İcbari tibbi sığortadan Türkiyədə də yararlana biləcəyik

Bakı:

22 °C

64 %

4 m/s

Əlaqə

AZ RU EN

Ana səhifə / Xəbər lenti / İcbari tibbi sığortadan Türkiyədə də yararlana biləcəyik

İcbari tibbi sığortadan Türkiyədə də yararlana biləcəyik

09.02.2022 [15:06]

MÜŞFİQƏ

Azərbaycanla Türkiyə arasında əməkdaşlıq bütün istiqamətlər kimi səhiyyə və tibb sahələrini də əhatə edir. Bu məqsədlə, ötən ilin noyabrında Azərbaycan Respublikası İcbari Tibbi Sığorta üzrə Dövlət Agentliyi ilə Türkiyə Respublikası Sosial Müdafiə Qurumu arasında Anlaşma Memorandumu imzalanıb. Üçillik Anlaşma Memorandum çərçıvəsində əməkdaşlığı daha da gücləndirmək, Türkiyənin təcrübəsindən faydalanmaq, gələcəkdə sığortaların qarşılıqlı tanınması istiqamətində işlər aparılacaq. Belə ki, Türkiyə vətəndaşları Azərbaycanda öz sığortasından istifadə edəcək, Azərbaycan vətəndaşları da Türkiyədə icbari tibbi sığortadan yararlana biləcəklər.

Türkiyənin 10 illik təcrübəsindən ölkəmizin vətəndaşları da yararlanacaq

İcbari Tibbi Sığorta üzrə Dövlət Agentliyinin sədri Zaur Əliyev Anlaşma Memorandumunun iki qurum arasında əlaqələrin daha da inkişaf etdirilməsi baxımından vacib olduğunu bildirib: “Qardaş ölkə həkim mütəxəssislərin müxtəlif ixtisaslar üzrə təhsil almasına, bilik və bacarıqlarının artmasına hər zaman böyük töhfə verir. Bu da əlbəttə ki, səhiyyənin inkişafı ilə yanaşı, iki qardaş ölkə arasında əlaqələrin daha da möhkəmlənməsində mühüm rol oynayır. Gələcəkdə Türkiyə və Azərbaycan vətəndaşları qarşılıqlı şəkildə icbari tibbi sığortanın tərkibinə aid olan xidmətlərdən istifadə edəcəklər”.

Azərbaycanla digər sahələrdə olduğu kimi sosial təminat sahəsində də əməkdaşlığın uğurla davam edəcəyinə ümidvar olduğunu bildirən Cevdet Ceylan rəhbərlik etdiyi qurumun fəaliyyət istiqamətinə aid təcrübəni qardaş ölkə ilə bölüşməkdən məmnun olduğunu bildirib: “2012-ci ildən tətbiq etməyə başladığımız icbari tibbi sığorta ilə biz cəmiyyətin bütün üzvlərinin iqtisadi gücündən və istəyindən asılı olmayaraq tibbi xidmətlərdən bərabər, əlçatan və effektiv faydalanmasını təmin edirik. Bunun nəticəsidir ki, Türkiyədə əhalinin 99 faizi universal tibbi sığorta ilə əhatə olunur”.

Mövzu ilə bağlı suallarımızı cavablandıran Milli Məclisin Səhiyyə komitəsinin üzvü, deputat Müşfiq Məmmədli bildirib ki, qardaş Türkiyə ilə bu Memorandumun imzalanması həm səhiyyənin inkişafı, həm də əhaliyə tibbi yardımın göstərilməsi baxımından çox böyük əhəmiyyəti olacaq: “Vətəndaşlarımız yaxın gələcəkdə Türkiyə Respublikasında da sığorta çərçivəsində bütün tibbi ximətlərdən istifadə edə biləcəklər. Hər bir Azərbaycan vətəndaşının özünü qardaş ölkədə sağlamlıq baxımından tam güvəndə hiss etməsinə gətirib çıxaracaq”.

Agentliyin Strateji təhlil departamentinin rəhbəri Araz Nəsirov icbari tibbi sığorta sahəsində əməkdaşlığın prioritet istiqamətləri haqqında məlumat verib: “Agentlik ilkin səhiyyə xidmətinin gücləndirilməsi məqsədi ilə ailə həkimi institutunun təkmilləşdirilməsi, tibb işçilərinin tibbi avadanlıqlardan istifadəyə dair bilik və bacarıqlarının artırılması, tibbi xidmətlərin keyfiyyətinin yüksəldilməsi üçün milli keyfiyyət standartlarının hazırlanması istiqamətində Türkiyə təcrübəsinin öyrənilməsində və tətbiqində maraqlıdır”.

Qeyd olunub ki, Anlaşma Memorandumuna əsasən icbari tibbi sığorta sisteminin idarə edilməsi, planlaşdırılması və maliyyələşdirilməsi, icbari tibbi sığortaya dair qanunvericiliyin təkmilləşdirilməsi kimi sahələrə əməkdaşlıq çərçivəsində üstünlük verıləcək.

Paylaş:

Baxılıb: 835 dəfə