Azərbaycan Türkiyə İşadamları Birliyinin Ümumi Yığıncağı keçirilib

Bakı:

27 °C

51 %

9 m/s

Əlaqə

AZ RU EN

Ana səhifə / Sosial / Azərbaycan Türkiyə İşadamları Birliyinin Ümumi Yığıncağı keçirilib

Azərbaycan Türkiyə İşadamları Birliyinin Ümumi Yığıncağı keçirilib

11.05.2018 [16:49]

Erkan Özoral: ATİB hər zaman milli olub, hər zaman Türkiyənin və Azərbaycanın xeyrinə çalışıb

Azərbaycan Türkiyə İş Adamları Birliyinin (ATİB) Ümumi Yığıncağı keçirilib. Hər iki ölkənin dövlət himnlərinin oxunması və şəhidlərin xatirəsinin yad edilməsi ilə başlayan yığıncaqda prosedura uyğun olaraq iclasın sədri və katiblər seçilib, həmçinin gündəlik təsdiq edilib.
Sonra söz qonaqlara verilib. Çıxış edən Türkiyənin Azərbaycandakı səfiri Erkan Özoral iş adamlarının iki ölkə arasında münasibətlərin möhkəmlənməsindəki fəaliyyətindən danışıb, bu istiqamətdə ATİB-in özünəməxsus rol oynadığını deyib: "ATİB qurulduğu gündən etibarən iki ölkə arasındakı münasibətlərin inkişafında əsaslı rol oynayaraq bu sahədə müxtəlif layihələr həyata keçirib. Başqa qurumlardan fərqli olaraq ATİB-in bir hədəfi olub. ATİB hər zaman milli olub, hər zaman Türkiyə və Azərbaycanın xeyrinə çalışıb. ATİB-in tək məqsədi Türkiyənin və Azərbaycanın işadamlarını bir araya gətirərək hər iki ölkənin faydasına olacaq işlər görməkdir".
İclasda həmçinin Şimali Kipr Türk Cümhuriyyətinin Bakı təmsilçisi Ufuk Turqaner, Azərbaycan Respublikası Prezidenti Administrasiyasının İctimai-siyasi məsələlər şöbəsinin əməkdaşı Bəhruz Həsənov, DEİK Türkiyə-Azərbaycan İş Konseyi Sədri Selçuk Akat, AZPROMO prezidenti Rüfət Məmmədov, TÜİB sədri Hüseyn Büyükfırat, eləcə də nazirliklərin nümayəndələri çıxış edərək ATİB haqqında fikirlərini bildirib, quruma gələcək fəaliyyətində uğurlar arzulayıblar.
Daha sonra birliyin 2017-ci il üzrə hesabatı, həmçinin 2018-ci il üçün nəzərdə tutulan büdcəsi təsdiqlənib və yeni İdarə Heyətinin üzvləri seçilib. Eyni zamanda, Cemal Yangın yenidən ATİB sədri seçilib. Yenidən göstərilən etimada görə birlik üzvlərinə minnətdarlığını çatdıran Cemal Yangın eyni zamanda, iş adamlarına verilən dəstək üçün Azərbaycan və Türkiyənin dövlət nümayəndələrinə təşəkkür edib. Çıxışında o, Azərbaycan xalqının Ümummilli lideri Heydər Əliyevin Azərbaycanın və Türkiyənin iş adamlarına üçüncü ölkələrlə çalışmaq barədə verdiyi tövsiyəni xatırladaraq bildirib ki, artıq ATİB bu məqsədə doğru irəliləyir: "Bu gün artıq üçüncü ölkələrdə iş görürük. Hədəfimiz həm ölkəmizdə, həm də üçüncü ölkələrdə sərmayələrimizi artırmaqdır".
Qeyd edək ki, 2004-cü ildə təsis olunan dərnəyin hazırda 78 üzvü var.

Paylaş:

Baxılıb: 646 dəfə