Prezident İlham Əliyevin sözü və əməli birdir

Bakı:

7 °C

87 %

3 m/s

Əlaqə

AZ RU EN

Ana səhifə / Arxiv / Prezident İlham Əliyevin sözü və əməli birdir

Prezident İlham Əliyevin sözü və əməli birdir

19.12.2025 [18:42]

Eldar Əsədov

YAP Tərtər rayon təşkilatının sədri

Müasir dövrdə dövlət idarəçiliyində liderin sözünə sadiqliyi, verdiyi vədlərlə gördüyü işlər arasında uyğunluq cəmiyyətin inamını formalaşdıran əsas meyarlardan biridir. Azərbaycan Respublikasının Prezidenti İlham Əliyev cənablarının çoxillik siyasi fəaliyyəti bu baxımdan nümunəvi xarakter daşıyır. Onun çıxışları, proqram xarakterli bəyanatları və strateji hədəfləri real nəticələrlə, konkret layihələrlə və davamlı inkişafla təsdiqlənmişdir. Buna görə də Möhtərəm Prezidentimiz Azərbaycan cəmiyyətində və beynəlxalq aləmdə sözü ilə əməli bir olan lider kimi tanınır.

Möhtərəm Prezidentimiz İlham Əliyev cənablarının dövlətçilik fəlsəfəsinin əsasını milli maraqların qorunması, güclü dövlət və rifahlı cəmiyyət prinsipləri təşkil edir. O, hələ Prezident seçildiyi ilk illərdə bildirmişdi ki, Azərbaycan yalnız öz gücünə arxalanaraq inkişaf etməli, siyasi və iqtisadi müstəqilliyini möhkəmləndirməlidir. Bu strateji xətt sonrakı illərdə həyata keçirilən siyasətdə aydın şəkildə öz əksini tapdı.

İlham Əliyev cənabları dəfələrlə bəyan etmişdir ki, müstəqil dövlətin əsas dayaqlarından biri güclü ordudur. Bu prinsip onun fəaliyyətində əsas istiqamətlərdən biri olmuşdur. Ordu quruculuğuna ayrılan vəsaitlərin artırılması, hərbi texnikanın yenilənməsi, şəxsi heyətin peşəkarlığının yüksəldilməsi məqsədilə həyata keçirilən tədbirlər Möhtərəm Prezidentimizin sözlərinin əməli nəticəsidir.

Azərbaycanın ərazi bütövlüyü məsələsində Cənab İlham Əliyevin mövqeyi daim qəti və prinsipial olmuşdur. O, bütün beynəlxalq tribunalarda Azərbaycanın haqlı mövqeyini müdafiə edərək bildirirdi ki, Azərbaycan heç vaxt işğalla barışmayacaq. 2020-ci ildə Vətən müharibəsində qazanılan tarixi Qələbə Prezidentimizin illərlə söylədiyi fikirlərin əməli təsdiqi oldu. Ali Baş Komandan kimi onun rəhbərliyi altında Azərbaycan Ordusu qısa müddətdə böyük tarixi nailiyyət əldə etdi və ölkənin ərazi bütövlüyü bərpa olundu.

Cənab İlham Əliyevin sözlə əməl birliyini göstərən əsas sahələrdən biri də sosial siyasətdir. O, dəfələrlə vurğulamışdır ki, iqtisadi inkişafın əsas məqsədi vətəndaşların rifahının yüksəldilməsidir. Bu istiqamətdə son illərdə minimum əməkhaqqının, pensiyaların və sosial müavinətlərin artırılması, aztəminatlı ailələrə dövlət dəstəyinin gücləndirilməsi həyata keçirilmişdir.

Şəhid ailələri və müharibə iştirakçıları Prezidentin xüsusi diqqət mərkəzindədir. Onların mənzil və avtomobillərlə təmin olunması, sosial problemlərinin həlli istiqamətində görülən tədbirlər dövlət başçısının verdiyi sözlərə əməl etdiyini açıq şəkildə nümayiş etdirir. Bu addımlar cəmiyyətdə sosial ədalət prinsipinin möhkəmlənməsinə xidmət edir.

Möhtərəm Prezidentimiz İlham Əliyevin fəaliyyətində regionların inkişafı xüsusi yer tutur. O, dəfələrlə bildirmişdir ki, ölkənin hər bir bölgəsi bərabər şəkildə inkişaf etməlidir. Regionların sosial-iqtisadi inkişafı üzrə dövlət proqramlarının icrası nəticəsində yollar, məktəblər, xəstəxanalar, su və elektrik infrastrukturu yenilənmiş, minlərlə yeni iş yeri yaradılmışdır. Bu layihələr Prezidentin verdiyi vədlərin konkret nəticələridir.

İşğaldan azad edilmiş ərazilərin bərpası Möhtərəm Prezidentimiz İlham Əliyevin sözlə əməl birliyinin ən bariz nümunələrindən biridir. O, bu torpaqların qısa müddətdə yenidən qurulacağını və keçmiş məcburi köçkünlərin öz doğma yurdlarına qayıdacağını bəyan etmişdi. Bu gün Qarabağ və Şərqi Zəngəzurda aparılan genişmiqyaslı bərpa-quruculuq işləri, yeni şəhər və kəndlərin salınması, hava limanlarının, yolların inşası həmin vədlərin reallığa çevrildiyini göstərir.

"Böyük Qayıdış" proqramı çərçivəsində görülən işlər Prezidentin strateji baxışının və qətiyyətli iradəsinin nəticəsidir. Bu proses təkcə fiziki bərpa deyil, həm də tarixi ədalətin bərpasıdır.

Cənab Prezident İlham Əliyevin sözü və əmli bir olan lider kimi tanınması beynəlxalq aləmdə də qəbul olunur. O, beynəlxalq təşkilatlarda çıxış edərkən Azərbaycanın mövqeyini açıq, prinsipial və əsaslandırılmış şəkildə ifadə edir. Azərbaycanın müstəqil xarici siyasət xətti, heç bir güc mərkəzindən asılı olmadan milli maraqlara əsaslanması Prezidentin sözlərinin əməli siyasətdə təsdiqidir.

Bir sözlə Möhtərəm Prezidentimiz İlham Əliyevin fəaliyyəti göstərir ki, onun üçün söz sadəcə bəyanat deyil, böyük məsuliyyətdir. Verdiyi hər bir vəd düşünülmüş strategiyaya, konkret planlara və real addımlara əsaslanır. Güclü dövlət, güclü ordu, rifahlı cəmiyyət və bərpa olunmuş ərazi bütövlüyü bu sözlərin əməli nəticəsidir.

Məhz buna görə də Azərbaycan cəmiyyətində Möhtərəm Prezidentimiz İlham Əliyevə olan etimad yüksəkdir. Onun sözü və əmli birdir və bu prinsip müasir Azərbaycan dövlətçiliyinin əsas sütunlarından biri kimi tarixə yazılmışdır.

Paylaş:

Baxılıb: 95 dəfə