Media nümayəndələri işğaldan azad olunmuş Ağdama səfər ediblər

Bakı:

25 °C

56 %

9 m/s

Əlaqə

AZ RU EN

Ana səhifə / Sosial / Media nümayəndələri işğaldan azad olunmuş Ağdama səfər ediblər

Media nümayəndələri işğaldan azad olunmuş Ağdama səfər ediblər

01.06.2021 [09:12]

Mayın 31-də media nümayəndələrinin işğaldan azad edilmiş Ağdama səfəri təşkil olunub.
AZƏRTAC-ın bölgə müxbiri xəbər verir ki, media nümayəndələri əvvəlcə Bərdə-Ağdam avtomobil yolunun yenidən qurulması ilə bağlı həyata keçirilən işlərlə tanış olublar. Başlanğıcını Bərdə şəhərindən götürən Bərdə-Ağdam avtomobil yolunun uzunluğu 44,5 kilometr təşkil edəcək. Dövlətimizin başçısının tapşırığına əsasən, Bərdə-Ağdam avtomobil yolu Qarabağın inkişaf planı nəzərə alınmaqla, 4 hərəkət zolaqlı olacaq və I texniki dərəcəyə uyğun inşa edilir. Avtomobil yolu Bərdə və Ağdam şəhərləri də daxil olmaqla, bu rayonların 20-dən artıq yaşayış məntəqəsini əhatə edəcək. Artıq yolun müxtəlif hissələrində tikinti işlərinə başlanılıb. Xüsusi texnikalardan istifadə olunmaqla yolun genişləndirilərək profilə salınması və I texniki dərəcəyə uyğun ərazilərdən asılı olaraq 18,5, 21,5 və 26,5 metr enində yeni torpaq yatağının inşası işləri həyata keçirilir. Bunun üçün tikinti ərazisinə lazımi sayda qüvvə cəlb olunub.
Jurnalistlər sonra Ağdam şəhərində meşə-park salınacaq əraziyə gəliblər. Burada ilkin olaraq şəhər sakinləri və qonaqları üçün 125 hektarlıq böyük meşə parkı salınacaq. Bərpa olunacaq Ağdam kanalı şəhərin içindən keçəcək və onun suyu burada yaradılacaq gölə töküləcək.
Ağdam şəhərində inşa olunacaq ilk yaşayış binasının təməlinin qoyulduğu əraziyə gələn media nümayəndələrinə bildirilib ki, ABŞ-ın “Gensler”, Azərbaycanın “Azərbaycan inkişaf” və Türkiyənin “URAL mühendislik” şirkətləri binanın layihələndirilməsinə cəlb olunub. Binanın fasadında Ağdamın yerli ağ daşından və Avropa memarlıq elementlərindən istifadə ediləcək. Mənzillər 1, 2, 3, 4 və 5 otaqlı olacaq.
Jurnalistlər Ağdam şəhərində sənaye parkı salınacaq əraziyə də gəliblər. Sənaye Parkı qida sənayesi, kiçik sənaye və xidmət, iri sənaye müəssisələri, sosial və texniki zonalar, TIR parkı, tikinti materiallarının satışı bazası hissələrinə bölünəcək. Burada tikinti materiallarının istehsalı müəssisələrinin yaradılması, kənd təsərrüfatı məhsullarının qablaşdırılmasının, meyvə-tərəvəz konservlərinin, ət və süd məhsullarının, şərab, yem, gübrə istehsalı və emalının, eyni zamanda, xidmət sahələrinin, soyuducu kameraların təşkili də planlaşdırılır.
Media nümayəndələri Ağdama səfər çərçivəsində İmarət kompleksində, Qiyaslı məscidində, Şahbulaq qalasında, inşa ediləcək 1 nömrəli məktəbin, eləcə də yaradılacaq Zəfər muzeyi və açıq hava altında İşğal muzeyinin yerləşdiyi ərazilərdə də olublar.

Paylaş:

Baxılıb: 677 dəfə