Qubadlının işğaldan azad edilməsi tarixi hadisə idi

Bakı:

32 °C

40 %

4 m/s

Əlaqə

AZ RU EN

Ana səhifə / YAP xəbərləri / Qubadlının işğaldan azad edilməsi tarixi hadisə idi

Qubadlının işğaldan azad edilməsi tarixi hadisə idi

25.10.2025 [11:36]

Azərbaycan Ordusunun 2020-ci ilin payızında həyata keçirdiyi 44 günlük Vətən müharibəsində Qubadlının azad olunması əməliyyatı mühüm strateji və tarixi əhəmiyyətə malik idi. Oktyabr ayının ortalarından etibarən Qubadlı istiqamətində ağır döyüşlər gedirdi. Şəhərin ətrafındakı yüksəkliklərdə düşmən güclü istehkamlar qurmuşdu. Ordumuzun əsas məqsədi əvvəlcə həmin strateji yüksəklikləri azad etmək idi. Qəhrəman hərbçilərimizin şücaəti sayəsində Xanlıq, Padar, Sarıyataq kimi kəndlər azad olundu, ardınca şəhər istiqamətində irəliləyiş başlandı.

Ölkəmizin cənub-qərbində yerləşən və Zəngəzur mahalının ən qədim yaşayış məskənlərindən olan Qubadlının işğaldan azad edilməsi tarixi Zəfərimizin mühüm mərhələsini təşkil etdi. 1992–1993-cü illərdə ardıcıl olaraq itirdiyimiz bu torpaqları 2020-ci ildə əsgər və zabitlərimizin qanı, iradəsi və vətənpərvərliyi sayəsində qarış-qarış geri aldıq. Hər bir kəndin, qəsəbənin, şəhərin azad edilməsi xalqımız və dövlətimiz üçün ölçüyəgəlməz dəyərə malik idi.

Strateji əhəmiyyətinə görə Qubadlı əməliyyatı böyük peşəkarlıq və hərbi hazırlıq tələb edirdi. Bu döyüşlərdə Azərbaycan Ordusu yüksək savad, cəsarət və milli vətənpərvərlik ruhu nümayiş etdirdi. Nəticədə, 2020-ci il oktyabrın 25-də Azərbaycan Silahlı Qüvvələri Qubadlı şəhərini düşməndən tam azad etdi və bununla da müharibənin son mərhələsində həlledici üstünlüyə nail oldu.

Bu Zəfərin əbədiləşdirilməsi məqsədilə Azərbaycan Respublikasının 2020-ci il 26 noyabr tarixli Qanunu ilə “Qubadlının azad olunmasına görə” medalı təsis olundu və çoxsaylı hərbi qulluqçularımız bu medalla təltif edildi. Bu, həm qəhrəman əsgər və zabitlərimizin şücaətinə verilən yüksək qiymət, həm də xalqımızın Vətən müharibəsində qazandığı Qələbənin rəmzi idi.

Azərbaycan dövləti işğaldan azad edilmiş torpaqlarda tarixi qələbə günlərini əbədiləşdirmək məqsədilə mühüm qərarlar qəbul edib. Prezident İlham Əliyevin 2023-cü il 31 iyul tarixli Sərəncamına əsasən, azad edilmiş ərazilər üzrə şəhər günləri təsis olunub. Həmin sərəncama uyğun olaraq, 25 oktyabr Qubadlı Şəhəri Günü kimi qeyd edilir. Bu qərar Qubadlının azadlıq tarixinin dövlət səviyyəsində rəsmiləşdirilməsi, milli yaddaşın qorunması və gələcək nəsillərə ötürülməsi baxımından xüsusi əhəmiyyət daşıyır.

Şamo Qasımov

Yeni Azərbaycan Partiyası Laçın rayon təşkilatının sədr müavini

Paylaş:

Baxılıb: 544 dəfə