Bələdiyyələrin səlahiyyətləri artırılır?

Bakı:

27 °C

60 %

10 m/s

Əlaqə

AZ RU EN

Ana səhifə / Xəbər lenti / Bələdiyyələrin səlahiyyətləri artırılır?

Bələdiyyələrin səlahiyyətləri artırılır?

16.02.2023 [10:12]

Milli Məclisdə bələdiyyələrin fəaliyyəti ilə bağlı illik məruzə dinlənilib

Günel ABBASOVA

Fevralın 15-də bələdiyyələrin fəaliyyətinə inzibati nəzarəti həyata keçirən orqanın illik məruzəsi Milli Məclisin Regional məsələlər komitəsinin iclasında müzakirəyə çıxarılıb. Məruzəni ədliyyə nazirinin müavini Vilayət Zahirov təqdim edib.

İclasda çıxış edən Milli Məclisin Regional məsələlər komitəsinin sədri Siyavuş Novruzov deyib ki, Azərbaycanda bələdiyyələrin qanuna uyğun fəaliyyətinin qurulması, qanunun aliliyini rəhbər tutması və s. məsələlərə tam nəzarət həyata keçirilir: “Qanun pozuntusu olduqda belə aidiyyəti qurumlar mövcud problemlərin aradan qaldırılması istiqamətində işlər görür”.

Sənəddə qeyd edilib ki, inzibati nəzarət tədbirləri çərçivəsində, ümumilikdə, 14 min hektar torpaq sahəsinin qanunsuz ayrılması ilə bağlı bələdiyyə aktlarının ləğv edilməsi məqsədilə Ədliyyə Nazirliyi tərəfindən bələdiyyələrə təklif və ya məhkəmələrə iddialar verilib.

Nəticədə 1 045 hektar torpaq sahəsinin mülkiyyətə, 12 043 hektar torpaq sahəsinin icarəyə, 1 hektar torpaq sahəsinin isə istifadəyə verilməsi haqqında qanunsuz qərarlar ləğv edilib, bütövlükdə 13 089 hektar (2021-ci illə müqayisədə 44 % çox) torpaq sahəsinin bələdiyyə mülkiyyətinə və ya sahibliyinə qaytarılması təmin edilib. 911 hektar torpaq sahəsi ilə bağlı təklif və iddialar isə baxılmaqdadır.

Ötən illərlə müqayisəli aparılan təhlillər göstərir ki, bələdiyyələrin fəaliyyətində rast gəlinən pozuntular əsas etibarilə bələdiyyə torpaqlarının idarəedilməsi, maliyyə vəsaitlərindən istifadə, şəffaflıq və hesabatlılığın təmini, bələdiyyə idarəçiliyi (təkbaşına idarəetmə, icra aparatının düzgün təşkil edilməməsi və s.) və digər məsələləri əhatə edir.

Sənəddə qeyd edilib ki, Qobustan rayonu Qobustan, İmişli rayonu Bəcirəvan, Sabirabad rayonu Qaralar və digər bələdiyyələrin vəzifəli şəxsləri barəsində Cinayət Məcəlləsinin müxtəlif maddələri ilə cinayət işləri başlanılıb. Həmçinin Bakı şəhəri Xətai, Abşeron rayonu Masazır, İmişli rayonu Qulubəyli, Biləsuvar rayonu Ağalıkənd və digər bələdiyyələrin vəzifəli şəxsləri barəsində toplanmış sənədlər aidiyyəti üzrə istintaq orqanlarında baxılmaqdadır.

Bildirilib ki, yerli özünüidarəetmə sahəsində qanunçuluğun təmini məqsədilə Ədliyyə Nazirliyi tərəfindən bələdiyyə fəaliyyətində rast gəlinən qanun pozuntuları, o cümlədən korrupsiya ilə əlaqədar hüquqpozmaları yaradan səbəblər təhlil edilərək ümumiləşdirilir, nəticələrinə uyğun tədbirlər həyata keçirilir, o cümlədən qanunvericiliyin təkmilləşdirilməsi üzrə təkliflər hazırlanır.

Ədliyyə nazirinin müavini Vilayət Zahirov müzakirə zamanı çıxış edərkən bir sıra məsələlərə toxunub. Nazir müavini bildirib ki, ən mühüm məsələlərdən biri bələdiyyələrin maliyyə resurslarının zəif olması ilə bağlıdır: “Qanunvericilikdə bununla bağlı imkanlar var. Əslində olan isə bələdiyyələrin bəzən mövcud imkanlardan düzgün istifadə edə bilməməsidir. Nəticədə bu onların maliyyə imkanlarının artırılmasına maneə olur. Daha bir məsələ isə bələdiyyələrin ərazilərində olan vergi obyektlərinin siyahısının olmamasıdır. Bu siyahı dəqiq olsa, oradan lazımi vergilər yığılar və sonradan israfının qarşısı da alınar. Bələdiyyələrin səlahiyyətlərinin artırılması istiqamətində işlər görülür. Bu gün ölkədə fəaliyyət göstərən bələdiyyələrin inkişafı və təkmilləşdirilməsi xeyli işlər görülməlidir. Bu sahədə ildən-ilə yeni problemlərlə qarşılaşırıq. Məruzədə də bu məsələlər qeyd olunub”.

O vurğulayıb ki, qəbiristanlıqların bələdiyyələrə tam təhvil verilməsi hələ başa çatmayıb: “Bunun da bir neçə səbəbi var. Regionlarda və bir çox kəndlərdə qəbiristanlıqların sənədlərin, xəritələrin, pasportların olmaması gecikməyə səbəbdir”.

V.Zahirovun sözlərinə görə, bu gün elə bələdiyyə sədrləri var ki, doğrudan da prinsipiallıq edərək müstəqil fəaliyyət göstərirlər: “40-a yaxın bələdiyyə sədri haqqında məhkəməyə iddia ərizəsi vermişik. Çünki həmin bələdiyyə sədrləri özlərini tam müstəqil hesab edərək bizim verdiyimiz müəyyən təklifləri qəbul etmirlər”, - deyə o qeyd edib.

Paylaş:

Baxılıb: 505 dəfə