Həyat yolunun 62-ci baharında vəfat edən Zərifə xanım Əliyeva – nurla yazılmış ömrün əbədiyaşar salnaməsi

Bakı:

16 °C

63 %

9 m/s

AZ RU EN

Ana səhifə / Arxiv / Həyat yolunun 62-ci baharında vəfat edən Zərifə xanım Əliyeva – nurla yazılmış ömrün əbədiyaşar salnaməsi

Həyat yolunun 62-ci baharında vəfat edən Zərifə xanım Əliyeva – nurla yazılmış ömrün əbədiyaşar salnaməsi

14.04.2026 [15:26]

Bəzən elə ömürlər olur ki, zamanın ölçüləri ilə deyil, qoyduğu izlərlə dəyərləndirilir. Zərifə xanım Əliyeva məhz belə ömürlərdən birinin sahibidir. Onun həyatı illərin sayına sığmayan, mənəvi dərinliyi ilə nəsillərə örnək olan bir həyat yoludur. Həyatının 62-ci baharında dünyasını dəyişsə də, o, əslində heç vaxt bu dünyadan getmədi — çünki Onun kimi insanlar xatirələrdə yaşadığı kimi, qəlblərdə də yaşayır.

Zərifə Əliyeva 28 aprel 1923-cü ildə Azərbaycanın dilbər guşəsi olan Naxçıvan Muxtar Respublikası Şərur rayonunun Şahtaxtı kəndində anadan olmuşdur. O, Azərbaycanın tanınmış dövlət və ictimai xadimi Əziz Əliyevin ailəsində böyümüşdür. Uşaqlıq illərindən elmə və təhsilə böyük maraq göstərən Zərifə xanım orta təhsilini başa vurduqdan sonra Azərbaycan Dövlət Tibb İnstitutuna daxil olmuşdur. Zərifə xanımın həyat yolu elmə, insana və ailəyə xidmətin mükəmməl vəhdətidir. O, oftalmologiya sahəsində qazandığı nailiyyətlərlə yalnız Azərbaycan tibb elminə deyil, bütövlükdə insan sağlamlığına böyük töhfələr vermişdir. Onun tədqiqatları, xüsusilə peşə ilə bağlı yaranan göz xəstəliklərinin öyrənilməsi istiqamətində apardığı işlər, bu gün də aktuallığını qoruyur. Lakin onun böyüklüyü yalnız elmi uğurlarla ölçülmür. O, hər şeydən əvvəl mükəmməl insan idi — mərhəmətli, diqqətli, saf qəlbli bir insan.

Onun həkim kimi fəaliyyətində bir prinsip daim ön planda idi: “insanı dinləmək, onu anlamaq və ümid vermək”. Çünki Zərifə xanım üçün həkimlik yalnız peşə deyildi, bir missiya idi. O, hər bir xəstəyə yalnız tibbi yardım göstərmir, eyni zamanda mənəvi dayaq olurdu. Bəlkə də elə buna görə onun yanına gələn insanlar yalnız sağalmaq üçün deyil, təsəlli tapmaq üçün də gəlirdilər.

Bu böyük şəxsiyyətin həyatında ailə bağlılığı xüsusi yer tuturdu. Ulu Öndər Heydər Əliyev kimi qüdrətli bir liderin həyat yoldaşı olmaq, onunla çiyin-çiyinə uzun və çətin bir yol keçmək hər kəsə nəsib olmur. Lakin Zərifə xanım bu məsuliyyəti sadəliyi, səbr və müdrikliyi ilə daşıyırdı. Ulu Öndərin həyatında onun rolu təkcə bir ömür-gün yoldaşı olmaqdan ibarət deyildi. O, həm də mənəvi dayaq, etibarlı sirdaş və çətin anlarda güc verən bir insan idi. Onların münasibəti qarşılıqlı hörmətin, sədaqətin və dərin bağlılığın ən gözəl nümunələrindən biri idi. Ulu Öndər xatirələrində Zərifə xanım haqqında danışarkən onu yalnız həyat yoldaşı kimi deyil, yüksək mənəviyyata malik, zərif və müdrik bir insan kimi təsvir edirdi. Ulu Öndərin sözlərində Zərifə xanımın simasında həm böyük alim, həm qayğıkeş ana, həm də sədaqətli ömür-gün yoldaşı obrazı birləşirdi. Onun xatirələrində tez-tez bu fikir səslənirdi ki, Zərifə xanım ailənin mənəvi dayağı idi. Çətin və məsuliyyətli dövrlərdə belə o, sakitliyi, səbr və müdrikliyi ilə ailədə ahəng yaradır, hər kəsə güc verirdi. Heydər Əliyev üçün Zərifə xanım təkcə həyat yoldaşı deyil, həm də etibarlı dost və sirdaş idi.

Ulu Öndər həmçinin onun elmə olan sədaqətini yüksək qiymətləndirirdi. Zərifə xanımın həkimlik fəaliyyətində insanlara sevgi ilə yanaşmasını xüsusi qeyd edir, onun hər bir xəstəyə fərdi münasibət göstərməsini böyük insani keyfiyyət kimi dəyərləndirirdi. Bu xatirələrdə ən diqqətçəkən məqamlardan biri də Ulu Öndərin Zərifə xanıma olan dərin hörmət və sevgisidir. Onun haqqında danışarkən hər zaman ehtiram hissi duyulur, sözlərində həm böyük bir sevginin, həm də itkinin kədəri hiss olunurdu. Zərifə xanımın vaxtsız vəfatı Ulu Öndər Heydər Əliyevin həyatında sağalmaz bir boşluq yaratdı. Ulu Öndər Onun xatirəsini daim uca tutmuş, həyatının ən dəyərli hissəsi kimi yad etmişdir. Bu bağlılıq onların sevgisinin nə qədər dərin və əbədi olduğunu bir daha göstərir.

Cənab İlham Əliyev üçün isə Zərifə xanım hər şeydən əvvəl gözəl ana idi — öyrədən, istiqamət verən, həyatın dəyərlərini aşılayan bir ana. Onun tərbiyəsi, verdiyi mənəvi dərslər bu gün də öz əksini dövlətçilikdə, xalqa xidmətdə və insanlara münasibətdə göstərir. Zərifə xanım övladlarına yalnız savad deyil, vicdan, mərhəmət və Vətən sevgisi miras qoymuşdur. Bu gün Cənab İlham Əliyevin hər şeydən öncə mükəmməl insan kimi formalaşmasında Ulu Öndər Heydər Əliyevin müdrikliyi və dövlətçilik məktəbi, Zərifə xanım Əliyevanın isə yüksək mənəviyyatı, mərhəməti və insani dəyərləri əvəzsiz rol oynamışdır.

Zərifə xanımın həyat fəlsəfəsi sadə, lakin dərin idi: insan olmaq, faydalı olmaq və iz qoymaq. O, heç zaman şöhrət ardınca qaçmadı, lakin qazandığı hörmət onu zirvəyə ucaltdı. Onun zərifliyi adında olduğu kimi xarakterində də əks olunurdu — sakit, təmkinli, lakin bir o qədər də möhkəm və prinsipial.

Onun dünyadan köçü bir ömrün sonu deyil, bir məktəbin başlanğıcı oldu. Bu məktəb insanlara sevgi ilə yanaşmağın, elmi vicdanla birləşdirməyin, ailəyə sədaqətli olmağın məktəbidir. Bu gün onun adı çəkiləndə yalnız bir alim yox, bütöv bir mənəviyyat dünyası yada düşür. O, qısa ömrünə böyük məna sığdıran, səssiz, lakin dərin iz buraxan bir şəxsiyyətdir. Onun həyatı bizə öyrədir ki, əsl ömür yaşanılan illərlə deyil, insanların qəlbində qoyduğun işıqla ölçülür.

Zərifə xanım Əliyeva – qısa, lakin mənalı ömrü ilə əbədiyyət qazanan, yaddaşlarda sevgi, ehtiram və minnətdarlıqla yaşayan bir ömür salnaməsidir.

David Həsənov

YAP Naxçıvan şəhər təşkilatının əməkdaşı

Paylaş:

Baxılıb: 105 dəfə