YAP Laçın rayon təşkilatının təşkilatçılığı ilə 31 Mart – Azərbaycanlıların Soyqırımı Günü münasibətilə anım tədbiri keçirilib

Bakı:

9 °C

93 %

3 m/s

AZ RU EN

Ana səhifə / YAP xəbərləri / YAP Laçın rayon təşkilatının təşkilatçılığı ilə 31 Mart – Azərbaycanlıların Soyqırımı Günü münasibətilə anım tədbiri keçirilib

YAP Laçın rayon təşkilatının təşkilatçılığı ilə 31 Mart – Azərbaycanlıların Soyqırımı Günü münasibətilə anım tədbiri keçirilib

31.03.2026 [14:04]

“Şəhərsalma və Memarlıq İli” çərçivəsində 31 mart 2026-cı il tarixində Yeni Azərbaycan Partiyası Laçın rayon təşkilatının təşkilatçılığı ilə 31 Mart – Azərbaycanlıların Soyqırımı Günü münasibətilə anım tədbiri keçirilmişdir.

Tədbir iştirakçıları əvvəlcə Azərbaycan xalqının Ümummilli Lideri Heydər Əliyevin, soyqırım qurbanlarının həmçinin ölkəmizin ərazi bütövlüyü və suverenliyi uğrunda canlarından keçmiş şəhidlərin əziz xatirəsini bir dəqiqəlik sükutla yad etmişlər.
Tədbirdə YAP Laçın rayon təşkilatının sədri İlqar İlyasov, Laçın Rayon İcra Hakimiyyətinin Ərazi-təşkilat və ictimai-siyasi məsələlər şöbəsinin İctimai-siyasi və humanitar məsələlər sektorunun müdiri Məhəmməd Şahbazov, Ağcabədi rayon Taxtakörpü qəsəbə 1 nömrəli tam orta ümumtəhsil məktəbinin direktoru Şaiq Məmmədov və digər çıxış edənlər tarixi faktlara əsaslanaraq bildirmişlər ki, “Böyük Ermənistan” ideyasını reallaşdırmaq niyyəti ilə ermənilər tərəfindən hələ 1905–1907-ci illərdə azərbaycanlılara qarşı genişmiqyaslı və sistemli zorakılıq aktları törədilmişdir. Xüsusilə 1918-ci ilin mart hadisələri zamanı Bakı Kommunasının həyata keçirdiyi siyasət nəticəsində Bakı quberniyasında azərbaycanlı əhaliyə qarşı kütləvi qırğınlar baş vermiş, bu cinayətlər xalqımızın tarixi yaddaşında silinməz iz qoymuşdur.

Qeyd olunmuşdur ki, soyqırımı aktları Bakı, Şamaxı, Quba qəzalarında, Qarabağ, Zəngəzur, Naxçıvan və Lənkəran bölgələrində xüsusi qəddarlıqla həyata keçirilmişdir. Bununla yanaşı, azərbaycanlıların tarixi torpaqlarından deportasiyası siyasəti sonrakı dövrlərdə də davam etdirilmiş, SSRİ Nazirlər Sovetinin 23 dekabr 1947-ci il tarixli qərarı əsasında 1948–1953-cü illərdə yüz minlərlə azərbaycanlı zorla öz doğma yurdlarından köçürülmüşdür.

Çıxışlarda vurğulanmışdır ki, 1988-ci ildən başlayan qondarma Dağlıq Qarabağ münaqişəsi nəticəsində də yüz minlərlə azərbaycanlı doğma torpaqlarından didərgin salınmış, 1992-ci ilin fevral ayında baş vermiş Xocalı faciəsi isə tarixə insanlığa qarşı törədilmiş ən ağır cinayətlərdən biri kimi daxil olmuşdur.

Diqqətə çatdırılmışdır ki, məhz Heydər Əliyevin təşəbbüsü ilə 26 mart 1998-ci il tarixli “Azərbaycanlıların soyqırımı haqqında” Fərmanın imzalanması bu faciələrə dövlət səviyyəsində siyasi-hüquqi qiymət verilməsi baxımından mühüm əhəmiyyət kəsb etmişdir.
Eyni zamanda qeyd edilmişdir ki, 44 günlük Vətən müharibəsi yalnız hərbi uğur deyil, həm də milli ləyaqətin, tarixi ədalətin və beynəlxalq hüququn bərpasının təntənəsidir. Azərbaycan Respublikasının Prezidenti, Müzəffər Ali Baş Komandan İlham Əliyevin qətiyyətli rəhbərliyi ilə qazanılan bu Zəfər ölkəmizin ərazi bütövlüyünün və suverenliyinin tam bərpası ilə nəticələnmiş, Azərbaycanın müasir tarixində yeni inkişaf mərhələsinin əsasını qoymuşdur.

Tədbirin sonunda bir daha vurğulanmışdır ki, Azərbaycan xalqına qarşı törədilmiş soyqırımı və deportasiya siyasəti heç zaman unudulmayacaq, bu tarixi həqiqətlərin dünya ictimaiyyətinə çatdırılması istiqamətində məqsədyönlü fəaliyyət davam etdiriləcəkdir.

Paylaş:

Baxılıb: 332 dəfə