FHN-nin Türkiyədə olan növbəti axtarış-xilasetmə qrupu bu gün Bakıya yola salınıb

Bakı:

21 °C

61 %

1 m/s

Əlaqə

AZ RU EN

Ana səhifə / Xəbər lenti / FHN-nin Türkiyədə olan növbəti axtarış-xilasetmə qrupu bu gün Bakıya yola salınıb

FHN-nin Türkiyədə olan növbəti axtarış-xilasetmə qrupu bu gün Bakıya yola salınıb

08.03.2023 [13:16]

Türkiyədə baş vermiş güclü zəlzələnin fəsadlarının aradan qaldırılması və axtarış-xilasetmə əməliyyatlarına dəstək məqsədilə Fövqəladə Hallar Nazirliyinin (FHN) qardaş ölkədə olan 760 nəfərlik çevik xilasetmə qüvvələrinin növbəti üçüncü qrupu təyyarə ilə bu gün Bakı şəhərinə yola salınıb.

Bunu “Yeni Azərbaycan”ın Türkiyə bürosuna Azərbaycan Fövqəladə Hallar Nazirliyinin (FHN) ictimaiyyətlə əlaqə idarəsinin baş məsləhətçisi Turqay Abbaslı açıqlamasında bildirib.

Turqay Abbaslı deyib ki, FHN zəlzələ bölgəsində 10 nöqtədə çadır şəhərçikləri qurub: “Türkiyədə zəlzələdən zərər çəkmiş insanlar üçün tibbi personalımızın da daxil olduğu 310 nəfərlik heyət güclü zəlzələnin episentri olan Kahramanmaraş şəhərindədir, amma az bir qism qalıb ki, onlar da bu gün və sabah quru yolla Azərbaycana yola düşəcəklər. Həmin şəhərcikdə yaşayan insanları azərbaycanlı heyət mobil səhra mətbəxi vasitəsilə isti yemək və çayla təmin edirdi. Fevralın 28-i Türkiyə Daxili İşlər Nazirliyinin müavini və Fövqəladə Halların İdarə olunması Agentliyinin (AFAD) nümayəndələri Hatayda beynəlxalq xilasedici qruplarla bir araya gələrək onlara ayrı-ayrılıqda təşəkkür etdilər və yola salma mərasimi oldu. Hatayda olan 114 nəfərdən ibarət Azərbaycan axtarış-xilasetmə heyəti də Kahramanmaraş şəhərinə gəldi, hazırda isə heyətimizdən növbəti bir qrup Azərbaycana getmək üçün aeroporta yola düşür”.

Turqay Abbaslı deyib ki, Türkiyənin son təbii fəlakət bölgəsinə xarici ölkələrdən yardıma gələn heyətlər ərazini tərk etsə də, Azərbaycan yeganə ölkədir ki, fəaliyyətini bu günə qədər davam etdirib: “Prezident İlham Əliyevin tapşırığına əsasən, ilk gündən FHN əməkdaşları buradadır. Biz AFAD ilə koordinasiyalı şəkildə fəaliyyət göstəririk, artıq axtarış-xilasetmə qrupunun köməyinə ehtiyac qalmadığı üçün Azərbaycana dönürük”

Turqay Abbaslı onu da əlavə edib ki, fevralın 6-da xilasediciləri Türkiyəyə gələrək zəlzələnin episentri olan Kahramanmaraşda fəaliyyətə başlayıblar, ümumilikdə 53 nəfərin sağ, 780 nəfərin isə cansız bədənini çıxarıblar: “İndiyə qədər FHN-nin istər yerli, istərsə də bir çox xarici xilasetmə əməliyyatlarında iştirak etmişəm. Amma ən son Türkiyədə baş verən zəlzələ gördüyüm ən böyük fəlakətdir. Təbii ki, insanları xilas edəndə çox sevindirici duyğular yaşanır. Amma xilasetmələr zamanı o qədər acınacaqlı hadisələr gördük ki, sözlə ifadə etmək mümkün deyil. Allah Türkiyə xalqına bir də belə bir fəlakət göstərməsin.”

Paylaş:

Baxılıb: 484 dəfə