Göz rəngini dəyişmək: trend, yoxsa gözəllik qurban tələb edir?

Bakı:

24 °C

54 %

3 m/s

Əlaqə

AZ RU EN

Ana səhifə / Sosial / Göz rəngini dəyişmək: trend, yoxsa gözəllik qurban tələb edir?

Göz rəngini dəyişmək: trend, yoxsa gözəllik qurban tələb edir?

23.06.2026 [08:51]

Son illər estetik tibb sahəsində baş verən sürətli inkişaf insanların yalnız üz cizgilərini, bədən quruluşlarını deyil, hətta genetik olaraq sahib olduqları göz rəngini belə dəyişdirməyə imkan verir. Bu əməliyyatlar dünyanın müxtəlif ölkələrində böyük maraq doğuran, eyni zamanda ciddi müzakirələrə səbəb olan prosedurlardan birinə çevrilib. Bir çox insan mavi, yaşıl və ya digər rəngli gözlərə sahib olmağı cazibədarlığın vacib elementi hesab edir. Onlar üçün göz rənginin dəyişdirilməsi ideyası ilk baxışdan olduqca maraqlı və cəlbedici görünə bilər, lakin bu estetik dəyişikliklərin arxasında həm tibbi imkanlar, həm də nəzərə alınmalı olan mühüm risklər dayanır.

Hazırda göz rənginin dəyişdirilməsi üçün istifadə olunan bəzi üsullar arasında iris implantları və lazer texnologiyalarına əsaslanan prosedurlar yer alır. Bu metodlar gözün təbii quruluşuna müəyyən müdaxilələr tələb etdiyindən, onların tətbiqi zamanı peşəkar tibbi nəzarət və ətraflı müayinələr xüsusi əhəmiyyət daşıyır.

Sosial şəbəkələrdə və müxtəlif rəqəmsal platformalarda göz rəngini dəyişdirmiş insanların fotoları milyonlarla baxış toplasa da, bir neçə saniyəlik vizual təsirin arxasında uzun tibbi proseslərin, konsultasiyaların və bəzən gözlənilməz nəticələrin dayandığını unutmamaq lazımdır. Mütəxəssislərin fikrincə, sadəcə estetik məqsədlərlə həyata keçirilən bəzi göz rəngi dəyişdirmə əməliyyatları göz daxili təzyiqin artması, görmə keyfiyyətinin zəifləməsi, iltihab prosesləri və hətta bəzi hallarda geri dönməz görmə problemləri kimi ciddi fəsadlara səbəb ola bilər. Ona görə də bu qərarı verməzdən əvvəl insanın həm əldə etmək istədiyi nəticəni, həm də mümkün riskləri diqqətlə qiymətləndirməsi vacibdir.

Hər kəs gözünün rəngini dəyişdirə bilməz

Sözügedən əməliyyatla bağlı fikirlərini “Yeni Azərbaycan”la bölüşən oftalmoloq Gündüz Abbasov bildirib ki, son zamanlar pasiyentlər tərəfindən ən çox ünvanlanan suallardan biri də göz rənginin əməliyyat vasitəsilə dəyişdirilməsinin mümkün olub-olmamasıdır: “Bir oftalmoloq olaraq qeyd etmək istəyirəm ki, müasir tibbin imkanları müəyyən hallarda gözün görünüşünü dəyişdirməyə şərait yaratsa da, bu prosedurların hər biri ciddi tibbi qiymətləndirmə və risk analizindən sonra nəzərdən keçirilməlidir. Hər kəs üçün göz rəngini dəyişdirmə əməliyyatını icra etmək mümkün deyil. Qeyd etdiyim kimi, bu əməliyyatı etməzdən öncə ciddi tibbi yoxlanışlar, müəyyən analizlər lazımdır”.

Bu problemlərlə qarşılaşa bilərsiniz...

Həkimin sözlərinə görə, insan gözünün rəngi iris adlanan hissədəki piqment miqdarı ilə müəyyən edilir və bu xüsusiyyət əsasən genetik faktorlarla formalaşdığı üçün təbii göz rənginin dəyişdirilməsi sadə kosmetik prosedur deyil, əksinə, gözün həssas strukturlarına birbaşa təsir göstərə bilən müdaxilə hesab olunur: “Bir çox insan mavi və ya yaşıl gözlərə sahib olmaq arzusuyla bu əməliyyatlara maraq göstərsə də, hər zaman pasiyentlərimə xatırladıram ki, göz yalnız estetik görünüş yaradan bir orqan deyil, eyni zamanda insanın ətraf aləmi qavramasını təmin edən mürəkkəb və əvəzolunmaz sistemdir. Bu sistemdə aparılan hər hansı dəyişiklik gələcəkdə görmə funksiyasına təsir göstərə bilər. Xüsusilə, estetik məqsədlə həyata keçirilən bəzi göz rəngi dəyişdirmə prosedurlarında göz daxili təzyiqin yüksəlməsi, işığa qarşı həssaslığın artması, buynuz qişa problemləri və digər fəsadların yaranma ehtimalı mövcuddur. Bu səbəbdən prosedurun üstünlükləri ilə yanaşı mümkün risklər də ətraflı şəkildə izah edilməlidir. Təcrübəmdə dəfələrlə müşahidə etmişəm ki, insanlar sosial mediada gördükləri ideal nəticələrdən təsirlənərək qərar verməyə çalışırlar, lakin internetdə paylaşılan şəkillər və videolar çox vaxt prosedurun bütün tərəflərini əks etdirmir. Əməliyyatdan sonrakı nəzarət mərhələləri barədə kifayət qədər məlumat verilmir”.

Sağlam görmə estetik dəyişiklikdən daha dəyərlidir

Oftalmoloq qeyd edib ki, göz rəngini dəyişdirməyi düşünən hər bir şəxs ilk növbədə göz sağlamlığını prioritet hesab etməli, geniş oftalmoloji müayinədən keçməli və yalnız tam məlumatlandırıldıqdan sonra qərar verməlidir: “Çünki sağlam görmə qabiliyyəti hər hansı estetik dəyişiklikdən daha dəyərlidir. Unutmaq olmaz ki, gözlər insanın yalnız görünüşünün deyil, həm də həyat keyfiyyətinin ayrılmaz hissəsidir. Bu səbəbdən onların sağlamlığını riskə ata biləcək hər bir qərar maksimum məsuliyyət və peşəkar yanaşma tələb edir”.

Yeganə BAYRAMOVA

Paylaş:

Baxılıb: 116 dəfə