YAP Gənclər Birliyinin ofisində 31 mart - Azərbaycanlıların Soyqırımı Günü ilə əlaqədar tədbir keçirilib

Bakı:

27 °C

54 %

7 m/s

AZ RU EN

Ana səhifə / YAP xəbərləri / YAP Gənclər Birliyinin ofisində 31 mart - Azərbaycanlıların Soyqırımı Günü ilə əlaqədar tədbir keçirilib

YAP Gənclər Birliyinin ofisində 31 mart - Azərbaycanlıların Soyqırımı Günü ilə əlaqədar tədbir keçirilib

01.04.2015 [09:55]

Dünən Yeni Azərbaycan Partiyası (YAP) Gənclər Birliyinin ofisində 31 mart - Azərbaycanlıların Soyqırımı Günü ilə əlaqədar tədbir keçirilib. Çıxış edən YAP Gənclər Birliyinin sədri, partiyanın Siyasi Şurasının üzvü Seymur Orucov tarix boyu ermənilər tərəfindən xalqımıza qarşı qətliamlar törədildiyini bildirib. Onun sözlərinə görə, hazırda soyqırımın dünyada tanıdılması yönündə sistemli iş aparılır. Belə ki, bir sıra dövlətlərdə tədbirlər, anım günləri, konfranslar keçirilir. “Bu həqiqətlərin dünya ictimaiyyətinə çatdırılması istiqamətində işlər davam edir. Azərbaycanın qonşusu olan, illərlə ölkəmizin çörəyini yeyən Ermənistan və onun xalqı bir çox dövlətlərlə, havadarları ilə birləşərək azərbaycanlılara qarşı soyqırımlar törədiblər”, - deyən S.Orucov əlavə edib ki, bu cür məsələlərdə həmişə Azərbaycan dövləti ziyan çəkib: “Ermənilər böyük dövlətlərin bir növ oyunlarını həyata keçirmək üçün vasitə olublar. Təbii ki, bundan da əziyyət çəkən bizim xalqımız, millətimiz, dövlətimiz olub. Soyqırım tək Bakıda, Qarabağda deyil, Quba, Şamaxı, Hacıqabul, Naxçıvan, Lənkəran və digər bölgələrdə də həyata keçirilib. Lakin biz - Azərbaycan gəncliyi mütləq tariximizi yaxşı bilməli, eləcə də, qonşularımızı, dostlarımızı, düşmənlərimizi yaxşı tanımalıyıq. Çünki biz bunu bilmədiyimiz təqdirdə gələcəkdə yenidən təkrarlana bilər. Bizim əsas məqsədimiz odur ki, gənclərimiz bu məsələni daha da yaxşı bilsinlər”.
Tədbirdə çıxış edən tarix elmləri doktoru, professor Anar İsgəndərov bildirib ki, 1998-ci il martın 26-da Ümummilli lider Heydər Əliyev tərəfindən imzalanmış “Azərbaycanlıların soyqırımı haqqında” Fərman tarixi həqiqətlərin araşdırılması və dəyərləndirilməsi baxımından mühüm sənəddir: “1918-1920-ci illərdə erməni hərbi birləşmələrinin xalqımıza qarşı həyata keçirdikləri soyqırım faktları Azərbaycan Xalq Cümhuriyyəti tərəfindən yaradılmış Fövqəladə Təhqiqat Komissiyasının arxiv sənədlərində öz əksini tapır”.
Komissiyanın 1918-ci il iyul ayının 15-də Azərbaycan Milli Hökuməti tərəfindən Gəncədə yaradıldığını bildirən A.İsgəndərov komissiyanın yaradılmasında əsas məqsədin ermənilər tərəfindən 1918-ci ilin martında Bakıda, mart-may aylarında Şamaxıda, may-iyun aylarında Qubada, 1918-1919-cu illərdə Qərbi Azərbaycanda və Azərbaycanın müxtəlif bölgələrində həyata keçirilən soyqırımlarla bağlı təhqiqat sənədlərinin toplanması və bu sənədlərin dünyanın müxtəlif dillərində nəşr olunması və beynəlxalq aləmə çatdırılmasından ibarət olduğunu deyib.
Tədbir daha sonra fikir mübadiləsi şəraitində öz işini davam etdirib.
N.BAYRAMLI

Paylaş:

Baxılıb: 921 dəfə