Dövlət Gömrük Komitəsinin Akademiyasına mediatur təşkil edilib

Bakı:

27 °C

55 %

9 m/s

Əlaqə

AZ RU EN

Ana səhifə / Sosial / Dövlət Gömrük Komitəsinin Akademiyasına mediatur təşkil edilib

Dövlət Gömrük Komitəsinin Akademiyasına mediatur təşkil edilib

18.01.2019 [09:28]

Tanınmış təhsil ekspertləri və aparıcı KİV nümayəndələri üçün yanvarın 16-da Dövlət Gömrük Komitəsinin Akademiyasında (DGKA) 2018/2019-cu tədris ilinin payız semestrinin qış imtahan sessiyasının gedişini müşahidə etmək məqsədilə mediatur təşkil olunub.
AZƏRTAC xəbər verir ki, akademiyanın rəisi Qulu Novruzov DGKA-nın xüsusi təyinatlı ali təhsil müəssisəsi olduğunu vurğulayıb. 2012-ci ildə yaradılan ali təhsil müəssisəsinə “Hüquqşünaslıq” və “İqtisadiyyat” ixtisasları üzrə ilk tələbə qəbulu 2014/2015-ci tədris ilində aparılıb.
O, akademiyanın fəaliyyəti haqqında məlumat verərək burada tədris olunan fənn və ixtisaslar barədə danışıb. Azərbaycanın gömrük orqanları üçün əməkdaşlar hazırlamaq missiyasının bu xüsusi təyinatlı müəssisənin əsas vəzifəsi olduğu nəzərə çatdırılıb, 2018-ci ildə akademiyanı bitirmiş məzunların hazırda gömrük orqanlarında çalışdığı vurğulanıb.
Q.Novruzov qış imtahan sessiyasında imtahanların təşkili və onların gedişinə ciddi nəzarətin həyata keçirilməsi üçün işçi qrupu yaradıldığını deyib. Qeyd edib ki, imtahanların nəticələri barədə şikayətlərə vaxtında baxmaq məqsədilə apelyasiya komissiyası fəaliyyət göstərir.
O, imtahan sessiyasının şəffaf, normativ sənədlərə uyğun keçirildiyini görüş iştirakçılarının diqqətinə çatdırıb. Sessiyanın gedişində tələbələrə imtahanlarla bağlı şikayət, rəy və təkliflərini müvafiq elektron ünvana göndərmək imkanı yaradılıb. Tələbələr tərəfindən bildirilən irad və təkliflərin təhlil olunaraq müzakirə olunduğu da qeyd olunub.
Akademiyanın rəisi iqtisadi təhlükəsizliyin təmin olunmasında Dövlət Gömrük Komitəsində aparılan islahatlardan, təhsil ocağında aparılan islahatlar və yeniliklərdən danışıb. O, gömrük orqanlarında xidmətə qəbul olunan əməkdaşlar üçün təlimlərin yeni formatda və məzmunda keçirildiyini xatırladıb. Vurğulayıb ki, ilk təlimlərdə gömrük orqanlarına xidmətə yeni qəbul olunmuş 29 əməkdaş iştirak edib, hazırda isə 39 əməkdaş iştirak edir.
Q.Novruzov deyib ki, ən başlıcası gömrük orqanlarında çalışmaq üçün lazım olan bütün ixtisaslar üzrə kadr hazırlığının həyata keçirilməsidir. Bu baxımdan ali təhsil ocağının beynəlxalq əlaqələrinin qurulması və əməkdaşlığın genişləndirilməsi prioritet olaraq qarşıya qoyulub. Akademiyaya peşəkar müəllim və pedaqoji heyətin cəlb olunması istiqamətində də işlər aparılır, həmçinin xaricdə magistr və doktorantura təhsili alan şəxslərlə əməkdaşlıq etməkdə maraqlıdır.
Tələbələrin bilik, bacarıq və səviyyəsindən söz açan akademiyanın rəisi onların həm akademik, həm şəxsiyyət, həm də yetkinlik, davranış baxımından müsbət keyfiyyətlərə malik olduqlarını deyib. DGKA-da “İqtisadiyyat” ixtisası üzrə təhsil alan tələbələrin orta bal göstəriciləri 530-620 arası, “Hüquqşünaslıq” ixtisası üzrə isə orta bal göstəriciləri 540-610 bal arasıdır: “Hazırda akademiyada tələbələrin yalnız bilikli, bacarıqlı, peşəkar kadrlar kimi deyil, həmçinin vətənpərvər, geniş dünyagörüşünə və yüksək mənəviyyata sahib yetkin şəxsiyyət kimi formalaşmasını təmin edən mühit yaradılıb”.
Sonra akademiyada imtahanların keçirilməsi mexanizmini əks etdirən videoçarx nümayiş etdirilib.
Görüşdən sonra təhsil ekspertləri və KİV nümayəndələri imtahanların gedişatını izləyib, təlimlərin dinləyicilərinin nəzəri və praktiki dərs prosesi ilə yaxından tanış olublar.
Sonda imtahanlarla və təlimlərlə bağlı təkliflər səsləndirilib, fikir mübadiləsi aparılıb.
DGKA-da imtahanlar yanvarın 3-də başlayıb və fevralın 1-də başa çatacaq. Bununla yanaşı, gömrük orqanlarında xidmətə yeni qəbul olunmuş əməkdaşlar üçün keçirilən növbəti xidmətə hazırlıq təlimləri yanvarın 31-dək davam edəcək.

Paylaş:

Baxılıb: 585 dəfə