Abbas Abbasov Saleh Rüstəmli vasitəsilə Əli Kərimliyə pul ötürüb?

Bakı:

7 °C

87 %

3 m/s

Əlaqə

AZ RU EN

Ana səhifə / Arxiv / Abbas Abbasov Saleh Rüstəmli vasitəsilə Əli Kərimliyə pul ötürüb?

Abbas Abbasov Saleh Rüstəmli vasitəsilə Əli Kərimliyə pul ötürüb?

16.12.2025 [14:05]

Dövlətə və xalqa qarşı xəyanət yolunu seçmiş şəbəkə ilə bağlı aparılan araşdırmalar və üzə çıxan faktlar bir çox mətləblərin də üstünü açır. İllərlə xəyanəti özünə peşə seçmiş şəbəkənin hər bir "həlqəsi" bu prosesdə yer alıb.

Məsələn, Əli Kərimliyə illərlə Rusiya Federasiyasından müxtəlif vasitələrlə, xüsusilə ona yaxın olan şəxslərin əli ilə maliyyə verilməsi faktı hər kəsə bəllidir. Hələ 2018-ci ildə Respublika Baş Prokurorluğu və Daxili İşlər Nazirliyinin yaydığı birgə məlumatda bildirilirdi ki, Azərbaycan Xalq Cəbhəsi Partiyası adlı qurum ölkəmizdə və xaricdə dövlətimizə, dövlətçiliyimizə və milli maraqlarımıza zidd olaraq keçirilən tədbirlərinin maliyyələşdirilməsi üçün qanunsuz sahibkarlıq fəaliyyəti nəticəsində əldə edilmiş külli miqdarda çirkli pul vəsaitlərinin leqallaşdırılması əməllərini törətməsinə dair kifayət qədər sübutlar toplanıb. Həmin əməllərin törədilməsində qurumun funksionerlərindən Əli Kərimli, Qənimət Zayidov, Saleh Rüstəmli, Vidadi Rüstəmli, Aqil Məhərrəmov, Ruslan Nəsirov, Babək Həsənov və digərlərinin - Bakı şəhər sakinləri Ceyhun Hüseynov, Rauf İsgəndərov, Heydər Əhmədov və Tural Mehdixanovun adı qeyd edilirdi. 2018-ci ildə rəsmi qurumların yaydığı məlumtda bildirilirdi ki, Rusiyada yaşayan Saleh Rüstəmov çirkli pul vəsaitlərinin əldə edilməsinin mənbəyini gizlətmək məqsədilə fərqli yollara əl atıb. Hələ o vaxt bildirilirdi ki, 2016-cı ilin martından adıçəkilən dövrə qədər Bakıda valyuta əməliyyatlarının qanunsuz köçürülməsi ilə məşğul olanların vasitəsilə Əli Kərimliyə çatdırılan pulun miqdarı 412 min ABŞ dolları olub – bunu Saleh Rüstəmli istintaqa ifadəsində özü də etiraf etmişdi. Bildirmişdi ki, uzun müddət ərzində AXCP sədri Əli Kərimliyə mütəmadi olaraq böyük məbləğlərdə pul göndərib. Onun sözlərinə görə, hər dəfə 20–30 min dollar aralığında vəsait çatdırılıb və pul alındıqdan sonra Əli Kərimli tərəfindən “bəy, çatdı” məzmunlu WhatsApp mesajı ilə təsdiq göndərilib.

Əli Kərimlinin ətrafı isə iddia edir ki, Saleh Rüstəmli bu pulları "bazardan" qazanıb. Amma gəlin görək, bu qədər pulu "bazardan qazanmaq" mümkündürmü? Təbii ki, xeyr. Hətta mümkün olsa belə, Saleh Rüstəmlinin öz qazancından mütəmadi şəkildə hər ay 20-30 min dollar Əli Kərimliyə göndərməsi inandırıcı deyil.

Belə olan halda Saleh Rüstəmlinin hansı mənbələrdən pul əldə etməsi, daha doğrusu hansı "ünvanlarla" Əli Kərimli arasında vasitəçi olması maraq doğuran faktlardandır – burada bir nüans diqqəti cəlb edir. Yayılan xəbərlərə görə, Azərbaycan Respublikası Dövlət Təhlükəsizliyi Xidmətində Ramiz Mehdiyev və digərləri barəsində “dövlət hakimiyyətini ələ keçirməyə yönələn hərəkətlər” ittihamı ilə istintaqı aparılan cinayət işi üzrə növbəti qərar bəlli olub. Cinayət işi üzrə toplanmış materiallar əsasında, Azərbaycan Baş nazirinin sabiq birinci müavini, uzun illər Ramiz Mehdiyevin müdafiəsi nəticəsində məsuliyyətdən kənarda qalmış Abbas Abbasovun qeyd olunan cinayət işi üzrə istintaqa cəlb edilməsi barədə qərar qəbul edilib, ölkə hüdudlarından kənarda olmaqla istintaqdan yayındığı üçün barəsində axtarış elan edilib.

Deyəsən, kələfin ucu burada üzə çıxır – Saleh Rüstəmlinin Əli Kərimliyə yönləndirdiyi, yolladığı pul vəsaitinin Abbas Abbasova məxsus olması və ya Abbas Abbasovun əli ilə Saleh Rüstəmliyə çatdırılması ehtimalı olduqca yüksəkdir. Sirr deyil ki, Rusiyada yaşadığı dövrdə A.Abbasovun maliyyə imkanları geniş olub və onun anti-Azərbaycan qüvvələrlə əməkdaşlığı haqda informasiyalar kifayət qədər yayılıb. Hətta 2013-cü ildə keçirilən prezident seçkiləri ərəfəsində onun "Milyarderlər ittifaqı"nın maliyyə kuratorluğunu icra etməsi də sirr deyildi – nəzərə alsaq ki, məhz həmin ərəfədə Rusiyadan Əli Kərimliyə, "milli şura"ya maliyyə axını daha güclü olub, A.Abbasovla Əli Kərimli arasında pul sövdələşməsi faktının olmasını irəli sürmək olar.

Hər bir halda qanundan və ədalətdən nə qaçmaq, nə də yayınmaq mümkündür. Zaman və araşdırmalar bütövlükdə həqiqətin üzərinə işıq salacaq. R.Mehdiyevin, A.Abbasovun, Ə.Kərimlinin və digər xəyanətkarların da qanun qarşısında, ədalət qarşısında cavab verəcəyi gün uzaqda deyil…

SADİQ

Paylaş:

Baxılıb: 448 dəfə