Silinməz yaddaşımızın təcəssümü

Bakı:

14 °C

67 %

4 m/s

Əlaqə

AZ RU EN

Ana səhifə / Arxiv / Silinməz yaddaşımızın təcəssümü

Silinməz yaddaşımızın təcəssümü

05.03.2026 [15:01]

Dövlət başçısı İlham Əliyev, birinci xanım Mehriban Əliyeva və ailə üzvləri fevralın 26-da Xocalı Soyqırımı Memorialının açılış mərasimində iştirak etdilər. Cənab İlham Əliyev Xocalı rayon ictimaiyyətinin nümayəndələri ilə görüşündə işğal dövrünün reallıqlarından, Azərbaycanın ərazi bütövlüyünün təmin edilməsi üçün hazırlıq dövründə qazandığı uğurlardan və nəhayət, ədalətin bərpasından danışdı. Tarixi ədalətin bərpası böyük səylərin, qətiyyətin nəticəsidir. Cənab İlham Əliyev qeyd etdi ki, biz ədalət tələb edirdik. Ancaq əfsuslar olsun ki, beynəlxalq təşkilatlar, dünyanın aparıcı ölkələri bizim bu faciəmizə biganə yanaşırdılar. Ermənistan dövlətinin törətdiyi bu qanlı cinayəti ört-basdır etməyə çalışırdılar. Biz isə ədalətə addım-addım irəliləyirdik. 20-yə yaxın ölkənin Xocalı soyqırımını rəsmən tanıması bir addım idi, Vətən müharibəsi və şanlı Zəfərimiz ikinci addım idi, Xocalı şəhərinin iki il yarım bundan əvvəl azad edilməsi isə son addımlardan biri idi. Nəhayət, axırıncı addım bu yaxınlarda hərbi cinayətkarlara qarşı Bakıda keçirilmiş məhkəmə prosesi idi. Xocalı soyqırımını törətmiş, əli Azərbaycan xalqının qanına batmış quldurlar məhkəmə qarşısında cavab verməli oldular. Vətən müharibəsi və antiterror əməliyyatı nəticəsində hərbi cinayətkarların bir hissəsi Azərbaycan Silahlı Qüvvələri tərəfindən məhv edilmişdir, bir hissəsi, xüsusilə separatçıların liderləri sayılan ünsürlər isə müxtəlif dövrlərdə saxlanılmış və məhkəmə qarşısına gətirilmişdir: “Bax bu, ədalətin tam təntənəsidir. Ədaləti biz özümüz təmin etdik, xalqımız bir yumruq kimi birləşərək həm 2020-ci, həm 2023-cü illərdə böyük qəhrəmanlıq göstərmişdir. Biz ədaləti Silahlı Qüvvələrimizin peşəkarlığı, fədakarlığı, rəşadəti hesabına özümüz təmin etdik. Əlbəttə ki, hərbi cinayətkarları ədalət məhkəməsinə gətirmək və ədalətli məhkəməni təşkil etmək, yenə də deyirəm, bizim ədalətimizin son nöqtəsi idi”.

Xocalı faciəsinin soyqırımı kimi dünya ictimaiyyətinə çatdırılması istiqamətində mühüm addımlar atılır. Həm Azərbaycan dövləti, həm də ictimai təşkilatlar, qeyri-hökumət təşkilatları, bir çox qurumlar fəal çalışıblar. Heydər Əliyev Fondunun bu istiqamətdə fəaliyyəti xüsusi qeyd edilməlidir. Fond yarandıqdan dərhal sonra “Xocalıya ədalət!” genişmiqyaslı hərəkatına start verdi. Bu təşəbbüsü Fondun vitse-prezidenti Leyla Əliyeva həyata keçirir. Son 20 il ərzində onun təşəbbüsü ilə dünyanın bir çox ölkələrində bir çox tədbirlər, təqdimatlar, simpoziumlar, konfranslar keçirilmişdir, bir çox kitablar, broşürlər, bukletlər dərc edilmişdir. Çünki Ermənistan dövləti, dünya erməniliyi və dünya erməniliyinin, Ermənistan dövlətinin arxasında duran dövlətlər bu qanlı faciəni ört-basdır etməyə çalışırdılar. Hətta erməni təbliğatçıları Azərbaycanı bu faciədə günahlandırmağa çalışırdılar. Əgər biz öz haqq səsimizi ucaltmasaydıq, bu gün bəlkə də dünyada Xocalı soyqırımı ilə bağlı həqiqətə uyğun məlumat olmayacaqdı. Məhz təkidli səylərimiz nəticəsində artıq 20-yə yaxın ölkə Xocalı soyqırımını soyqırımı kimi rəsmən tanıyıb və bu proses davam etdirilir.

44 günlük İkinci Qarabağ müharibəsində tarixi Zəfərimiz və sonrakı mərhələdə həyata keçirilən bir günlük antiterror tədbirləri nəticəsində suverenliyimizin tam bərpası yeni reallıqlar yaratdı. Torpaqlarımız separatçılardan təmizləndi. Cənab İlham Əliyevin vurğuladığı kimi, 2023-cü ildə cəmi bir neçə saat davam edən antiterror əməliyyatı nəticəsində qanunsuz xunta rejimi məhv edildi, işğalçılar torpaqlarımızdan qovuldu, torpaqlarımızda qanunsuz məskunlaşmış 15 minlik erməni ordusu tərk-silah edildi və təslim oldu. Bu da erməni separatçılığına, onların tabutuna vurulmuş son mismar idi. Xocalıya ədalət məhz o vaxt təmin edildi.

Memorial Kompleksin məhz Xocalıda açılışı ədalətin təntənəsi kimi dəyərləndirildi. Ölkə Prezidenti çıxışında qeyd etdi ki, iki il bundan əvvəl xocalılılarla birlikdə bu kompleksin təməlini qoyduq. O vaxt demişdim ki, Heydər Əliyev Fondu tərəfindən bu layihə çoxdan hazır idi, bax necə var, necə tikilib, elə də nəzərdə tutulmuşdu, Bakıda yer də seçilmişdi və artıq mənim son qərarım lazım idi ki, biz bunun inşasına başlayaq. Məni hər dəfə nə isə bundan çəkindirirdi. Sonra başa düşdüm o nə idi. O da inam idi ki, gün gələcək və bu Memorial Kompleksi biz Xocalıda quracağıq və belə də oldu: “Bu Kompleks silinməz yaddaşımızın təcəssümü olacaq. Biz Xocalı soyqırımını heç vaxt unutmamalıyıq. Ermənistan dövlətinin vəhşiliklərini heç vaxt unutmamalıyıq. Öz tariximizi heç vaxt unutmamalıyıq, ayıq olmalıyıq, həmişə güclü olmalıyıq, həmişə düşmən bizdən qorxmalıdır, necə ki, bu gün qorxur. Məhz bu qorxu nəticəsində bu gün Azərbaycan xalqı sülh içində yaşayır”.

Ümumiləşdirilmiş şəkildə qeyd etsək, Prezident İlham Əliyevin Xocalı Soyqırımı Memorialının açılışındakı çıxışı bu günümüz və gələcəyimizlə bağlı mühüm çağırışları özündə ehtiva edir. Faciələrimizi unutmamalı, indiki və gələcək nəsillərə çatdırmalıyıq. Milli yaddaşımız daim qorunmalı və möhkəmləndirilməlidir.

Fəxrəddin Vəliyev,
YAP Şəmkir rayon təşkilatının sədri

Paylaş:

Baxılıb: 193 dəfə