YAP Binəqədi rayon təşkilatının yaranmasının 21-ci ildönümü münasibətilə tədbir keçirilib

Bakı:

22 °C

56 %

2 m/s

Əlaqə

AZ RU EN

Ana səhifə / YAP xəbərləri / YAP Binəqədi rayon təşkilatının yaranmasının 21-ci ildönümü münasibətilə tədbir keçirilib

YAP Binəqədi rayon təşkilatının yaranmasının 21-ci ildönümü münasibətilə tədbir keçirilib

07.03.2014 [09:19]

Siyavuş Novruzov: YAP bu gün Azərbaycanın və regionun ən güclü partiyasıdır
Yeni Azərbaycan Partiyası (YAP) Binəqədi rayon təşkilatının yaranmasının 21-ci ildönümü münasibətilə tədbir keçirilib. Tədbirdən öncə iştirakçılar Fəxri Xiyabana gələrək, xalqımızın Ümummilli lideri Heydər Əliyevin xatirəsini ehtiramla anıb, məzarı önünə əklil qoyublar.
Tədbiri giriş sözü ilə açan YAP Binəqədi rayon təşkilatının sədri Ramiz Göyüşov Yeni Azərbaycan Partiyasının yaranma tarixi barədə məlumat verib, partiyanın Azərbaycanın ictimai-siyasi həyatında oynadığı roldan danışıb. Natiq, həmçinin, Ümummilli lider Heydər Əliyevin əsasını qoyduğı siyasətin Prezident İlham Əliyev tərəfindən davam etdirilməsi nəticəsində Azərbaycanın regionun lider dövlətinə çevrildiyini deyib.
YAP Binəqədi rayon təşkilatının 7 mart 1993-cü ildə yaradıldığını, hazırda rayon təşkilatının sıralarında 14 min üzvün olduğunu deyən Ramiz Göyüşov ötən ilin oktyabrında keçirilən prezident seçkilərində rayon təşkilatının üzvlərinin fəaliyyətini də xüsusi olaraq vurğulayıb.
Çıxış edən YAP İcra katibinin müavini, Milli Məclisin deputatı Siyavuş Novruzov öncə YAP-ın Azərbaycanın müstəqilliyinin möhkəmlənməsində müstəsna rolundan danışıb. Qeyd olunub ki, 1990-cı illərin əvvəllərində Azərbaycan ağır iqtisadi, siyasi böhran şəraitində idi. Sözsüz ki, bu dərin siyasi, iqtisadi, sosial böhran xalqın ziyalılarını narahat etməyə bilməzdi. Buna görə də, Azərbaycanın taleyini düşünən insanlar ölkəni böhrandan çıxara biləcək yeni bir partiya yaratmaq təşəbbüsü ilə çıxış etdilər. Elə bu məqsədlə də onlar Ümummilli lider Heydər Əliyevə müraciət etdilər.
“YAP bu gün Azərbaycanın və regionun ən güclü partiyasıdır” - deyən Siyavuş Novruzov əlavə edib ki, YAP Binəqədi rayon təşkilatı partiyanın ilkin dövrlərində yaranan rayon təşkilatından biridir. O da bildirilib ki, YAP Binəqədi rayon təşkilatının prezident seçkiləri dövründə işi yüksək səviyyədə təşkil olunub.
Çıxışında ölkədəki ictimai-siyasi proseslərdən də bəhs edən natiq, həmçinin, rayon gənclərini informasiya və kommunikasiya texnologiyalarının son nailiyyətlərindən istifadə etməklə ölkə reallıqlarını dünyaya yaymağa və bu işdə fəal olmağa səsləyib.
Sonra çıxış edən YAP İdarə Heyətinin üzvü, Milli Məclisin Aqrar siyasət komitəsinin sədri Eldar İbrahimov partiyanın ölkəmizin həyatındakı əhəmiyyətli rolundan danışıb. O qeyd edib ki, Azərbaycanın bir qrup ziyalısının ölkənin ən çətin dövründə Ümummilli lider Heydər Əliyevə müraciəti Azərbaycan tarixinə “91-lər”in müraciəti kimi həkk olunub. Məhz bu müraciətdə Ümummilli lider Heydər Əliyevdən yeni yaradılacaq siyasi partiyaya rəhbərlik etmək xahiş olunurdu. Bundan sonra 21 noyabr 1992-ci il tarixində Naxçıvanda Heydər Əliyevin Sədrliyi ilə təsis konfransı keçirilib və Azərbaycanın müasir siyasi tarixində mühüm hadisə olan Yeni Azərbaycan Partiyası yaranıb: “YAP çox qısa bir müddətdə xalqın dəstəyini qazanıb, Heydər Əliyevin hakimiyyətə gəlməsi ilə iqtidar partiyasına çevrilib və ötən 21 il ərzində ölkəmizin inkişafına töhfə verib, Azərbaycanda istər siyasi, istərsə də sosial-iqtisadi proseslərdə aparıcı qüvvə olub”.
Tədbirdə çıxış edən YAP İdarə Heyətinin üzvü Kərim Kərimov “Təqdirəlayiq haldır ki, bu gün möhtəşəm bina YAP Binəqədi rayon təşkilatının ixtiyarındadır” deyib. Natiq Binəqədi rayonunda gedən abadlıq - quruculuq işlərinə də toxunub və son dövrlər rayonun çox inkişaf etdiyini qeyd edib.
Sonra çıxış edən Binəqədi rayon İcra Hakimiyyəti başçısının müavini Vüsar İsmayılov ölkədəki iqtisadi inkişafdan danışıb, bu inkişafın Bakı şəhərinin bir hissəsi olan Binəqədi rayonunda da hiss edildiyini bildirib. V.İsmayılov, həmçinin, ölkənin inkişafında YAP-ın xüsusi rolunun olduğunu qeyd edib.
Sonda Binəqədi rayonunun ictimai-siyasi həyatında fəal iştiraklarına görə bir qrup şəxsə fəxri fərmanlar və qiymətli hədiyyələr verilib, Yeni Azərbaycan Partiyası sıralarına yenicə daxil olmuş bir qrup şəxsə isə partiya vəsiqələri təqdim edilib.

Paylaş:

Baxılıb: 1123 dəfə