Ali Məhkəmənin sədri Avstriyada Məhkəmə Dürüstlüyü üzrə Qlobal Şəbəkənin hazırlıq iclasında iştirak edib

Bakı:

29 °C

48 %

4 m/s

AZ RU EN

Ana səhifə / Sosial / Ali Məhkəmənin sədri Avstriyada Məhkəmə Dürüstlüyü üzrə Qlobal Şəbəkənin hazırlıq iclasında iştirak edib

Ali Məhkəmənin sədri Avstriyada Məhkəmə Dürüstlüyü üzrə Qlobal Şəbəkənin hazırlıq iclasında iştirak edib

29.08.2017 [10:23]

Azərbaycan Respublikası Ali Məhkəməsinin sədri Ramiz Rzayevin rəhbərlik etdiyi nümayəndə heyəti Avstriya Respublikasının paytaxtı Vyanada BMT-nin Narkotiklər və Cinayətkarlıq İdarəsi (UNODC) tərəfindən keçirilən Məhkəmə Dürüstlüyü üzrə Qlobal Şəbəkənin işə salınması üçün hazırlıq iclasında iştirak edib.
Ali Məhkəmənin mətbuat xidmətindən AZƏRTAC-a bildiriblər ki, UNODC BMT-nin 2015-ci ildə keçirilmiş konqresində qəbul olunmuş cinayətkarlığın qarşısının alınması və cinayət mühakiməsinə dair Doha Bəyannaməsi ilə əhatə edilən, üzv dövlətlərə konkret sahələrdə, o cümlədən ədalət mühakiməsində dürüstlüyün təmin olunması və korrupsiyanın qarşısının alınması istiqamətində fəaliyyətə davamlı dəstək və texniki köməklə bağlı qlobal layihənin həyata keçirilməsinə ötən il başlayıb.
Tədbirin keçirilməsində əsas məqsəd məhkəmə orqanlarının BMT-nin Korrupsiyaya qarşı Konvensiyasının 11-ci maddəsinin Banqalor Prinsiplərinə uyğun həyata keçirilməsini dəstəkləməklə, Məhkəmələrdə Dürüstlüyün Qlobal Şəbəkəsi layihəsinin yaradılması olub. Şəbəkə üzvlərinin hakimlərin, milli və regional hakim assosiasiyalarının, məhkəmə idarəçiliyində vəzifəli şəxslərin və digər maraqlı tərəflərin təcrübəsindən və peşə hazırlığından bəhrələnəcəyi nəzərdə tutulur.
İclasda qeyd edilib ki, məhkəmə işçilərinə münasibətdə 11-ci maddədə göstərilən “dürüstlük” termini məhkəmə sisteminin və ya fərdi qaydada hər bir hakimin korrupsiyaya qarşı çıxma qabiliyyətinə istinadən bütöv bir konsepsiya kimi təsbit edilə bilər. Bu baxımdan bütövlüyə, şəxsi toxunulmazlığa, ədalətə, bərabərliyə və xüsusən də məhkəmə sisteminin və hakimlərin müstəqilliyinə hörmətlə yanaşılmalıdır. Bu dəyərlər Hakimlərin Davranışı üzrə Banqolor Prinsiplərində müəyyənləşdirilərək, həmin sənədin kommentariyasında ətraflı izah edilib.
Məhkəmə Dürüstlüyü üzrə Qlobal Şəbəkə müvafiq resursların məlumat bazasının yaradılması, uyğun hüquqi sistemə, peşəkar mədəniyyətə və milli çağırışlara uyğunlaşa biləcək alətlər, praktiki təlimatlar və təlim proqramlarının hazırlanması ilə yanaşı, məhkəmə orqanlarında şəffaflıq və peşəkarlıq sahəsində potensialın inkişaf etdirilməsi üçün töhfələr verməklə, təlimlərin aparılması sahəsində məhkəmə orqanlarına dəstək üçün platforma olacaq.
Həmçinin burada şəbəkədaxili fərdi və virtual iclaslar vasitəsilə ədalət mühakiməsində qərəzsizliyin və korrupsiyanın qarşısının alınması sahəsində prioritet məsələlər üzrə ən yaxşı təcrübə və fikir mübadiləsinin aparılması, cinayət mühakiməsində bütövlükdə risklərin qiymətləndirilməsi, məhkəmə orqanları və məhkəmə işçiləri üçün effektiv nəzarət və hesabatlılıq mexanizmlərinin yaradılması, qanunvericiliyin təkmilləşdirilməsi, etik davranış qaydalarının hazırlanması və həyata keçirilməsi, təlim proqramlarının işlənilməsi barədə məsələlərin müzakirəsi nəzərdə tutulub.
Tədbirə dünyanın müxtəlif bölgələrindən Ali məhkəmələrin və Apellyasiya məhkəmələrinin sədrləri və hakimləri, tanınmış hüquqşünaslar, alimlər, beynəlxalq təşkilatların rəhbər vəzifəli şəxsləri və ekspertləri qatılıblar.
İclasda məhkəmə dürüstlüyü üzrə regional inkişaf və Məhkəmə Dürüstlüyü üzrə Qlobal Şəbəkənin təqdimatı keçirilib, şəffaflığın gücləndirilməsi və məhkəmə orqanlarında korrupsiyanın qarşısının alınmasında məhkəmələrin müstəqilliyinin rolu, gözləntilər və ehtiyaclar mövzularında çıxışlar edilərək iştirakçılar arasında fikir mübadiləsi aparılıb.

Paylaş:

Baxılıb: 450 dəfə