi baxımından mühüm əhəmiyyət daşıyır. Bəyanatda Azərbaycan-Laos əlaqələrinin mövcud vəziyyəti, gələcək inkişaf perspektivləri və qarşılıqlı maraq doğuran sahələr üzrə əməkdaşlığın dərinləşdirilməsi məsələləri diqqət mərkəzində olub.

Prezident İlham Əliyev çıxışında Laos Prezidentini Azərbaycanda salamlamaqdan məmnunluğunu ifadə edərək bu səfərin ikitərəfli münasibətlərə müsbət təsir göstərəcəyinə və əməkdaşlığın daha da dərinləşməsinə töhfə verəcəyinə əminliyini bildirib. Dövlət başçısı vurğulayıb ki, səfər çərçivəsində keçirilən təkbətək və geniştərkibli görüşlər zamanı mühüm məsələlər müzakirə olunub, gələcək əməkdaşlığın inkişafı üçün konkret addımlar müəyyənləşdirilib.

Bəyanatın mühüm məqamlarından biri Azərbaycan ilə Laos arasında Birgə Bəyanatın qəbul edilməsi olub. Prezident İlham Əliyevin qeyd etdiyi kimi, bu sənəd gələcək əməkdaşlığın əsas istiqamətlərini müəyyənləşdirir və qarşılıqlı münasibətlərin inkişafı üçün mühüm zəmin yaradır. Birgə Bəyanat iki ölkənin ortaq niyyətlərini, əməkdaşlıq imkanlarını və gələcək hədəflərini özündə əks etdirən vacib siyasi sənəddir.

Dövlət başçısı Azərbaycanla Laos arasında siyasi əlaqələrin uzun illərdir uğurla inkişaf etdiyini xüsusi vurğulayıb. Otuz ildən artıqdır davam edən diplomatik münasibətlər qarşılıqlı hörmət, etimad və beynəlxalq məsələlərdə həmrəylik prinsiplərinə əsaslanır. Hər iki ölkənin beynəlxalq təşkilatlar çərçivəsində bir-birinə dəstək göstərməsi, parlamentlərarası əlaqələrin inkişafı və hakim partiyalar arasında əməkdaşlıq mövcud münasibətlərin möhkəm təməl üzərində qurulduğunu təsdiqləyir.

Prezident İlham Əliyev iqtisadi əlaqələrin də siyasi münasibətlərin səviyyəsinə uyğun inkişaf etdirilməsinin vacibliyini diqqətə çatdırıb. Bu baxımdan ticarət dövriyyəsinin artırılması, biznes dairələri arasında əlaqələrin genişləndirilməsi və qarşılıqlı investisiya imkanlarının araşdırılması əsas vəzifələrdəndir. Bakıda keçirilməsi nəzərdə tutulan Laos-Azərbaycan biznes-forumunun bu istiqamətdə mühüm rol oynayacağı gözlənilir. Energetika, mədənçilik, kənd təsərrüfatı, nəqliyyat-logistika və digər sahələrdə əməkdaşlıq imkanlarının mövcudluğu münasibətlərin daha geniş müstəvidə inkişafına şərait yaradır.

Humanitar əlaqələrin gücləndirilməsi də bəyanatda xüsusi yer tutub. Vaxtilə iki mindən çox laoslu tələbənin Azərbaycanda təhsil alması xalqlarımız arasında formalaşmış əlaqələrin əhəmiyyətli göstəricisidir. Bu ənənənin bərpası və təqaüd imkanlarının genişləndirilməsi gələcək nəsillər arasında dostluq münasibətlərinin möhkəmlənməsinə xidmət edəcək.

Prezident İlham Əliyevin “Laos bizim üçün dost ölkədir” fikri Azərbaycan-Laos münasibətlərinin mahiyyətini aydın ifadə edir. Bu dostluq uzun illər ərzində formalaşmış qarşılıqlı hörmətə, siyasi dialoqa və beynəlxalq əməkdaşlığa əsaslanır. Laos Prezidentinin Azərbaycana ilk rəsmi səfəri isə əlaqələrin tarixində mühüm hadisə olmaqla yanaşı, münasibətlərin yeni mərhələyə yüksəlməsi üçün əlverişli imkan yaradır.

Oktyabrın 13-də səsləndirilən bəyanat Azərbaycan ilə Laos arasında dostluğun möhkəmləndirilməsi, siyasi dialoqun davam etdirilməsi və iqtisadi-humanitar əməkdaşlığın genişləndirilməsi istiqamətində aydın yol xəritəsi ortaya qoyur. Qarşılıqlı maraq və siyasi iradəyə əsaslanan bu münasibətlərin gələcəkdə konkret layihələr və əməli nəticələrlə daha da zənginləşəcəyi gözlənilir.

Lalə Mədətova

YAP Kəngərli rayon təşkilatının əməkdaşı

Paylaş:

Baxılıb: 43 dəfə

Xəbər lenti

Hamısına bax